Life in Fukuoka "Nepali"

【फुकुओका नागरिक अर्केस्ट्रा】

के तपाईंहरूलाई शास्त्रीय संगीत मन पर्छ?
आउँदो आइतवार, जुन १५ मा, फुकुओका शहरको तेनजिनस्थित "अक्रोस फुकुओका सिम्फोनी हल" मा [फुकुओका नागरिक अर्केस्ट्रा] को नियमित कन्सर्ट आयोजना हुन गईरहेको छ।

फुकुओका नागरिक अर्केस्ट्रा सन् १९७२ मा स्थापना भई, 'नागरिकले माया गर्ने अर्केस्ट्रा' बन्ने लक्ष्यसहित सक्रिय संगीत प्रस्तुतिहरू गर्दै आएको एउटा अमेचर अर्केस्ट्रा हो।
यसमा मुख्यत: कामकाजी व्यक्तिहरू, विद्यार्थीहरू, तथा गृहिणीहरू समेत विभिन्न पृष्ठभूमिका करिब १०० सदस्यहरु छन्। उनीहरूले हरेक हप्ता शनिबार अभ्यास गर्छन्, र वर्षमा दुई पटक नियमित कन्सर्टका साथै विभिन्न कार्यक्रमहरूमा प्रस्तुति दिन्छन्।

यस पटकको कार्यक्रममा सिबेलियसद्वारा रचित 'सिम्फोनिक कविता – वसन्तको गीत', 'सिम्फोनी नम्बर ५, इ-फ्ल्याट मेजर', तथा मेन्डेलसोनद्वारा रचित 'नाटक संगीत –ग्रीष्म रातको सपना, ओपस ६१ बाट अंशहरु' समावेश गरिनेछ।
त्यसैगरी, प्रस्तुति सुरु हुनुअघि लोबी कन्सर्ट र निर्देशकद्वारा विशेष वार्ता पनि आयोजना गरिनेछ।

कार्यक्रम, अक्रोस फुकुओका सिम्फोनी हलमा जुन १५ (आइतवार), हल खुल्ने समय दिउँसो १ बजे, कार्यक्रम शुरु दिउँसो २ बजे। 

टिकट शुल्क, साधारण दर्शक – १,५०० येन र विद्यार्थी (प्राथमिकदेखि विश्वविद्यालय तहसम्म) – ५०० येन हो।

यो अवसरलाई नछुटाउनुहोस्—शास्त्रीय संगीतको आनन्द लिनुहोस्!

【फुकुओका शहरको सूचना】

कर सम्बन्धि

जनवरी १ देखि फुकुओकामा बस्दै आउनुभएको व्यक्तिको यदि अघिल्लो वर्षको आय १० लाख नाघेको भएमा फुकुओका प्रान्तको कर तिर्नु पर्ने हुन सक्दछ।

जुन १५ तिर कर तिर्न सूचना आउन सक्ने भएकोले, अवश्य पनि खामभित्रको ध्यानपूर्वक पढ्नुहोला।

तिर्नुपर्ने म्याद र शुल्क लेखिएको हुन्छ। कोन्भिनी, बैंक वा हुलाक मार्फत तिर्नुहोला।

स्मार्टफोन भुक्तानी वा क्रेडिट कार्डबाट पनि तिर्न सकिन्छ। 

त्यस्तै, कम्पनीमा कार्यरत व्यक्तिहरुको हकमा, कर सीधै तलबबाट कटौती हुन सक्छ।

शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना हुन सक्दछ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

२३ वटा भाषाहरुमा, फोनमार्फत् परामर्श लिन सक्नुहुन्छ। 

फोन नम्बर, ०९२-७५३-६११३ हो।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

【हाकोजाकिगु आजिसाई महोत्सव】

वसन्तदेखि गर्मी तिर मौसम परिवर्तन हुने यस समयमा, प्रायः वर्षा र बादल लाग्ने दिनहरू देखापर्ने ‘चुयु’ भन्ने वर्षा ऋतु सुरु हुन्छ। फुकुओकामा चुयु प्रायः जूनको शुरुमा शुरु भई जुलाईको मध्यतिर समाप्त हुन्छ। यस चुयुको समयमा रमाइलो लिन सकिने मौसमी फूल भनेको हो, “आजिसाई”।

यो फूल सुरुमा हल्का रंगको भएर फुल्न थाल्छ, र समयसँगै यसको रंग गाढा बन्दै जान्छ। साथै, माटोको अम्लीयता (pH) अनुसार यसको रंग पनि परिवर्तन हुन्छ। सेतो, नीलो, गुलाबी, बैजनी रंगका जीवन्त आजिसाईहरू बाटो छेउछाउ र फूलबारीमा पनि फुल्ने भएकाले, अलिक बाहिर जान गाह्रो लाग्ने चुयुको समयमा बाहिर निस्कँदा पनि मन प्रसन्न बनाउँछ।

फुकुओका शहरभित्र आजिसाई हेर्न सकिने धेरै रमणीय स्थानहरू छन्। तेनजिनबाट पनि नजिकै रहेको “मैजुरु पार्क”, “फुकुओका सिटी म्युजियम” को पछाडिको हरियाली क्षेत्र वा “बोटान शाकुयाकु बगैँचा” को प्रवेशद्वार विशेष गरी हिँडडुल गर्ने मार्गका लागि उपयुक्त छ।

“फुकुओका सिटी बोटानिकल गार्डेन” मा केवल आजिसाई मात्र होइन, ग्रीनहाउसमा विभिन्न प्रजातिका वनस्पतिहरू पनि अवलोकन गर्न सकिन्छ, जसले गर्दा वर्षाको दिनमा पनि आरामसँग वनस्पति अध्ययनको मजा लिन सकिन्छ।

त्यस्तै, पूर्व क्षेत्रको “उमिनो नाखामिचि समुन्द्री किनार पार्क” वा पश्चिम क्षेत्रको “नोकोनोशिमा आइल्यान्ड पार्क” मा फराकिलो क्षेत्रमा रंगीन आजिसाईहरू हेर्न सकिन्छ।

साथै, पूर्व क्षेत्रमा रहेको “हाकोजाकिगु” मा, जून महिनाभरि ‘हाकोजाकिगु आजिसाई महोत्सव’ आयोजना गरिन्छ। त्यहाँको करिब १,७०० चुबो (झन्डै ५,६०० वर्ग मिटर) क्षेत्रफलमा फैलिएको “आजिसाई बगैँचा” मा झन्डै १०० प्रजातिका ३,५०० वटा आजिसाईका बिरुवाहरू फुल्छन्। पूजा गर्नुअघि हातमुख धुने पानीमा सजाइएका आजिसाई पनि छुटाउन नहुने दृश्यहरू मध्ये एक हो।

जापानको चुयु मौसममा झनै सुन्दर देखिने आजिसाई फूलहरूले तपाईंको मनमा शान्ति ल्याओस्।

【फुकुओका शहरको सूचना】

चुयु र भारी वर्षा सम्बन्धि

जापानमा जुनदेखि जुलाईसम्मलाई  "चुयु" अर्थात् वर्षा ऋतु भनिन्छ र यस अवधिमा भारी वर्षा हुने गर्दछ। भारी वर्षाको कारण प्रकोपहरू हुने सम्भावना भएकोले ध्यान दिनुहोला। 

हालैका वर्षहरूमा पनि, वर्षाको मौसममा रेकर्ड-ब्रेक भारी वर्षाको कारणले, फुकुओका प्रान्तमा पनि धेरै क्षति पुर्याएको थियो। भारी वर्षा हुँदा, नदी, तट वा पहाड नजिकको चट्टानहरू जस्ता खतराजनक ठाउँहरू नजिक नजानुहोस् र आफ्नो जीवन रक्षाको लागि कदम चाल्नुहोस्।

फुकुओका सिटिको होमपेजमा Hazard map र विपद् रोकथाम सम्बन्धि जानकारी प्राप्त गर्न सक्नुहुन्छ। आफू बस्ने क्षेत्रमा हुन सक्ने सम्भावित खतरा र आश्रय स्थलमा जाने सुरक्षित तरिका आदिको बारेमा अग्रिम जानकारी राख्ने गरौँ। बिस्तृत जानकारी, ‘Fukuoka City Multilingual Portal’ भनि खोजि, साईगाईको पेजमा हेर्नुहोला। 

फुकुओका शहरको महत्वपूर्ण जानकारीहरु, फुकुओका सिटिको आधिकारिक Facebook ‘Global Community Fukuoka’ वा फुकुओका सिटी इन्टरनेशनल फाउण्डेसनको Facebook ‘फुकुओका शी कोकुसाई खाईखान्/ आत्ताखा फुकुओका「福岡市国際会館／あったか福岡」बाट पनि बहुभाषामा प्राप्त गर्न सक्नुहुन्छI पेजलाई follow गरेर, सामान्यदेखि महत्वपूर्ण जानकारीहरु लिनु होला।

【एशियन मार्केट फेस्टा २०२५】

एशियाली खाना, हस्तकला सामग्री, यात्रा सम्बन्धी जानकारी, साथै फुकुओका र क्युशुको स्वादिला परिकारहरू पनि अनुभव गर्न सकिने "एशियन मार्केट फेस्टा" कार्यक्रमअहिले तेन्जिन चुओ पार्क, गेइहिनकान अगाडिको खुला चौरमा आयोजना भइरहेको छ।

कार्यक्रम मङ्गलबार, मे २७ तारिखबाट सुरु भई आइतबार, जुन १ तारिखसम्म ६ दिनसम्मचल्नेछ।

ताइवान, चीन, कोरिया, भियतनाम, थाईल्याण्ड, भारत, हङकङलगायत एशियाका विभिन्न देशहरूका परम्परागत परिकारहरू यहाँ एकै ठाउँमा पाइन्छन्। करिब ३० वटा स्टलहरू एकै ठाउँमा छन्, जसले साँचिकै एशियाली बजार र नाइट मार्केटको अनुभव दिन्छ। स्टलहरूमा लोकप्रिय स्ट्रीट फूड, देश-देशका बीयर र मिठाइहरू, र स्थानीयले मन पराउने विशेष परिकारहरू पनि पाइन्छन्।

यस वर्ष, फुकुओका र क्युशु क्षेत्रका प्रसिद्ध रेस्टुरेन्टहरूले पनि सहभागिता जनाएका छन्। पर्यटकहरूका लागि स्थानीय उत्पादन र स्वादिलो परिकारहरू प्रस्तुत गरिँदैछ। कार्यक्रममासङ्गीत, नृत्य, सांस्कृतिक प्रस्तुति, र मार्शल आर्ट प्रदर्शनपनि भएकाले, यो ६ दिनको फेस्टिवल रमाइलोले भरिपूर्ण छ।

प्रवेश निःशुल्क छ।
कार्यक्रम समय:सोमबारदेखि शुक्रबार – बेलुका ५ बजेदेखि राति १० बजेसम्म। शनिबार र आइतबार – दिउँसो १२ बजेदेखि राति १० बजेसम्म। अन्तिम दिन, आइतबार, जुन १– राति ९ बजेसम्म।

एकै दिनमा अनुभव गर्न नसकिने, बारम्बार आकर्षित गर्ने विविध परिकारहरूको "गुरमे स्ट्रिट" अहिले तेन्जिनमा आयोजना भइरहेको छ। पक्कै पनि घुम्न जानुहोला।

【फुकुओका बोर्डो वाइन फेस्टिवल २०२५】

तेन्जिन क्षेत्रमा भइरहेको अर्को एक रमाइलो बाहिरी कार्यक्रम पनि छ।
फुकुओका सिटी हलको पश्चिम तर्फ रहेको फुरेआइ हिरोबामा अहिले "फुकुओका बोर्डो वाइन फेस्टिवल"आयोजना भइरहेको छ।

फ्रान्सको बोर्डो शहर र जापानको फुकुओका शहरबीच मैत्रीपूर्ण सम्बन्ध छ। त्यसैअनुसार, यो वाइन महोत्सव सन् २०१७ देखि प्रत्येक वर्ष यो समयमा आयोजना हुँदै आएको हो।

यस वर्ष ८औं पटक आयोजना भइरहेको यो कार्यक्रममा करिब१०० प्रकारका बोर्डो वाइनहरूपाइन्छन्। साथै, फुकुओकाका प्रसिद्ध रेस्टुरेन्टहरूले तयार पारेकाक्युशु क्षेत्रका सामग्री प्रयोग गरिएका फ्रेन्च खानाकोस्वाद लिन सक्नुहुन्छ।

यस कार्यक्रममाब्यारे, ओपेरा, र जाज संगीतको प्रत्यक्ष प्रस्तुति पनि हुन्छ।
कार्यक्रम संचालन अवधि, सोमबारदेखि शुक्रबार बेलुका ५ बजेदेखि, र शनिबार आइतबार दिउँसो १२ बजेदेखि राति १० बजेसम्म।
जुन १५ आइतबारसम्मफेस्टिवल चल्नेछ।

रातो, सेतो, र रोजे वाइनजस्ता विभिन्न प्रकारका वाइनहरू यहाँ उपलब्ध छन्।
यदि तपाईं वाइन मन पराउनुहुन्छ भने, आफ्नो मनपर्ने स्वाद पत्ता लगाउन यो कार्यक्रम एकदम उपयुक्त छ।

वाइन, खाना र संस्कृति एकै ठाउँमा अनुभव गर्न सकिने यो विशेष स्थलमा, बोर्डो र फुकुओकाको सौन्दर्य नजिकबाट अनुभव गर्नुहोस्।

अवश्य तेन्जिनमा घुम्न जानुहोस्♪

【Hakata Machiya Furusatokan】

के तपाईंहरूले हाकातामा अवस्थित एक प्रमुख पर्यटकीय स्थल Hakata Machiya Furusatokan को भ्रमण गर्नुभएको छ?

यो संग्रहालय फुकुओका शहरको हाकाता वार्डमा पर्ने रेइसेनमाची भन्ने स्थानमा, प्रसिद्ध कुशिदा मन्दिरको नजिकै अवस्थित छ। यहाँबाट पुरानो हाकाताको जीवनशैली र परम्परागत संस्कृति हेर्न र अनुभव गर्न सकिन्छ।

Hakata Machiya Furusatokan फुकुओका शहरको सांस्कृतिक सम्पदामा सूचीकृत भवनहरू, हाकाता र फुकुओकासँग सम्बन्धित सामग्रीहरू पाइने उपहार पसल, र हाकाताको इतिहास तथा संस्कृतिका विषयमा जानकारी दिने प्रदर्शनीहरूले भरिपूर्ण छ। साथै, यहाँ परम्परागत शिल्पकला निर्माण गर्ने शिल्पकारहरूको कार्य हेर्न सकिन्छ र उनीहरूसँगै मिलेर शिल्पकला सिक्न र अभ्यास गर्न सकिने अवसर पनि उपलब्ध छ।

यस वर्ष, संग्रहालयको स्थापना भएको ३० वर्ष पुगेको अवसरमा, यहाँ रहेको उपहार पसलमा नयाँ क्याफे थपेर अप्रिल महिनामा पुनः खोलिएको छ।

नयाँ नाममा खुलेको यो क्याफे र पसल "हाकाताकारा (Hakatakara)" मा, हाकाताको परम्परागत शिल्पकला, फुकुओकाका लोकप्रिय सामग्रीहरू, स्थानिय मिठाइहरू र केवल यहीँ मात्र पाइने विशेष वस्तुहरू बिक्रीमा राखिएका छन्, जसले उपहारको रूपमा लैजानका लागि उपयुक्त बनाउँछ। क्याफेमा तपाईंले जापानी चिया र परम्परागत मिठाइहरूको स्वाद लिन सक्नुहुन्छ।

हाकाताको परम्परा र संस्कृतिलाई नजिकबाट जान्न र अनुभव गर्न सकिने यो नयाँ स्थल हो, अवश्य जानुहोला।

【फुकुओका शहरको सूचना】

यासासीई निहोन्गो राजीओ कोउजा अर्थात् सरल जापानी भाषा रेडियो कोर्सको परिचय

तपाईहरुले “यासासीई निहोन्गो राजीओ कोउजा” अर्थात् सरल जापानी भाषा रेडियो कोर्स को प्रसारण सुन्नुभएको छ?

यो कार्यक्रम, जापानी भाषा राम्ररी नबुझ्ने विदेशीहरू सबैका लागि हो, र यस कार्यक्रममा “सरल जापानी भाषा”मा बिस्तारै बोलिन्छ।

विदेशीहरुले जापानमा बसोबास गर्दा थाहा पाउनु पर्ने सूचनाहरुको बारेमा जानकारी दिईनेछ।

यो कार्यक्रम प्रत्येक शुक्रवार ९:५४ बाट प्रसारण हुँदै आईरहेको छ।

बुझ्न गाह्रो भएमा, वा सुन्न छुटेको भएमा पनि ठिकै छ!

Love FM को होमपेजमा पोष्ट गरिएको स्क्रिप्टमा हेरेर Podcast मा बारम्बार सुन्न सक्नुहुन्छ।

कृपया सुनिदिनु होला।

HIV परिक्षण सप्ताहको बारेमा

जुन १ देखि जुन ७ सम्मको १ हप्ता "HIV परिक्षण सप्ताह" हो।

रेइवा ६ मा, फुकुओका शहर भित्रको चिकित्सा संस्थानहरूले दिएको नयाँ रिपोर्ट अनुसार HIV संक्रमित व्यक्तिहरु २७

 जना र एड्सका बिरामीहरू १५ जना थिए। HIV संक्रमणको रोकथाम, प्रारम्भिक पहिचान र प्रारम्भिक उपचार महत्त्वपूर्ण छ। HIV संक्रमण हुँदैमा, धेरैजसो लक्षणहरू नदेखिने भएकोले, संक्रमण छ कि छैन भनेर पत्ता लगाउन परिक्षण गर्न आवश्यक छ।

प्रत्येक वार्डको Health and Welfare Center मा, निःशुल्क र गोप्य रूपमा HIV परिक्षण गराउन सक्नुहुन्छ। यो केवल रगत लिएर गरिने सजिलो परीक्षण हो।

परिक्षण गर्न मिल्ने दिन तोकिएको हुनाले, कृपया जानुअघि फुकुओका सिटीको होमपेज आदिबाट अग्रिम जानकारी लिनुहोला।

HIV संक्रमणको प्रारम्भिक पहिचान र उचित स्वास्थ्य सेवा र उपचार प्राप्त गर्नाले एड्स फैलिने गतिलाई ढिलाइ गर्न सक्दछ। त्यसैले, आफुलाई शंका लाग्ने बित्तिकै, प्रारम्भिक परिक्षण गर्ने गरौँ।

【फुकुओका म्युजियम वीक】

फुकुओका शहरले, रंगीन कला र संस्कृतिको शहर बन्ने लक्ष्यका साथ, यस वर्ष पनि "अन्तर्राष्ट्रिय संग्रहालय दिवस" (मे १८) लाई अवसर मानेर फुकुओका म्युजियम वीक आयोजना गर्दैछ।

यस पटक १६औं पटक आयोजना हुँदै गरेको यो कार्यक्रम, मे १७ गते शनिबारदेखि मे २५ गते आइतबारसम्म, कुल ९ दिन चल्नेछ। शहरभरिका १६ वटा संग्रहालय र कला केन्द्रहरूले सहभागिता जनाउने यस कार्यक्रममा, दर्शकहरूका लागि छुट, उपहार, विशेष कार्यक्रमहरू, र प्रदर्शनीहरू जस्ता विविध आकर्षणहरू तयारी गरिएको छ। निरन्तर रुपमा संग्रहालय जान रुचाउनुहुन्छ भने, यो अवसर तपाईंलाई केही फरक अनुभव दिनेछ। यदि तपाईं संग्रहालयमा पहिलो पटक जान लागिरहनु भएको छ भने, यसलाई कला र इतिहाससँग नजिक हुने राम्रो मौकाको रूपमा लिन सक्नुहुन्छ। यस अवधिमा, नियमित प्रदर्शनीका साथै विशेष व्याख्यान, कार्यशाला (वर्कशप), ब्याकस्टेज टुर, ग्यालरी टक जस्ता रोचक कार्यक्रमहरू पनि आयोजना गरिनेछन्।

विशेष आकर्षणमा, कार्यक्रममा सहभागी १६ स्थानहरूमध्ये जुनसुकै ३ वटा स्थानमा स्ट्याम्प संकलन गरेर आवेदन दिनुहोस्, तपाईंले विशेष प्रदर्शनी र ‘हाकाता-जा’ नाटकको निःशुल्क टिकट जस्ता उपहार जित्ने अवसर पाउनुहुनेछ। विस्तृत जानकारीको लागि सहभागी स्थलहरू वा पर्यटन सूचना केन्द्रहरूबाट जानकारी पर्चा लिन नबिर्सनुहोस्।

यस अवसरमा, तपाईं पनि फुकुओका शहरका संग्रहालय र कला केन्द्रहरूमा गएर, ज्ञान, नयाँ अनुभव र प्रेरणाले भरिएका स्थानहरूको मजा लिनुहोस्।

【फुकुओका शहरको सूचना】

हलुका सवारी साधन कर सम्बन्धि

मोटरबाईक वा हलुका कार भएकाहरुले, अप्रिल १ मा हलुका सवारी साधन कर तिर्नु जरुरी छ।

यदि तपाईंसँग मोटरबाईक वा हलुका कार छ भने, हुलाक मार्फत कर तिर्नका लागि सूचना आउन सक्छ, अवश्य पनि भित्र राम्ररी हेर्नुहोला। 

जुनको २ तारिक सम्ममा कोन्भिनी, बैंक वा हुलाक मार्फत तिर्नुहोला।

स्मार्टफोन भुक्तानी एप वा क्रेडिट कार्ड प्रयोग गरेर पनि कर शुल्क तिर्न सक्नुहुन्छ। 

यदि तपाईंले मोटरबाईक आदिको शहरी कर तिर्नु भएन भने, तपाईंको निवास कार्डको नविकरण गर्नमा समस्या पर्नुका साथै तपाईंको सम्पत्ति फुकुओका शहरले जफत गर्ने सम्भावना पनि छ।

नबुझेको कुरा भएमा वा कर तिर्न गाह्रो भएमा, वार्ड अफिसको काउन्टरमा परामर्श लिनु होला।

२३ वटा भाषाहरुमा, फोनमार्फत परामर्श लिन सक्नुहुन्छ। 

फोन नम्बर, ०९२-७५३-६११३ ।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

【कुओकाको गोल्डेन वीक सम्बन्धि जानकारी】

यस वर्ष पनि "गोल्डेन वीक" को समय आएको छ।
यस साता देखि अर्को साता सम्म फुकुओकामा आयोजना हुने केही इभेन्टहरूको जानकारीहरु लिएर आएकी छु।

प्रत्येक वर्ष जस्तै यस वर्ष पनि सामाजिक सञ्जाल र मिडियामा निकै चर्चित 【क्राफ्ट ग्योज़ा फेस्ट】 फुकुओकामा आयोजना हुँदैछ। सरल नेपालीमा भन्ने हो भने यो मःमः फेस्टिवल हो।
यसपटक, जापानभरिबाट आएका १४ वटा ग्योज़ा पसलहरू, साथमा फ्राइड राइस, ड्रिंक र डिजर्टका पसलहरू पनि सहभागि छन्।
लोकप्रिय याकी ग्योज़ा, सुई ग्योज़ा, आगे ग्योज़ा, मुसि ग्योज़ा लगायत अन्य अनौठा स्वादका ग्योज़ाहरू पनि उपलब्ध छन्।
२८ प्रकारका ग्योज़ा छन्, जसको हरेक पक्षमा खास ध्यान दिइएको छ; चाहे त्यो ग्योज़ाको खोल होस्, भित्रको भराइ, वा साथमा दिने अचार।
ग्योज़ा मन पराउने सबैका लागि उपयुक्त, यो १२ दिने फेस्टिबलमा, क्राफ्ट ग्योज़ा र क्राफ्ट बियर भरपूर पाइनेछ।
कार्यक्रम फुकुओका शहरको माईजुरु पार्कमा, बिहान ११ बजेदेखि राति ९ बजेसम्म।
समाप्ति मिति अर्को साता मंगलबार, मे ५।

अर्को कार्यक्रम “खाना” र “संस्कृति” को मिलन भन्ने बिषयमा छ।
【फुकुओका ज्योउ नाइट मार्केट GW स्पेशल】 नामक यो इभेन्ट माईजुरु पार्कको पूर्व अदालत स्थलमा भइरहेको छ। यो मार्केट मे ६ तारिकसम्म चल्नेछ।
रातमा उज्यालो पारिएको सुन्दर किल्लाको दृश्यबीच, स्थानीय खानाका स्टलहरू, सरसजावट तथा सानातिना थरिथरिका सामग्रीहरू बिक्री हुने पसलहरू हुनेछन्।
फुकुओका भित्रका चर्चित रेस्टुरेन्ट र विशेष पसलहरूको उत्कृष्ट खानाका साथै, लोकप्रिय किचन कारहरू पनि हुनेछन्।
यो कार्यक्रममा भाग्य जाँच, वर्कशप र परम्परागत खेलकुद जस्ता रमाइलो गतिविधिहरू पनि हुने भएकोले बुढाबुढीदेखि बच्चासम्म सबैले रमाउन सक्ने कार्यक्रम हो।
समय दिउँसो ३ बजेदेखि राति ९ बजेसम्म।
रातको शितल हावासँगै संगीत र प्रदर्शनले भरिएको फुकुओकाको नयाँ नाइट स्पटको आनन्द लिननुहोस्।

अब अर्को रमाइलो कार्यक्रमको कुरा गरौं!
यो कार्यक्रमस्थल तेनजिन स्टेशनबाट सजिलै पुग्न सकिन्छ, र स्टेशनकै नजिकैको खुला मैदानमा आयोजना हुने भएकाले झन् सुविधाजनक छ। हरेक वर्ष ३०,००० भन्दा बढी मानिसहरु सहभागी हुने यो इभेन्ट यस वर्ष १५ औं पटक आयोजना हुँदैछ।【क्युशु क्राफ्ट बियर वीक】 नामक यो लोकप्रिय कार्यक्रम, यस पटक ३८ वटा क्युशु र यामागुचिको ब्रुअरीहरूले ल्याएका ८० प्रकारका क्राफ्ट बियरहरू सहित, अप्रिल २९ (यो साता मंगलबार) देखि मे ५ (अर्को साता सोमबार) सम्म तेनजिन चुओ पार्क, किहिनखान अगाडिको खुला मैदानमा आयोजना हुँदैछ। खुला ठाउँको रमाइलो माहोलमा, यहीँ मात्र पाइने विशेष स्वादका क्राफ्ट बियर र स्वादिलो खानाको मजा एकै साथ लिन सकिन्छ।

यसपालि जापानमा क्राफ्ट बियर शुरु भएको ३० औं वर्ष भएको उपलक्ष्यमा, जापानका अनुभवी र नयाँ, दुबै प्रकारका उत्पादनकर्ताहरूले आफ्ना विशेष बियर ल्याएका छन्।
बियर मन पराउनेहरूका लागि यो दुर्लभ बियर चाख्ने सुन्दर मौका हो।
कार्यक्रम बिहान ११ बजेदेखि राति ९ बजेसम्म संचालन हुनेछ। त्यसैले बिदाको दिनको दिउँसो होस् वा कामपछि थकान मेट्न, यो राम्रो अवसर हुन सक्छ।

अन्त्यमा, 【नाइट एक्वेरियम】।
फुकुओका शहरको पूर्व क्षेत्रमा रहेको Marin World Uminonakamichi मा, मे ६ सम्मको बिदामा, संग्रहालय राति ९ बजेसम्म खुला हुने गर्दछ।

【नाइट एक्वेरियम】 मा, साँझ ६ बजेदेखि संग्रहालयको प्रकाश विशेष रूपमा परिवर्तन हुन्छ, जसले गर्दा तपाईंले पानीजन्तुहरूलाई रातको वातावरणमा, रमाइलो र रहस्यमय प्रकाशमा हेर्न सक्नुहुन्छ।
दोस्रो र तेस्रो तलाको शो पूलमा, साँझ ६ बजेदेखि “सी लायन शो”, “डल्फिन शो”, र “इवासी शो” पनि प्रदर्शन हुन्छ।
पहिले नै सिट बुक गर्न सकिनेछ, त्यसैले इच्छुक व्यक्तिहरूले अफिसियल वेबसाइट हेरेर योजना बनाउन सक्नुहुन्छ।

बिदामा बालबालिकालाई एक रात ढिला सुत्न दिएर यो अनौठो अनुभव दिन सकिन्छ!
सामान्यतया नदेखिने रातको जलजीवहरूको संसार हेर्न पाइने यो एकदमै सुन्दर अवसर हो।

अहिलेसम्म हामीले ४ वटा रमाइला इभेन्टको जानकारी दिइसकेका छौं।
तर फुकुओकाको गोल्डेन वीकको मुख्य आकर्षण भनेको, यही साता शनिबार र आइतबार (मे ३ र ४ मा) हुने 【हाकाटा डोन्ताकु मिनातो माचुरी】 हो।
हाकाताको इतिहास, संस्कृति, र यहाँका मानिसहरूको जोश र उत्साह अनुभूत गर्न सकिने यो भव्य पर्वमा तपाईं पनि अवश्य सहभागी हुनुहोस्। 

【कोइ नोबोरी】

यो समयमा देखिने विशेष परम्परा【कोइ नोबोरी】! मे ५ को दिन, "कोडोमोनो हि" (बाल दिवस) मा, बालबालिकाको वृद्धि र विकासलाई मनाउने उद्देश्यले यो झुन्ड्याइन्छ। विशेष गरेर, केटाकेटी भएका घरहरूमा, केटाहरू बलियो र साहसी भएर बढून् भन्ने शुभकामनासहित【कोइ नोबोरी】 झुन्ड्याउने परम्परा छ।

कोइ माछा कठिनाइ र समस्याहरू पार गर्दै उन्नति र सफलता प्राप्त गर्ने एक शुभ प्रतीक मानिन्छ। यसै गरी, दह र पोखरी जस्ता विभिन्न वातावरणमा जीवित रहन सक्ने यसको बलियो जीवनशक्ति पनि रहेको छ, जसबाट स्वस्थ र शक्तिशाली रूपमा वृद्धि होस् भन्ने शुभकामनासहित यो झुन्ड्याइन्छ।

सामान्य रूपमा,【कोइ नोबोरी】कौसी, बार्दली, आँगन वा ढोकाको छेउमा झुन्ड्याइन्छ। विभिन्न साइजका कार्पहरू यसमा समावेश हुन्छन्, जसमा सबैभन्दा ठूलो कालो कोइ माछा बुबालाई, दोस्रो ठूलो रातो कोइ माछा आमालाई र सबैभन्दा सानो निलो कोइ माछा छोरालाई प्रतीक गर्दछ। पछिल्लो केही वर्षहरूमा, हरियो, सुन्तला रङ, बैजनी र गुलाबी जस्ता अन्य रङहरू थपिएका छन्, र परिवारका सबै सदस्यहरूको लागि झुन्ड्याउने चलन बढेको छ।

फुकुओका शहरको सावारा वार्डमारहेको आबुरायामा नदीमा, हरेक वर्ष लगभग १५० वटा रंगीन र सुन्दर【कोइ नोबोरी】 आकाशमा फर्फराईएका हुन्छन्। नदी किनारमा फहराउँदै गर्ने यो दृश्यले सबैलाई मन्त्रमुग्ध पार्छ। हिँड्दाहिँड्दै पनि यो ठाउँको भ्रमण गर्न सक्नुहुन्छ।

त्यसैगरी, हाकाता क्षेत्रको JR हाकाता सिटीको कौसी "चुबामे नो मोरी हिरोबा" मा पनि ठूलो【कोइ नोबोरी】 देख्न पाइन्छ। यस वर्ष, अप्रिल २५ (शुक्रवार) देखि मे ६ (सोमबार) सम्म प्रदर्शनी हुनेछ, र प्रवेश निःशुल्क छ।

घुमघाम गर्ने क्रममा यी ठाउँहरूमा पनि अवश्य भ्रमण गर्नुहोस्!

【फुकुओका सिटी इन्टरनेशनल फाउण्डेसनको सूचना】

“कानूनीपरामर्शरमानसिकपरामर्शअर्थात्व्यक्तिगतपरामर्शकोपरिचय”

फुकुओका सिटी इन्टरनेशनल सेन्टरमा रहेको फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क “कानूनी परामर्श” र “मानसिक परामर्श अर्थात् व्यक्तिगत परामर्श” प्रदान गर्दैआईरहेको छ।

“कानूनी परामर्श”, हरेक महिनाको पहिलो शनिबार, बिहान १०:३० देखि दिउँसो १:३० बजेसम्म र 

तेस्रो बुधबारको दिउँसो १:०० बजेदेखि ४:०० बजेसम्म, प्रदान गरिंदै आइरहेको छ।परामर्श अवधि ४५ मिनेट। 

बुकिंगको आधारमा Fukuoka Bar Association को प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ।यदि भाषा अनुवादक आवश्यक छ भने, कृपया अग्रिममा परामर्श गर्नुहोस्।

मानसिक परामर्श अर्थात् व्यक्तिगत परामर्श, हरेक हप्ताको सोमबार, मंगलबार, र विहिबार, जापानी क्लिनिकल मनोवैज्ञानिकहरुद्वारा, अंग्रेजी र जापानी भाषामा परामर्श प्रदान गरिंदै आइरहेको छ। चाहनुहुने महानुभावहरुले बुकिंग गर्नुहोला।

जुनसुकै परामर्श पनि, गोपनीयता कडा पालन गर्ने भएकोले ढुक्क भएर परामर्श लिनुहोस्।

सम्पर्क काउन्टर खुल्ने समय, सोमबारदेखि शुक्रबार, बिहान ९ बजेदेखि बेलुका ५:३० बजेसम्म हो। 

फोन नम्बर ०१२०-६६-१७९९ हो।

【FUKUOKA IS OPEN सेन्टर】

नयाँ आर्थिक वर्षको शुरुवातसँगै, सबैले आफ्नो नयाँ जीवनशैलीको तालमेल समात्न सक्नुभएको छ कि छैन? नयाँ वातावरणमा कडा मेहेनत गरिरहनुभएका अनि हालसालै फुकुओकामा नयाँ जीवन शुरू गर्नुभएका व्यक्तिहरू धेरै हुनुहुन्छ होला।

यस हप्ता, फुकुओका प्रान्तमा बसोबास गर्ने विदेशीहरूको लागि बनाइएको वन-स्टप परामर्श केन्द्र【FUKUOKA IS OPEN सेन्टर】को जानकारी दिन चाहन्छु।

【FUKUOKA IS OPEN सेन्टर】एक निःशुल्क परामर्श केन्द्र हो, जसले फुकुओकामा सुरक्षात्मक र सहज जीवनयापन गर्न र सफलतापूर्वक काम गर्न मद्दत गर्दछ। यो परामर्श केन्द्र शहरको चुओ-कु, तेनजिनमा रहेको एक्रोस फुकुओका भवनको तेस्रो तल्लामा छ। यो केन्द्र फुकुओका प्रिफेक्चर र विभिन्न विशेषज्ञ संस्थासँग सहकार्य गर्दै, रोजगारी खोज्ने परामर्श, बसोबास अनुमति सम्बन्धी जानकारी, आवास, स्वास्थ्य सेवा र शिक्षा जस्ता धेरै विषयहरूमा सहयोग गर्दछ।

परामर्श केन्द्र, नयाँ वर्षको विदा र सार्वजनिक बिदा बाहेक, हरेक सोमवारदेखि शुक्रवार, तेस्रो आइतबार र चौथो शनिबार बिहान १० बजेदेखि साँझ ५ बजेसम्म खुला रहन्छ।

यसका साथै, परामर्श लिनको लागिकाउण्टर बाहेकअनलाइन, इमेल र फोनका माध्यमबाट पनि सेवा उपलब्ध छ, र यो २४ भाषामा उपलब्ध छ।

जीवनयापन सम्बन्धी जानकारी र फुकुओकाका आकर्षणहरू विदेशीहरूद्वारा देखाउने भिडियोहरूको समावेश भएको बहुभाषी पोर्टल साइट [FUKUOKA IS OPEN] पनि शुरु गरिएको छ। अवश्य हेर्नहोस्!

तपाईंहरु सबैलाई, फुकुओकामा आरामदायी र समृद्ध जीवनयापनका लागि धेरै धेरै शुभकामना ♪

【फुकुओका शहरको सूचना】

"फोहर फ्याँक्ने नियम सम्बन्धी"

फुकुओकामा नयाँ जीवनयापन शुरु गर्नुहुने धेरै संख्यामा हुनुहुन्छ होला।

यसपटक, फोहर फ्याँक्ने नियम सम्बन्धी सूचना रहेको छ।

फुकुओकामा फोहरलाई "जल्ने फोहर", "नजल्ने फोहर", "खाली सिसाको बोतल/प्लास्टिकको बोतल", अनि "ठूला आकारको फोहर" मा विभाजन गरी फ्याँक्ने गरिन्छ। "ठूला आकारको फोहर" बाहेक अन्य सबै फोहरहरूका लागि, कन्भिनियन्स स्टोर वा सुपर मार्केटमा बेची राखेको, फुकुओका शहरको फोहर-फाल्ने-झोला प्रयोग गरेर फोहोर फाल्ने गर्नुहोस्।

जल्ने फोहरको लागि, रातो रंगको फोहर-फाल्ने-झोला हो।

कच्चा फोहोर, कागज, कपडा, प्लास्टिक आदि फाल्ने बेलामा, रातो झोला प्रयोग गर्नुहोस्।

खाली क्यान र गिलास जस्तालाई, नजल्ने फोहरको रुपमा, निलो फोहर-फाल्ने-झोलामा फाल्ने गर्नुहोस्।

खाली सिसाको बोतल र प्लास्टिकको बोतल फाल्नको लागि, पहेंलो रंगको फोहर-फाल्ने-झोला प्रयोग गर्नुहोस्।

बसोबास गर्ने ठाउँ अनुसार फाल्ने दिन तोकिएको हुन्छ।  

जल्ने फोहर हप्तामा २ पटक, खाली सिसाको बोतल/प्लास्टिकको बोतल र नजल्ने फोहर चाहिँ महिनाको १ पटक संकलन हुन्छ।

फोहर मध्यरात संकलन हुनेभएकोले अँध्यारो भएदेखि रातिको १२ बजे सम्ममा, फोहर फाल्ने निश्चित ठाउँमा फाल्ने गर्नुहोस्।

फुकुओका शहरको आधिकारिक LINE ID मा Friendadd गरेर, तपाईंको ठेगाना सेट गर्नुभयो भने, फोहोर फाल्ने दिनमा सूचना प्राप्त गर्नुहुनेछ।

फाल्न चाहनुभएको फोहोरको नाम राख्नुभयो भने, फोहोरको किसिम पनि जान्न मिल्ने भएकोले यो एकदम उपयोगी छ।

एउटा झोलामा नअट्ने ठूला आकारको फोहर वा झोला नै च्यात्ने किसिमको भारी फोहरलाई, ठूला आकारको फोहरको रुपमा फाल्नुहोस्।

ठूला आकारको फोहरका लागि, फोन, इन्टरनेट, वा LINE द्वारा ‘फुकुओका शी सोदाई गोमी उकेचुके’ मा सम्पर्क गर्नुहोस्। 

शुल्क, फोहोर फाल्ने ठाउँ, फाल्ने दिन, इत्यादि जाँच गरेर फोहोर बाहिर राख्नुहोस्।

फोनमार्फत सम्पर्कका लागि, ठुलो आकारको फोहर फाल्ने सेन्टरको फोन नम्बर, ०९२-७३१-११५३ । 

टेलिफोन अनुवाद मार्फत् २३ वटा भाषाहरुमा सेवा उपलब्ध छ।

यस अतिरिक्त, QR कोड स्क्यान गरेर १० विभिन्न भाषाहरूमा फोहोर फाल्ने नियमहरूको बारेमा जानकारी प्रदान गर्ने सेवा पनि राखिएको छ। कृपया फुकुओका शहरको वेबसाइट हेर्नुहोस्।

【नेपाल फेस्टिवल फुकुओका】

वसन्तको आगमनसँगै बाहिर घुमघाम गर्नको लागि मौसम राम्रो हुँदै गएको छ। यस हप्ता अन्त्यत: १२ अप्रिल (शनिवार) र १३ अप्रिल (आइतबार) का दिनहरूमा, तेन्जिन चुओ पार्कमा 【नेपाल फेस्टिवल फुकुओका】 आयोजना हुन गईरहेको छ। यस फेस्टिवलमा, नेपालका परम्परागत कला र संस्कृतिको परिचय, स्वादिष्ट नेपाली खाना तथा लोकप्रिय कलाकारहरूको प्रस्तुति अनुभव गर्न सक्नुहुनेछ।

फुकुओका शहरमा अहिले १०,००० भन्दा बढी नेपालीहरू बसोबास गरिरहेका छन्, जसमा धेरैजसो विद्यार्थीहरू छन्। यसले फुकुओकालाई जापानभर नेपालीहरूको धेरै जनसंख्या भएको क्षेत्रहरू मध्ये एक बनाएको छ। साथै, यस वर्ष अप्रिल १४ मा नेपाली विक्रम संवत अनुसार नयाँ वर्ष पर्दछ। नयाँ वर्षलाई मनाउने कार्यक्रमको रूपमा, फुकुओकामा सन् २०१० देखि 'नेपाल फेस्टिवल फुकुओका' आयोजना हुँदै आएको छ, र यो पटक फेस्टिवलको १२औं संस्करण हो।

यो फेस्टिवल मुख्य रूपमा फुकुओकामा बसोबास गर्ने नेपाली विद्यार्थीहरू र नेपाली समुदायका व्यक्तिहरूको नेतृत्वमा आयोजना गरिन्छ। महोत्सवमा नेपाली खानाका परिकार र सामग्रीको बिक्री, सांस्कृतिक नृत्य र संगीत प्रदर्शन, परम्परागत बाजा परेड, नेपाली पहिरन सारीको अनुभव, कला प्रदर्शनी, पर्यटन जानकारी जस्ता कार्यक्रमहरू समावेश गरिएको छ। विविध कार्यक्रमहरूले भरिएको यस महोत्सवमा, हरेक वर्ष धेरै मानिसहरू सहभागी हुने गर्दछन्।

फेस्टिवलको दुवै दिन बिहान १० बजे देखि साँझ ६ बजे सम्म कार्यक्रम सञ्चालन हुनेछ। प्रवेश निःशुल्क छ। फुकुओकामा रहँदा नेपाली संस्कृति अनुभव गर्ने दुर्लभ अवसरका रूपमा, यस दुई दिने कार्यक्रममा सहभागी भई, हामीसँगै नेपाली नयाँ वर्षको उत्सव मनाऔं!

【फुकुओका शहरको सूचना】

“विदेशीहरूले परामर्श लिन सकिने काउन्टरको परिचय”

नयाँ जीवनमा कुनै समस्या वा नबुझेको कुरा छ कि?

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धि परामर्श कहाँ लिने भनेर थाहा नभएको समयमा, उपयुक्त सम्पर्क काउन्टर तथा अन्य जानकारीहरु प्रदान गर्दै आईरहेको छ।

फोन नम्बर, ०१२०-६६-१७९९ ।

सम्पर्क समय ९:०० देखि ५:३० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

राष्ट्रिय स्वास्थ्य बीमा, फोहोर, कर, आदि जस्ता फुकुओका शहरका प्रक्रियाहरूको बारेमा बुझ्नु परेमा, दोभाषे सेन्टरमा कल गरेर, आफू बस्ने वार्डमा सम्पर्क गरि परामर्श लिन सक्नुहुन्छ।

फोन नम्बर, ०९२-७५३-६११३ । 

सम्पर्क समय ९:०० देखि ५:०० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

यस अतिरिक्त, चिकित्सा संस्था खोज्दा, अस्पतालमा डाक्टरसँग कुरा गर्दा, अस्पताल वा सिफारिस गरिएको फार्मेसीमा औषधि लिँदा, Fukuoka City Medical Interpreting Call Center को टेलिफोन अनुवाद सेवा प्रयोग गर्न सक्नुहुन्छ।

फोन नम्बर, ०९२-७३३-५४२९ हो।

चौबीसैघण्टा हरेक दिनलिन सकिने यो सेवा, २० वटा भाषाहरुमा उपलब्ध छ। 

उपयोग शुल्क निःशुल्क छ, तर फोनको शुल्क भने फोन गर्ने व्यक्तिले तिर्नु पर्छ।

【फुकुओका ज्योउ साकुरा माचुरी】

तपाईंहरुले यस वर्षको साकुरा फुलेको देखिसक्नु भयो कि? हरेक वर्ष मार्चको अन्त्यदेखि अप्रिलको शुरुवातसम्म, फुकुओका शहरको "माइजुरु पार्क" मा साकुरा फूल फुल्ने समयमा 【फुकुओका ज्योउ साकुरा माचुरी】 आयोजना गरिन्छ।

माइजुरु पार्क एक प्रसिद्ध स्थल हो, जहाँ सोमेइयोशिनो र शिडारेजाकुरा जस्ता १९ प्रकारका साकुराका फूलहरू फुल्छन्। यस वर्ष पनि 【फुकुओका ज्योउ साकुरा माचुरी】 यहाँ भइरहेको छ।

यस महोत्सवको आकर्षण भनेको, यहाँ विभिन्न स्वादिष्ट खानाका स्टल र किचन कारहरू राखिएका छन्। साकुराको दृश्यलाई हेर्दै वसन्तका परिकारहरूको मजा लिन सक्नुहुन्छ। फुकुओका शहरका लोकप्रिय रेस्टुरेन्टका स्टलहरू, उत्सवका परिकारहरूको स्टलहरू, यामे चिया, मिठाइ र जापानी मदिरासम्मका स्टलहरू छन्। त्यसमाथि, बच्चाहरूको लागि खेलकुदका उपकरणहरू, सडक कलाकारहरूको प्रदर्शन, र स्ट्याम्प र्याली जस्ता गतिविधिहरू पनि छन्, जसले गर्दा परिवारसँग जान उपयुक्त हुनेछ।

राति साकुरा र फुकुओका दरबार उज्यालोमा प्रकाशित हुन्छ, र रातको साकुरा फूलको दृश्य अति आकर्षक हुन्छ। पानीमा साकुराका रुखहरूको प्रतिबिम्ब “उल्टो साकुरा” पनि निकै सुन्दर देखिन्छ। यो दृश्य दिनको भन्दा बिल्कुलै फरक र रमाइलो हुन्छ।

यस हप्ता आइतबारसम्म जारी हुने यस【फुकुओका ज्योउ साकुरा माचुरी】, यदि अझै जानु भएको छैन भने, पक्कै पनि भ्रमण गर्नुहोस्!

【फुकुओका शहरको सूचना】

विदेशीहरूले परामर्श लिन सकिने काउन्टरको परिचय

नयाँ जीवनमा कुनै समस्या वा नबुझेको कुरा छ कि?

Fukuoka City Consultation Support Center for Foreign Residents मा, आवास सम्बन्धी प्रकिया, रोजगार, चिकित्सा, कल्याण, प्रसुति, शिशु स्याहार, र बाल शिक्षा जस्ता जनजीवन सम्बन्धि परामर्श कहाँ लिने भनेर थाहा नभएको समयमा, उपयुक्त सम्पर्क काउन्टर तथा अन्य जानकारीहरु प्रदान गर्दै आईरहेको छ।

फोन नम्बर, (०१२०-६६-१७९९) ।

सम्पर्क समय ९:०० देखि ५:३० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

राष्ट्रिय स्वास्थ्य बीमा, फोहोर, कर, आदि जस्ता फुकुओका शहरका प्रक्रियाहरूको बारेमा बुझ्नु परेमा, दोभाषे सेन्टरमा कल गरेर, आफू बस्ने वार्डमा सम्पर्क गरि परामर्श लिन सक्नुहुन्छ।

फोन नम्बर, (०९२-७५३-६११३) । 

सम्पर्क समय ९:०० देखि ५:०० बजेसम्म । शनिवार, आइतवार, सार्वजनिक बिदा, नयाँ वर्षको बिदाहरुमा बन्द हुन्छ।

२३ वटा विदेशी भाषाहरूमा यो सेवा उपलब्ध छ।

यस अतिरिक्त, चिकित्सा संस्था खोज्दा, अस्पतालमा डाक्टरसँग कुरा गर्दा, अस्पताल वा सिफारिस गरिएको फार्मेसीमा औषधि लिँदा, Fukuoka City Medical Interpreting Call Center को टेलिफोन अनुवाद सेवा प्रयोग गर्न सक्नुहुन्छ।

फोन नम्बर, (०९२-७३३-५४२९) हो।

चौबीसैघण्टा हरेक दिनलिन सकिने यो सेवा, २० वटा भाषाहरुमा उपलब्ध छ। 

उपयोग शुल्क निःशुल्क छ, तर फोनको शुल्क भने फोन गर्ने व्यक्तिले तिर्नु पर्छ।