Life in Fukuoka "Nepali"

【वर्षको समाप्ति र नयाँ वर्षको बिदा बिताउने तरिका】

क्रिसमस पार्टी, नयाँ वर्ष आदि जस्ता वर्षको समाप्ति र नयाँ वर्षको बिदाहरूमा, खाने र पिउने अवसरहरु धेरै हुने गर्छन्। अधिक खानाले पेटमा बोझ पर्न गई, शारीरिक अवस्था बिग्रन सक्छ अनि पेट दुख्ने सम्भावना पनि बढाउन सक्छ। विशेष गरी, मासु, कफी, मदिरा, कडा मसला, कडा कोच्या, ग्रिन चिया आदिले पेटको ग्यास्ट्रिक एसिडको स्रावलाई बढाउने भएकोले धेरै नखान प्रति सावधान रहनु आवश्यक छ।

स्वस्थ रहने उपायहरुमध्ये धेरै भनिने एक हो, "नियमित तथा पौष्टिक सन्तुलित आहार खानु"। यो पेटलाई स्वस्थ कायम राख्नको लागि मात्र नभई, शरीरको रोग प्रतिरोधात्मक क्षमता बढाउन र बिरामी हुने सम्भावना कम राख्नको लागि पनि उतिकै महत्त्वपूर्ण छ।

नयाँ वर्षको मौसम वास्तविक रूपमा कठिनपूर्ण हुन सक्छ, तर पनि, कम्तिमा घरमा बेलुकाको खानामा नाबे, उडोंन् जस्ता पचाउन सजिलो खानेकुराहरू खाने, खाना बीचको अनियमित अन्तराल नराख्ने आदि जस्ता कुराहरुमा ध्यान दिने गरौं।

स्वस्थ पेटलाई कायम राख्दै नयाँ वर्षलाई स्फूर्तिदायी बनाऔँ।

 

 

【फुकुओका शहरको सूचना】

नयाँ वर्षको बिदाहरुमा वार्ड अफिस काउण्टर अनि फोहोर फाल्ने दिन सम्बन्धि

नयाँ वर्षको बिदाहरुमा, वार्ड अफिसको काउण्टर र फोहोर फाल्ने दिन परिवर्तन हुने भएकोले कृपया ध्यान दिनुहोला।

वार्ड अफिसको काउण्टर, डिसेम्बर २९ (बिहिबार) देखि जनवरी ३(मंगलबार) सम्म बन्द रहनेछ।

नयाँ वर्षको बिदाहरुको अघिपछि वार्ड अफिसको काउण्टर भिडभाड हुने भएकोले, धेरै समय राखेर जाने गरौँ।

 

डिसेम्बर ३१ (शनिबार) देखि जनवरी ३ (मंगलबार) सम्म, फोहर संकलन गर्न आउँदैन।

जल्ने फोहर, डिसेम्बर ३० (शुक्रबार) सम्ममा तथा जनवरी ४ (बुधबार) पछि मात्र तोकिएको दिनमा बाहिर राख्नुहोस्।

नजल्ने फोहर तथा खाली सिसाको बोतल, प्लास्टिकको बोतल फाल्नका लागि,

जनवरी १ (आइतबार) मा संकलन हुने क्षेत्रमा डिसेम्बर २९ (बिहिबार),

जनवरी २ (सोमबार) को क्षेत्रमा डिसेम्बर ३० (शुक्रबार),

त्यस्तै, जनवरी ३ (मंगलबार) को क्षेत्रमा जनवरी ६ (शुक्रबार) को दिन फोहर फाल्नुहोस्।

यसका साथै, ठूलो आकारका फोहरको काउण्टर तथा संकलन, डिसेम्बर २९ (बिहिबार) देखि जनवरी ३ (मंगलबार) सम्म बन्द रहनेछ।

 

 

वर्षको समाप्ति र नयाँ वर्ष सुरक्षित र ढुक्क साथ बिताउनका लागि

वर्षको समाप्ति र नयाँ वर्षको बिदाहरूमा रक्सी पिउने धेरै अवसरहरू हुने गर्छन्।

“मादकपदार्थ सेवन गरि गाडि नचलाउने, चलाउन नदिने, चलाउनेलाई बिल्कुल माफी नदिने, र बेवास्ता नगर्ने” प्रति निश्चित होऔं।

रक्सी पिएर साइकल चलाउनु पनि कानूनले निषेध गरेको छ।

विशेष ध्यान दिनुपर्ने भनेको, अर्को दिन रक्सीको ह्यांगओभर हो।

अलिकति भए पनि रक्सी लागेको बाँकी छ जस्तो लागेमा, गाडि नचलाऔं।

 

यस अतिरिक्त, हरेक वर्षको अन्ततिर ट्राफिक दुर्घटनाहरू बढ्ने गरेको पाईएको छ।

राती बाहिर निस्कँदा, ड्राइभरले देख्न सजिलो हुने, चम्किलो लुगा वा चमकदार वस्तुको प्रयोग गरौँ।

कार चलाउँदा, चाँडै बत्तीहरू अन गरौं।

 

अर्को जानकारी, बाटोमा हुने लुटपाटको बारेमा।

कम ट्राफिक भएको स्थानमा, साँझदेखि मध्यरातसम्म धेरै अपराधहरू हुने गरेको, अझ, लुटेराहरु प्रायः मोपेड बाइकमा आएका घटनाहरु धेरै छन्।

खोस्नबाट जोगिन, झोला सडकको अर्को पट्टि समात्ने गरौँ।

साथै, मान्छेको संकेत वा बाइकको आवाज सुन्नुभएमा पछाडी फर्केर हेर्ने आदि जस्ता, आफ्नो वरपर ध्यान दिने गरौँ।

 

आफू र आफ्नो बहुमूल्य सामानहरूको ध्यान दिई, नयाँ वर्षको बिदा सुरक्षित र आनन्दपूर्वक बिताऔं।

【मौसमी खाना "एनोकी च्याउ"】

कुरुम्कुरूम् किसिमको र हल्का स्वाद भएको अनि, जुनसुकै मसलासँग पनि जम्ने, एनोकी च्याउ।

वर्षभरि सुपरमार्केट आदिमा पाउन सक्नुहुन्छ, तर यसको मौसम शरद र शिशिर ऋतुमा हो!

कम क्यालोरी र अधिक फाईबर पाईने एनोकी च्याउ आहारको लागि खान सल्लाह दिईन्छ। हेर्दा सेतो र पातलो यस तरकारीमा पौष्टिक होला त? भन्नेहरु पनि हुनुहुन्छ होला। एनोकी च्याउमा भिटामिन बी, पोटासियम, आइरन आदि पाईने हुनाले यो एक पौष्टिक खाना हो।

फुकुओका प्रिफेक्चरले "हाकाता-एनोकी" भनिने तरकारीको ब्रान्ड उत्पादन गर्छ र यो पश्चिमी जापानको नम्बर एक उत्पादक हो। स्वादिष्ट खाने तरिका भनेको, यसलाई नपखालीकन पकाउने हो।

च्याउलाई पानीले पखाल्यो भने, च्याउको सुगन्ध, स्वाद र पोषक तत्वहरू पखालिने भएकोले, खासै पखाल्न सल्लाह दिईन्दैन। यसलाई मासुसँग भुटेर वा सूपमा हालेर स्वादिष्ट रूपमा खान सक्नुहुन्छ।

यसलाई फ्रिजमा एक हप्ता जति भण्डारण गर्न सकिन्छ, डीफ्रिज गरेर राख्न पनि राम्रो हुन्छ।

खाने साईजमा काटेर फ्रिजर झोलामा राखी डीफ्रिज गर्ने गर्नुहोस्।

बरु डीफ्रिज भएकोलाई नपगालिकन, जमेको अवस्थामा नै तताउने गर्नुहोस्।

डीफ्रिज गरेर राख्नाले च्याउको बाहिरी पातलो तह निस्केर, पोषक तत्वहरूको अवशोषण दर बढाउँछ र स्वाद बढाउँछ।

 

 

【फुकुओका शहरको सूचना】

यस पटक फुकुओका सिटी इन्टरनेशनल फाउण्डेसनको सूचना रहेको छ।

LINE कल प्रयोग गरेर परामर्श गर्न सकिन्छ!

फुकुओका सिटी इन्टरनेशनल फाउण्डेसनको LINE आधिकारिक Account संचालन गरिएको छ।

फाउण्डेसनको LINE आधिकारिक Account बाट LINE कल प्रयोग गरि, जीवनयापन सम्बन्धि परामर्श तथा निःशुल्क विशेष परामर्श आदिका लागि बुकिंग गर्न सक्नुहुन्छ। टेलिफोन मार्फत् परामर्श, २२ वटा भाषाहरूमा उपलब्ध भएकोले, परामर्श लिन नहिचकिचाउनुहोस्।

साथै, LINE Voom को प्रयोग गरेर फाउण्डेसनको कार्यक्रमहरुको जानकारी र फुकुओका शहरबाट जारी सूचनाहरु पठाइने गरिएको छ। "फुकुओका सिटी इन्टरनेशनल फाउण्डेसन"को होमपेजबाट फाउण्डेसनको LINE आधिकारिक Account को Friend add गर्न अनुरोध गर्दछौं।

LINE talk मार्फत परामर्श सेवा उपलब्ध छैन, तर फाउण्डेसनको होमपेजमा रहेको सोधपुछ फारमबाट पनि परामर्श लिन सक्नुहुन्छ।

 

अर्को रहेको छ,

वर्षको समाप्ति र नववर्षको बिदाको सूचना

फुकुओका सिटी इन्टरनेशनल फाउण्डेसन, डिसेम्बर २९ बिहिबारदेखि जनवरी ३ मंगलबारसम्म ६ दिनको लागि बन्द रहनेछ।

नववर्ष २०२३ जनवरी ४ बुधबार ९ बजेबाट खुल्नेछ।

वर्ष २०२३ को प्रथम विदेशीहरूका लागि नि:शुल्क कानुनी परामर्श, जनवरी ७ शनिबार आयोजना हुनेछ।

कानुनी परामर्शको लागि अग्रिम बुकिंग आवश्यक हुने हुनाले, परामर्श लिन ईच्छुक महानुभावहरुले सकेसम्म चाँडो सम्पर्क गर्नुहोस्।

विस्तृत जानकारीका लागि कृपया फोन कल वा फुकुओका सिटी इन्टरनेशनल फाउण्डेसनको होमपेजमा हेनुहोला। फोन नम्बर ०१२०-६६-१७९९ हो। कल शुल्क लाग्दैन।

फुकुओका सिटी इन्टरनेशनल फाउण्डेसनले, फुकुओकामा बस्नु हुने सबै विदेशीहरुको आरामदायी जीवनयापनका लागि, मुख्य संवाहकको रुपमा, बिभिन्न जानकारीहरु प्रदान गर्दै, सबैको जीवनयापनमा सहयोग गर्दछ। अवश्य पनि बिना हिच्किचाई परामर्श सेवा लिनुहोस्।

【नोबेल पुरस्कार वितरण समारोह】

डिसेम्बर १० मा नोबेल पुरस्कार वितरण समारोह आयोजना हुन गईरहेको छ।

स्विडेनी आविष्कारक अल्फ्रेड नोबेलको ईच्छा अनुसार, यो पुरस्कार भौतिक विज्ञान, रसायन विज्ञान, फिजियोलोजी/चिकित्सा, साहित्य र शान्तिको क्षेत्रमा "मानवजातिको लागि सबैभन्दा ठूलो योगदान गर्ने व्यक्तिहरूलाई" प्रदान गरिन्छ।

पछि आएर, अर्थशास्त्र क्षेत्र पनि थपिएर अहिले छ वटा पुरस्कारहरू समाबेश छन्।

हरेक वर्ष, प्रत्येक पुरस्कार बढिमा ३ जनासम्मलाई प्रदान गरिन्छ।

विजेताहरुलाई पुरस्कार राशि, प्रमाणपत्र र मेडल प्रदान गरिन्छ ।

यस वर्षको नोबेल शान्ति पुरस्कार, लामो समयदेखि नागरिकहरूको आधारभूत मानवअधिकार र शक्तिको आलोचना गर्ने अधिकारको संरक्षणमा सक्रिय रहँदै आएका भूतपूर्व सोभियत संघका बेलारुसका मानवअधिकार कार्यकर्ता, त्यस्तै रुस र युक्रेनको मानवाधिकार संस्था मेमोरियल तथा सेन्टर फर सिभिल लिबर्टीलाई प्रदान गर्ने घोषणा गरिएको छ।

राष्ट्को आधारमा, पहिलोमा संयुक्त राज्य अमेरिका, दोस्रोमा युनाइटेड किंगडम र तेस्रोमा जर्मनी रहेका छन्।

जापान बाहेक एसियामा भारत पहिलो स्थानमा, चीन र ताइवान समान संख्यामा दोस्रो स्थानमा छन्।

यस वर्ष कस्ता व्यक्तिहरू पुरस्कृत हुन गईरहेका छन् त भन्ने कौतुहलताको बिषय बनेको छ!

 

 

【फुकुओका शहरको सूचना】

विश्व मानव अधिकार दिवस र मानव अधिकार सप्ताहको बारेमा

"मानव अधिकार" भनेको हरेक व्यक्ति जन्मेदेखि उसले "मानव जस्तो जीवन जीउन" पाउनेको अधिकार हो।

डिसेम्बर १० "विश्व मानव अधिकार दिवस" हो, जुन जापानमा मात्र होइन, विश्वको विभिन्न भागहरुमा पनि "मानव अधिकार" को बारेमा सोच्ने दिनको रुपमा रही आएको छ।

डिसेम्बर ४ देखि १० सम्म "मानव अधिकार सप्ताह" को अवसरमा, फुकुओका शहरमा पनि, मानव अधिकारको सम्मान गरि, भेदभाव रहित आरामदायी फुकुओका शहरको उद्देश्यले “मानव अधिकार सम्मान सप्ताह” आयोजना गरिंदै आईरहेको छ।

 

प्रत्येक व्यक्ति स्वावलम्बी छ भन्ने कुरा अनुभूति दिलाने यो महत्त्वपूर्ण सप्ताह हो।

SDGs द्वारा उल्लेख गरिए अनुसार "कोही पनि नछुटौं" समाजलाई महसुस गर्न, महिला, बालबालिका, वृद्ध, विदेशी, अशक्त, आदिको आधारमा भेदभाव र पूर्वाग्रह हटाएर, एक अर्काको मानव अधिकारको सम्मान गर्न जरुरी छ।

हामीहरु पनि "दयालु हृदय" र "स्वाभिमानी जीवन"को बारेमा फेरि एकपटक सोचेर हेर्ने होइन त?

 

 

नयाँ कोरोना भाइरस विरुद्धको खोपको सूचना

फुकुओका शहरमा नयाँ कोरोना भाइरस विरुद्धको खोपका लागि ईच्छुक सम्पूर्ण व्यक्तिहरुले ढुक्क भएर खोप लगाउन सुनिश्चितका लागि काम भईरहेको छ।

 

तेस्रो पटक, चौंथो पटक र पाँचौं पटकको खोप लिनेहरूका लागि Omicron strain विरुद्धको खोप लगाउने काम भईरहेको छ। Omicron strain विरुद्धको खोप प्रति व्यक्ति एक पटक लगाईने खोप हो।

पछिल्लो खोप लिएकोबाट ३ महिना कटिसकेकाहरूका लागि, खोप लिनका लागि खोप कुपन हुलाक मार्फत् पठाईएको छ।

खोप कुपन पाउनुभएपछि, बुकिंग साइट वा खोप सेन्टरमा बुकिंग गर्न सकिने हुनाले, कृपया खोप कुपन नपाउन्जेल प्रतिक्षा गर्नुहोला।

खोप कुपन हराएका महानुभावहरुले, पुन: जारीको लागि आवेदन दिन आवश्यक छ। कृपया कल सेन्टरमा फोन गर्नुहोस्।

 

विदेशबाट फुकुओका शहरमा आउनुभएका महानुभावहरुले यदि खोप लगाउन चाहनुहुन्छ भने,

खोप कुपन जारीको लागी निबेदन दिन आवश्यक छ।

 

फुकुओका शहरमा खोप सम्बन्धि परामर्श, बुकिंग र खोप कुपन जारीको बारेमा बुझ्न, सम्पर्क गर्न सकिने कल सेन्टरको फोन नम्बर रहेको छ, ०९२-२६०-८४०५ ।

हरेक दिन बिहान ८ :३० देखि बेलुका ५ :३० बजेसम्म कल स्वीकार गरिन्छ।

नेपाली, अंग्रेजी, चाइनिज, कोरियाली, भियतनामी आदि ७ वटा विदेशी भाषाहरूमा यो सेवा उपलब्ध छ।

 

साथै, प्रत्येक वर्ष जाडो शुरु भयो कि, इन्फ्लूएन्जाको संक्रमण देखा पर्दछ।

यस वर्ष नयाँ कोरोना भाइरससँगै दुवै रोगहरू एकै समयमा हुने सम्भावना हुन सक्छ।

यदि इन्फ्लूएन्जा लागि हालेमा, गम्भीर बिरामी हुनबाट बच्नका लागि पनि, इन्फ्लूएन्जाको खोप लगाउन सल्लाह दिन्छौं।

यसका साथै, नयाँ कोरोना भाइरस र इन्फ्लूएन्जा दुबैको खोप एकै समयमा लिन सक्नुहुन्छ।

【डिसेम्बर बिताउने तरिका】

डिसेम्बर महिनालाई शिवासु पनि भनिन्छ। किनभने, "बौद्ध मन्दिरहरुको पूजारीको भिक्षुहरु सूत्र जप गर्न पूर्वबाट पश्चिमतर्फ जाने व्यस्त महिना हो" भन्ने बलियो सिद्धान्त छ।

परापूर्वकालमा १३ औँ दिनलाई "नयाँ वर्षको शुरुवात"को रुपमा मानिन्थ्यो, वर्षभरीको फोहोरहरु हटाउने "सुसुहाराई" बनाउन र Kadomatsu आदिको तयारीको लागि सल्लोको संकलन गरिन्थ्यो तर, यो आधुनिक युगको सरसफाई गर्ने तरिकामा परिवर्तन हुँदै गयो। यसका अतिरिक्त, वर्षको सबैभन्दा छोटो दिन, टौउजी (Touji) को २२ तारिखतिरदेखि जाडो बढ्दै जान्छ। त्यसैले, युजु अर्थात् निबुवा हालेको ओफुरोमा बस्यो भने, चिसो नलागीकन स्वस्थ भई जाडो कटाउन सकिन्छ भन्ने चलन छ।

भन्दाभन्दै वर्षको अन्त्यतिर आईसक्यौं, अब २०२२ सकिनै लाग्यो। बिना विघ्नबाधा २०२३ शुरु गर्न, आफ्नो कामहरू कुन क्रममा पूरा गर्ने भन्ने कल्पना गर्दै योजना बनाऔं। किनमेल लिस्ट, गर्नु पर्ने कामहरुको लिस्ट बनाई क्यालेन्डरमा लक्ष्य पूरा गर्ने दिनमा चिन्ह लगाउने पनि राम्रो उपाय होला। साथै, बिदाको मौसमको आनन्द लिन पनि नबिर्सनुहोस्।

 

 

【फुकुओका शहरको सूचना】

विश्व एड्स दिवस सम्बन्धि

डिसेम्बर १ विश्व एड्स दिवस हो। हरेक वर्ष डिसेम्बर १ लाई केन्द्रित गरि, विश्वभर एड्स सम्बन्धि जनचेतना जगाउने गतिविधिहरू आयोजना गरिन्छ।

एचआईभी संक्रमण पछि, धेरै वर्षसम्म यसको प्रत्यक्ष लक्षण बिनाको अवधि जारी रहने भएकोले, एड्स नलागेसम्म रोग पत्ता नलगाएका संक्रमित व्यक्तिहरू धेरै छन् भन्ने अनुमान गरिन्छ।

HIV संक्रमणको प्रारम्भिक पहिचान र उचित स्वास्थ्य सेवा र उपचारले एड्स फैलिने गतिलाई ढिलाइ गर्न सक्दछ। त्यसैले, प्रारम्भिक परिक्षण गर्ने गरौँ।

प्रत्येक वार्डको Health and Welfare Center मा, HIV परिक्षण निःशुल्क र गोप्य रूपमा गर्न सक्नुहुन्छ।

परिक्षण गर्न मिल्ने दिनको निश्चित समय भएकोले, कृपया जानुअघि अग्रिम जानकारी लिनुहोला।

यसका अतिरिक्त, एड्स पीडित व्यक्तिहरूलाई बुझ्ने र समर्थन गर्ने ईच्छुकत्तालाई रातो रिबनको प्रतिकले दर्शाउँछ। रातो रिबनले, एड्सको बारेमा कुनै पूर्वाग्रह नभएको र एड्स भएकासाथ बस्नेहरूसँग भेदभाव गर्दैनौं भन्ने सन्देश दिन्छ। रातो रिबन पछि डिसेम्बर १ देखि ७ सम्म ७ दिन को लागी, Hakata Port Tower र Fukuoka Red Brick Culture Museum रातो रंगको बत्ति बालि उज्यालो पारिन्छ।

विश्व एड्स दिवसको अवसरमा, एड्सको बारेमा सही ज्ञान र यसको रोकथाम उपायहरूको बारेमा सबैजनाले मनन गरेर हेरौं।

 

 

फोहरको अवैध डम्पिंग

जंगल, समुद्रीतट, नदी, सडक, पार्क आदिमा ठूलो आकारका फोहर वा घरको फोहर फाल्नेलाई अवैध डम्पिंग भनिन्छ।

फुकुओका शहरमा, बर्षको अन्त्यमा सरसफाईको कारण फोहरको मात्रा बढ्ने डिसेम्बरमा, “अवैध डम्पिंग रोकथाम सुदृढीकरण महिना" को रूपमा, अवैध फोहर फाल्न रोक्नका लागि गतिविधिहरू थप सुदृढ गरिन्छ।

फुकुओका शहरले पुलिसको सहयोगमा, धेरै अवैध फोहर फाल्ने स्थानहरुमा, निगरानी क्यामेरा वा चेताउनी संकेतहरू राख्ने र गस्तीहरू सञ्चालन गरिंदै आईरहेको छ।

टिभी, फ्रिज, फ्रिजर, वाशिंग मेशिन, कपडा ड्रायर, र एयर कन्डिशनरहरू घरायसी सामान प्रशोधन कानुन बमोजिम फोहर फाल्ने विधि तोकिएको छ।

नयाँ जडान गर्ने बेलामा लगिदिनुहुन्छ कि भनेर खरिद गरेको पसल वा नजिकको Yamada Denki मा सोध्नुहोला। रिसाइकल शुल्क, संकलन र यातायात शुल्क आवश्यक पर्छ।

शहरमा गस्ती गर्नेहरू, पर्चाहरू, इन्टरनेट आदि मार्फत् "अनावश्यक सामानहरू कम शुल्कमा संकलन गरिदिन्छौं” भनि विज्ञापन गर्नेहरु, फुकुओका शहरको अनुमति बिना अवैध रूपमा संकलन गर्ने ठेकेदारहरु हुन्। अनुमति प्राप्त नभएका ठेकेदार मार्फत् गराउनु भयो भने, अवैध डम्पिंग वा अनुचित प्रशोधन गर्ने, अधिक शुल्क लिने जस्ता समस्याहरू निम्त्याउने हुनाले कृपया यसको प्रयोग नगर्नुहोस्।

【DJ को Choice ‘Christmas Event र Light Up’】

जापानमा, हेलोवीन सकिएसँगै शहरहरुमा क्रिसमसको माहोल बनेको छ।

<तपाईंहरु क्रिसमसमा के गर्नुहुन्छ? >

तपाईंहरु क्रिसमस मनाउनुहुन्छ कि हुँदैन? आजकल, क्रिश्चियन धर्मसँग सम्बन्धित नभएका घरपरिवारमा पनि क्रिसमस मनाउने चलन छ। चाडपर्व एउटा उत्साह हो जसलाई धर्म भन्दा पनि संस्कार, संस्कृती, सौहार्दता अनि नितान्त खुशीको अभिब्यक्तिका रुपमा लिन जरुरी छ जस्तो लाग्छ।

म चाहिं, जापान आएदेखि क्रिसमसका अवसरमा प्रायःजसो साथीहरुसँग तेन्जिनमा आयोजना हुने क्रिसमस मार्केटमा घुम्ने, प्रतक्ष्य संगीतको आनन्द लिने गर्दै आईरहेकी छु। अनि त्यस क्रिसमस मार्केटमा सजाएका सान्टा क्लस र झिलिमिली क्रिसमस ट्री आदिको सुन्दर माहोलमा फोटो खिच्न पनि बेग्लै मजा छ। यो बर्ष पनि हेप्पी क्रिसमस डे भन्दै शुभकामना साटासाट गर्ने, साथीहरुसँग क्रिसमस मार्केटमा भेट्ने योजना छ। तपाईंहरु पनि जापानको यस क्रिसमसको आनन्द लिनुहोला।

 

＜Christmas Illumination＞

तेन्जिन र हाकाता शहरहरूमा, सडक छेउका रुखहरू लगायत प्रत्येक व्यावसायिक पसलहरुले राखिएका झिलिमिली बत्ती र बिशाल क्रिसमस ट्रीहरुको सजावटले गर्दा सिङ्गो शहर नै झिलिमिली भईरहेको छ।

झिलिमिली बत्ती र बिशाल क्रिसमस ट्रीको सजावट उहि ठाउँमा पनि, गत वर्षको भन्दा फरक तरिकाले सजाएको हुन सक्ने भएकोले, विभिन्न झिलिमिलीहरूको आनन्द लिन सक्नुहुन्छ।

फुकुओकाको क्रिसमसको कुरा गर्दै जाँदा, "क्रिसमस मार्केट" लाई त छुटाउन नै मिल्दैन।

 

＜क्रिसमस मार्केट＞

‘फुकुओका क्रिसमस मार्केट’, हरेक वर्ष नोभेम्बरदेखि डिसेम्बरको क्रिसमसको दिनसम्म, हाकाता र तेन्जिनमा एकै साथ आयोजना हुँदै आईरहेको, फुकुओका शहरको हिउँदको एक किसिमको परम्परा हो।

जापानको सबैभन्दा ठूलो क्रिसमस मार्केटमा, खुला परिसरमा धेरै स्टलहरू पंक्तिबद्ध राखिएका हुन्छन्, जहाँ क्रिसमसको झिलिमिली बत्ती वा सजावटका साथसाथै, तातो वाइन, तातो चकलेट आदि जस्ता तातो पेय र स्वादिष्ट खानाको मजा लिने महोत्सव हो।

यस वर्षको नारा रहेको छ, ‘हिकारी तो नेगाई’। Hakata Eki Mae Hiroba, तेन्जिनको Fukuoka Siyakusyo Mae Fureai Hiroba, Daimaru Passage Hiroba मा क्रिसमस मार्केट आयोजना भईरहेको छ।

प्रत्येक स्थानमा बिक्रीमा राखिरहेको, हरेक वर्ष लोकप्रिय रही आएको सीमित संस्करणको मग कप पनि नछुटाउनुहोला!

साथै, नाकासु क्षेत्र र तेन्जिन सेन्ट्रल पार्क पनि बेलुकी ५ बजेदेखि मध्यरात १२ बजेसम्म, सडक छेउका रुखहरू आदिमा बत्ति बालि फुकुओकाको नयाँ झिलिमिली स्थलको रुपमा परिणत भएको देखिन्छ।

क्रिसमसको दिनसम्म लगभग एक महिना जति, झिलिमिली शहर र बिभिन्न कार्यक्रमहरु हुने यस क्रिसमसको मौसममा, तपाईंहरु पनि अवश्य फुकुओकाको क्रिसमसको आनन्द लिनुहोला।

【मौसमी तरकारी・हाकुसाई अर्थात् चाइनिज बन्दा】

जाडो बढेर आयो कि खान मन पर्ने खानाहरुमध्ये एक हो, नाबे अर्थात् Hot pot खाना। अनि नाबे खानामा हाल्ने सामग्रीहरुमा नभई नहुने, हाकुसाई अर्थात् चाइनिज बन्दा। हाकुसाईको मौसम अक्टोबरदेखि नोभेम्बरतिर हो भने हिउँद लाग्यो कि यसको पिक मौसम शुरु हुन्छ। वर्षको यस समयमा हाकुसाई नरम र अधिक स्वादिलो हुन्छ। नाबे वा उमालेर पकाउने मात्र नभई यो सलादमा पनि स्वादिष्ट हुन्छ।

के हाकुसाई पौष्टिक छ त? भन्ने कसै-कसैलाई लाग्न सक्छ, तर वास्तबमा यसमा धेरै पोटासियम हुन्छ। पोटासियमले शरीरबाट नुन निकाल्ने काम गर्छ, त्यसैले यसले उच्च रक्तचाप हुनबाट जोगाउँछ।

साथै, यसमा भिटामिन सी पनि हुने भएकोले चिसो लाग्नबाट जोगाउन पनि हाकुसाई खान सल्लाह दिइन्छ।

आफ्ना साथीभाई तथा परिवारसँग खान पनि सक्नुहुन्छ, एक जनाको लागि पुग्ने नाबे सुप पनि सुपथ मुल्यमा बजारमा किन्न पाईन्छ।

बनाउन समय नभएका वा जागर नभएकाहरूका लागि, तताए मात्र पुग्ने सरल नाबे खाना पनि किन्न पाईन्छ।

धेरै सामाग्रीहरु हालेर पकाएको नाबे खानाले, तनमनलाई न्यानो पारि दिन्छ।

 

 

【फुकुओका शहरको सूचना】

यस पटक फुकुओका सिटी इन्टरनेशनल फाउण्डेसनको सूचना रहेको छ।

कानूनी परामर्शको परिचय

फुकुओका सिटी इन्टरनेशनल सेन्टरमा रहेको फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि, हरेक महिना दुई पटक निःशुल्क परामर्शहरु प्रदान गर्दै आईरहेको छ।

“कानूनी परामर्श”, हरेक महिनाको पहिलो शनिबार, बिहान १०:३० बजेदेखि दिउँसो १:३० बजेसम्म र, तेस्रो बुधबारको दिउँसो १:०० बजेदेखि ४:०० बजेसम्म, परामर्श अवधि ४५ मिनेट हो।

बुकिंगको आधारमा फुकुओका बार एसोसिएसनको प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ।

भाषा अनुवादकको आवश्यकता भएमा, निःशुल्क अंग्रेजी अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

 

 

विदेशीहरुका लागि आप्रवासन, आवास र राष्ट्रियता सम्बन्धि परामर्श’ को बारेमा जानकारी

आवासको स्थिति र आवास अवधिको बारेमा, तपाईंले केही कुरा नबुझेको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ।

हरेक महिनाको दोस्रो आइतबारको दिउँसो १ बजेदेखि ४ बजेसम्म, प्रसाशनिक वकिलद्वारा तपाईंको प्रश्न र परामर्शको उचित सल्लाह दिनुहुन्छ।

परामर्शका लागि इच्छुक महानुभावहरुले दिउँसो ३:३० बजेसम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्श गर्न चाहने महानुभावहरुले, १ हप्ता अगाडि सम्पर्क गर्नुहोला।

जुनसुकै परामर्श पनि गोपनीयता कडा पालन गर्ने भएकोले ढुक्क भएर परामर्श लिनुहोस्।

विस्तृत जानकारीका लागि, फोन सेवा नम्बर, ०१२०-६६-१७९९ मा सम्पर्क गर्नुहोला।

सोमबारदेखि शुक्रबार ९:०० बजेदेखि १८:०० बजेसम्म कल स्वीकार गरिन्छ।

【Beaujolais Nouveau】

Beaujolais Nouveau भन्नाले दक्षिणी फ्रान्सको Burgundy को Beaujolais क्षेत्रमा, त्यहि वर्षमा फसल Gamay अंगूरबाट बनेको वाईन् हो। Beaujolais Nouveau, त्यस क्षेत्रको शरद ऋतुको फसलप्रति कृतज्ञता दर्शाउने महोत्सवको रुपमा शुरु भएको भनिन्छ।

Beaujolais Nouveau हरेक वर्ष नोभेम्बरको तेस्रो बिहीबार मध्यरात बाह्र बजे रिलीज हुन्छ।

यस वर्ष २०२२ नोभेम्बर १७ बिहीबार परेको छ। साथै, जापानमा, समय अन्तरको कारणले गर्दा, वास्तविक फ्रान्सभन्दा ८ घण्टा अगाडी नै यसको मजा लिन सक्नुहुन्छ।

Beaujolais Nouveau वाईन्को साथ, चीज वा गोलभेडाको सस प्रयोग गरि बनाईएको पास्ता आदिसँग जम्छ नै, साथै जापानमा सामान्य रुपमा पाइने मासु र आलु, सस स्वादको याकिटोरी जस्ता गुलियो-नुनिलो स्वादसँग पनि यो वाईन् जम्छ।

फसल मनाउने यस वार्षिक कार्यक्रममा, शरद ऋतुको स्वादसँगै मनोरञ्जन लिएर हेर्दा कसो होला?

 

 

【फुकुओका शहरको सूचना】

「Fukuoka Prize　The Arts and Culture Prize　Shahzia Sikander को कला प्रदर्शनी」 को परिचय 

फुकुओका शहरले एशियाली शैक्षिक अनुसन्धान, कला र संस्कृतिमा उल्लेखनिय योगदान पुर्‍याउने व्यक्तिहरुलाई Fukuoka Prize ले सम्मान गर्दै आईरहेको छ। ३२औँ पटकको यस वर्षको The Arts and Culture Prize को विजेतामा, अन्तर्राष्ट्रिय रूपमा सक्रिय र ख्यातिप्राप्त पाकिस्तानी कलाकार शाहजिया सिकन्दर (Shahzia Sikander) परेकी थिईन् ।

 

पुरस्कारको सम्झनामा, Fukuoka Asian Art Museum र भूतपूर्व माइजुरु जुनियर हाई स्कूलको साइटमा रहेको Artist Cafe Fukuoka को ग्यालरीमा शाहजिया सिकन्दरको सृजनाहरु प्रदर्शनीमा राखिएका छन्।

उहाँको सृजनाहरु, परम्परागत लघु चित्रकलाको संसारमा, नवीनतम डिजिटल प्रविधिको पूर्ण प्रयोग गरी, शानदार कार्यहरुले भरिपूर्ण छन्।

प्रदर्शनी नोभेम्बर २७ सम्म छ र नि: शुल्क हेर्न सक्नु हुन्छ।

यस अवसरमा पक्कै पनि हेर्न जानुहोला।

प्रदर्शनमा राखिएका सिर्जनात्मक कामहरूबारे थप जानकारीको लागि, " Fukuoka Prize" भनि खोजेर, Fukuoka Prize　को आधिकारिक होमपेजमा गएर News & Topics को पृष्ठमा हेर्नुहोला।

https://fukuoka-prize.org/en/

 

 

「Mongolian National Matouqin Symphony Orchestra　Hakataza Theater Performance　Mongolian Wind 2022」 को परिचय 

मङ्गोलिया र जापानबीच कूटनीतिक सम्बन्ध स्थापना भएको ५०औँ वार्षिकोत्सवको उपलक्ष्यमा, डिसेम्बर १३, हाकाताजा थिएटरमा " Mongolian National Matouqin Symphony Orchestra　Hakataza Theater Performance　Mongolian Wind 2022" आयोजना हुन गईरहेको छ।

यो प्रदर्शनी, भिडियो र फिरन्ते जीवन बिताउने मङ्गोलियन समुदायको परम्परागत अस्थायी तथा सार्न मिल्ने घर, Ger आदि समावेश प्रदर्शन र संगीतको मिश्रण गरि, दर्शकहरूमा मंगोलियन संसारको अनुभव गराउने, Matouqin concert हो।

यस अवसरमा समय मिलेमा अवश्य पनि हेर्न जानुहोला।

 

प्रदर्शनीमा सहभागीताको लागि शुल्क लाग्नेछ। अहिले टिकटको बिक्री भईरहेको छ।

थप जानकारीको लागि, कृपया हाकाताजाको वेबसाइटमा हेर्नुहोला वा हाकाताजा बुकिंग सेन्टरको फोन नम्बर ०९२-२६३-५५५५ मा सम्पर्क गर्नुहोला।

 https://www.hakataza.co.jp/lineup/202212/mongoru/index.php

【बदलिँदो मौसमप्रति ध्यान दिऔं】

यो वर्षको नोभेम्बर लागि नै सकेको छ, बिस्तारै जाडो पनि नजिकिंदै छ। मौसमको परिवर्तनको बिन्दु मानिने नोभेम्बर महिना, तुलनात्मक रूपमा जीवनयापन गर्न सजिलो मौसम भए पनि, बिरामी हुने सम्भावना बढी हुने समय पनि हो।

मौसमको यस चरम परिवर्तन समयमा, दिन र रातको तापक्रममा धेरै अन्तर हुन्छ। यस किसिमको वातावरणमा शरीरको तापक्रम वा पसिना आउने आदि जस्ता राम्रोसँग समायोजन हुन नसकेर, स्नायु सन्तुलन बिग्रन सक्छ। फलस्वरूप, टाउको दुख्ने, निद्रा नलाग्ने, काँध कडा हुने, छाला फुस्रो हुने, थकान लाग्ने जस्ता लक्षणहरु देखा पर्छन्। त्यसैले, वर्षभरिमा सबैभन्दा काँध कडा हुने वा दुख्ने समय पनि भन्ने गरिन्छ।

यस किसिमको मौसमी परिवर्तनमा स्वस्थ्य तरिकाले बाँच्नका लागि हरेक दिन नियमित जीवन बिताउने, सन्तुलित आहार खाने, पर्याप्त सुत्ने, रक्तसञ्चार प्रवर्द्धनका लागि नुहाउने र सङ्गीत सुन्दै आराम गर्ने आदि, सामान्य भन्दा बढी आफ्नो शरीरको ख्याल राखेर जीवनयापन गरौं।

थप रूपमा, तापक्रममा गिरावट र सुख्खा हावा जस्ता समस्याहरू देखा पर्ने यस समयमा, सजिलै रुघा लाग्न सक्छ। तपाईंहरु पनि आफ्नो स्वास्थ्यको ख्याल राख्नुहोला।　

 

 

【फुकुओका शहरको सूचना】

नयाँ कोरोना भाइरस विरुद्धको खोपको सूचना

फुकुओका शहरमा नयाँ कोरोना भाइरस विरुद्धको खोपका लागि ईच्छुक सम्पूर्ण व्यक्तिहरुले ढुक्क भएर खोप लगाउन सुनिश्चितका लागि काम भईरहेको छ।

 

तेस्रो पटक र चौंथो पटकको खोप लिनेहरूका लागि Omicron strain विरुद्धको खोप शुरु भई सकेको छ। हाल चौंथो पटकको खोप लिनका लागि खोप कुपन हुलाक मार्फत् पठाईएको छ।

खोप कुपन पाउनुभएपछि, बुकिंग साइट वा खोप सेन्टरमा बुकिंग गर्न सकिने हुनाले, कृपया खोप कुपन नपाउन्जेल प्रतिक्षा गर्नुहोला।

खोप कुपन हराएका महानुभावहरुले, पुन: जारीको लागि आवेदन दिन आवश्यक छ। कृपया कल सेन्टरमा फोन गर्नुहोस्।

 

विदेशबाट फुकुओका शहरमा आउनुभएका महानुभावहरुले यदि खोप लगाउन चाहनुहुन्छ भने,

खोप कुपन जारीको लागी निबेदन दिन आवश्यक छ।

 

फुकुओका शहरमा खोप सम्बन्धि परामर्श, बुकिंग र खोप कुपन जारीको बारेमा बुझ्न सम्पर्क गर्न सकिने कल सेन्टरको फोन नम्बर रहेको छ, ०९२-२६०-८४०५ ।

हरेक दिन बिहान ८ :३० देखि बेलुका ५ :३० बजेसम्म कल स्वीकार गरिन्छ।

नेपाली, अंग्रेजी, चाइनिज, कोरियाली, भियतनामी आदि ७ वटा विदेशी भाषाहरूमा यो सेवा उपलब्ध छ।

 

नयाँ कोरोना भाइरस र इन्फ्लुएन्जा रोकथाम

प्रत्येक वर्ष जाडो शुरु भयो कि, इन्फ्लूएन्जाको संक्रमण देखा पर्दछ।

नयाँ कोरोना भाइरससँगै दुवै रोगहरू एकै समयमा हुने सम्भावना हुन सक्छ।

 

यसकारण, अहिले, नयाँ कोरोना भाइरसको रोकथामबारे सावधान सबैजनाले, हात धुने, मास्क लगाउने, कुनै व्यक्तिको सम्पर्कमा आउँदा पर्याप्त दूरी बनाएर बस्ने जस्ता अभ्यासहरु, इन्फ्लूएन्जा हुनबाट बच्नको लागि पनि जारी राख्ने गर्नुहोस्।

यदि इन्फ्लूएन्जा लागि हालेमा, गम्भीर बिरामी हुनबाट बच्नका लागि पनि, इन्फ्लूएन्जाको खोप लगाउन सल्लाह दिन्छौं।

साथै, नयाँ कोरोना भाइरस र इन्फ्लूएन्जा दुबैको खोप एकै समयमा लिन सक्नुहुन्छ।

 

 

【सुन्तला】

सुन्तलाको मौसम यसको प्रकार अनुसार फरक हुन्छ, तर देशभरि उच्चतम मात्रामा ढुवानी हुने शरद ऋतुलाई सामान्यतया सुन्तलाको मौसम भन्न सकिन्छ।

साथै, जापानमा 'सुन्तला' भन्नाले धेरै जसो ' Unshu-mikan' हो। जापानमा उत्पादित सिट्रस फलहरूको लगभग ७०% Unshu-mikan ले ओगोटेको छ।

फुकुओका प्रिफेक्चरमा, मुख्य उत्पादन क्षेत्रहरू मियामा-शी, ओमुटा-शी, यामे-शी र चिकुगो-शी हुन्।

सुनौलो रङमा चमकदार "फुकुओका सुन्तला" हेर्दा पनि स्वादिष्ट देखिने फलफूल! बाहिरको बोक्रा छोडाएर सुन्तलाको भित्रि खोल समेत मुखमा हाल्नाले, रसदार गुदीबाट प्रशस्त रस निस्कनुका साथै त्यहि बेला गुलियोपन, ठिक्कको अमिलोपन, र स्फूर्तिदायी स्वाद मुखभरि फैलिन्छ।

हरेक वर्ष सेप्टेम्बरको अन्त्यदेखि मार्चको अन्त्यसम्म सीमित अवधिको लागि स्वाद लिन सकिने मौसमी स्वादको आनन्द लिनुहोस्।

 

 

【फुकुओका शहरको सूचना】

「Environmental Festival Fukuoka 2022」को परिचय

यो हप्ता, अक्टोबर २९ (शनिबार) र ३० गते (आइतबार), दुई दिनको लागि, फुकुओका सिटी हलको पश्चिम तर्फको फुरेआई हिरोबामा आयोजना हुन गईरहेको कार्यक्रम " Environmental Festival Fukuoka 2022" को बारेमा जानकारी छ।

वातावरणीय समस्याहरुबारे मनोरञ्जनका साथ अध्यन गर्ने र व्यवहार परिवर्तन गर्ने अवसरको रुपमा लिन लगाउने हेतुले, फुकुओका शहर लगायत Environmental Festival Fukuoka को कार्यकारी समितिद्वारा आयोजना हुने यस कार्यक्रमको समय, बिहान १०:०० बजेदेखि ४:०० बजेसम्म।

प्रवेश नि:शुल्क हो।

वातावरणीय मुद्दाहरूमा "ECO Experimental Stage", चित्र पुस्तक लेखकहरूद्वारा कथा कथन, बोटबिरुवाको शक्तिबाट बिजुली उत्पन्न गर्ने " botanical light" को अनुभव, black light को प्रयोग गरेर Stamp rally आदि बालबालिकाहरुदेखि वयस्कहरूसम्मले पनि मनोरञ्जन लिंदै वातावरणको बारेमा जान्ने कार्यक्रमहरु धेरै समाबेश छन्।

साथै, पुस्तक आदानप्रदान, नयाँ पुस्ताको सवारी साधन प्रदर्शनी र टेस्ट ड्राइभ साथै चाहेको सामान चाहेको जति मात्रा मात्र किन्ने " Hakari-uri-marushe " पनि आयोजना हुनेछ।

बदाम, कफी बीन्स आदि आवश्यक मात्रा मात्र लिई, तपाईले बोकेर जानु भएको आफ्नै झोला वा भाँडोमा प्याक गरेर घर लैजाने किनमेल शैली हो, जसले गर्दा अनावश्यक फोहर हुनबाट जोगाएर पर्यावरण मैत्रीका साथै अनावश्यक खर्च हुनबाट पनि बच्न सक्नुहुन्छ!

यो हप्ताको शनिबार र आइतवार, "Environmental Festival Fukuoka" मा आफ्नो वरपरको ECO (वातावरण)सँग नजिकिँदै आनन्द लिऔं!

यस वर्ष, स्थलगत(फेस-टु-फेस) इभेन्ट र अनलाइन इभेन्ट गरि दुवैमा आयोजना हुनेछन्।

हाल संचालित अनलाइन कार्यक्रममा, "वातावरण बारे जान्न चाहन्छु", "आफूहरुले गर्न सकिने कुराहरु बारे सोच्न चाहन्छु" भन्ने विचार भएका विद्यार्थी सदस्यहरूद्वारा स्थापित Fukuoka City SDGs Student Supporter ले वातावरणसँग सम्बन्धित विभिन्न जानकारीहरु प्रदान गर्दै आईरहेको छ।

अवश्य यो पनि हेर्नुहोला!

【शरदको फूल "गोदावरी"】

आज, शरदको फूल "गोदावरी"को बारे जानकारी लिएर आएकी छु।

गोदावरी फूल, जापानी भाषामा किकु, जुन राजपरिवारको प्रतीकको रूपमा पनि प्रयोग गरिंदै आएको, जापानलाई दर्शाउने फूलहरुमध्ये एक हो। पूर्ण शरद ऋतुमा लागेपछि वरपरका रूखका पातहरु रातो हुन थाल्दाको समयमा, गोदावरी फूलहरु पनि सुन्दर ढंगले फुल्ने गर्दछन्।

फुकुओका प्रिफेक्चर गोदावरी फूल उत्पादनको लागि जापानभरिमा तेस्रो स्थानमा पर्छ।

गोदावरी फूल फूल्ने अक्टोबरदेखि नोभेम्बरसम्म, फुकुओका भरिका बगैंचा र वनस्पति उद्यानहरू आदिमा किक्खाटेन अर्थात् गोदावरी फूल प्रदर्शनीहरू आयोजना गरिन्छ। Dazaifu Tenmangu मा, नोभेम्बर १ देखि नोभेम्बर २५ सम्म, त्यस्तै, Munakata Taisha मा, नोभेम्बर १ देखि नोभेम्बर २२ सम्म, पश्चिमी जापानको सबैभन्दा ठूलो स्तरको गोदावरी फूल प्रदर्शनी आयोजना हुन गईरहेको छ।

लगनशिलतासाथ सिचिएका गोदावरी फूलहरुको अवलोकन गर्न तपाईंहरु पनि प्रदर्शनीमा जाने होइन त?

 

 

【फुकुओका शहरको सूचना】

The Creators 2022 को परिचय

रचनात्मक र मनोरञ्जन अनुभव गर्न सकिने कार्यक्रम "The Creators 2022", अक्टोबर २२ (शनिबार) र अक्टोबर २३ (आइतबार), दुई दिन आयोजना हुन गईरहेको छ।

आयोजना स्थलहरुमा, फुकुओका सिटि हलको पश्चिम तर्फको Fureai Hiroba, Fukuoka City Science Museum र Fukuoka Art Museum आदि हुन्।

अनलाइन प्रसारण गर्ने योजना पनि भएकोले, कार्यक्रम स्थलमा उपस्थित हुन नसक्नेहरूले पनि यसको आनन्द लिन सक्नेछन्।

मुख्य स्थल फुकुओका सिटी हलको पश्चिम तर्फको Fureai Hiroba मा, चम्किलो प्रकाश र पर्दामा प्रत्यक्ष देखिने म्युजिक स्टेज, क्रिएटरहरु आदिसँगको कुराकानी मन्च, क्रिएटिभ कम्पनीहरुद्वारा ह्यान्ड-अन बुथहरू राखिने योजना रहेको छ।

यस बाहेक पनि, Fukuoka City Science Museum मा, ध्वनि र दृश्यमार्फत् मनोरञ्जन लिन सकिने डिजिटल कला प्रदर्शनी, Fukuoka Art Museum मा, विभिन्न प्रकारका भिडियो कार्यहरूको स्क्रीनिंग आदि जस्ता विभिन्न सामग्रीहरु समटेको दुई दिनको कार्यक्रम हो।

"क्रिएटिभ सिटी फुकुओका" मा नयाँ र नौलो संस्कृति र प्रविधिको अनुभव गर्दै अत्याधुनिक मनोरञ्जनको अनुभवको दुई दिनको आनन्द लिनुहोस्।

तपाईंहरु सबैको उपस्थितिको अपेक्षामा छौं।

https://the-creator.jp/