Life in Fukuoka "Nepali"

【AMAZING THAILAND FEST】

यसै हप्ताको शनिबार र आइतबार, अर्थात् ३० र ३१ तारिखका दिन फुकुओकामै बसेर थाइल्याण्डको भरपूर मजा लिन सकिने एउटा विशेष उत्सव 'अमेजिङ थाइल्याण्ड फेस्ट २०२६' (Amazing Thailand Fest 2026) आयोजना हुँदैछ।

दुई दिनसम्म चल्ने यस महोत्सवमा अत्यधिक लोकप्रिय थाई खाना, पेय पदार्थ, थाइल्याण्डका उत्पादनहरू, र विभिन्न सांस्कृतिक प्रस्तुतिहरू जस्ता धेरै रोचक कुराहरू समेटिएका छन्।

थाई परिकार र सामानहरू: 'फुड बुथ' मा ग्यापाओ राइस र प्याड थाई जस्ता प्रख्यात परिकार र स्वादिष्ट मिठाईहरू पाइनेछन्। साथै, 'प्रोडक्ट बुथ' मा थाइल्याण्डका परम्परागत पाइन्ट, घरायसी सामान र खाद्यान्नहरू पनि बिक्रीका लागि राखिनेछन्।

थप आकर्षणहरू:यहाँ फोटो खिच्ने ठाउँ, परम्परागत थाई मिठाई र फूलको माला बनाउने कार्यशाला (Workshops) का साथै 'थाई मसाज' को बुथ पनि रहनेछ। स्टेजमा T-POP, ज्याज संगीत, र थाइल्याण्डको परम्परागत लोक गायन 'मोराम' को लाइभ प्रस्तुतिले दिनभरि नै माहोल तताउनेछ। हवाई टिकट र आकर्षक उपहारहरू जित्न सकिने 'लक्की ड्र' मा सहभागी हुन पनि नभुल्नुहोला।

यो महोत्सव यसै शनिबार र आइतबार (३० र ३१ तारिख) बिहान १० बजेदेखि राति ८ बजेसम्म फुकुओकाको तेन्जिन चुओ पार्क - किहिनकान अगाडिको क्षेत्रमा आयोजना हुनेछ।

थाई संस्कृति र खाना मन पराउनेहरूका लागि यो एउटा छुटाउनै नहुने अवसर हो। फुर्सद मिलाएर अवश्य जानुहोला!

【Love Earth Cleanup】

के तपाईंलाई 'लभ अर्थ क्लिन-अप' अभियानको बारेमा थाहा छ? 

यो नागरिक, उद्योग र स्थानीय सरकार मिलेर समुद्री तट, नदी र पार्कहरू सफा गर्ने एउटा ठूलो वातावरण अभियान हो। यसले 'SDGs' का लक्ष्यहरू पूरा गर्न र समुद्रमा हुने प्लास्टिक फोहोर कम गर्न ठूलो मद्दत पुर्‍याउँछ।

यस वर्ष यो अभियान आगामीजुन १४ तारिख, आइतबारका दिन फुकुओका सहरका६ वटा मुख्य ठाउँहरूमा आयोजना हुँदैछ:

हिगाशी वार्डको 'उमिनो नाखामिची' समुद्री तट, हाकाता वार्डको 'फुजिता पार्क' वरपरको क्षेत्र, च्युओ वार्डको 'फुकुहामा' समुद्री तट, जोनान वार्डको 'माचुयामा' केन्द्रीय पार्क, सावारा वार्डको 'सीसाइड मोमोची' समुद्री पार्क वरपरको क्षेत्र त्यस्तै निशि वार्डको 'इमाजु नागाहामा' समुद्री तट।

यस अभियानमा जोसुकैले पनि भाग लिन सक्नुहुनेछ। सहभागी हुन चाहनेहरूले फुकुओका सहरको आधिकारिक वेबसाइटमा गएर विस्तृत विवरण हेरी आफ्नो नाम दर्ता गराउन सक्नुहुन्छ।

कार्यक्रमको दिन हल्का पानी परे पनि सरसफाइ जारी रहनेछ, तर ठूलो पानी परेमा कार्यक्रम रद्द हुनेछ। सहभागी हुँदा आ-आफ्नोपिउने पानी, टोपी, तौलिया र काम गर्दा लगाउने पन्जा आफैँले बोकेर आउनुहोला।

यसका साथै, फुकुओका सहरभित्र र बाहिरका अन्य विभिन्न ठाउँहरूमा पनि स्थानीय समुदाय र कम्पनीहरूले सरसफाइ कार्यक्रमहरू गर्दैछन्। समय मिल्छ भने आफ्नै क्षेत्रका कार्यक्रममा पनि सहभागी हुन सक्नुहुन्छ। आउनुहोस्, हामी सबै मिलेर फुकुओकाको सुन्दर प्रकृतिलाई जोगाऔँ!

【हाकाताजा・फुनानोरीकोमी】

हाकातामा गर्मीको सुरुवातसँगै मनाइने परम्परागत उत्सव 'फुनानोरिकोमी' यस वर्ष पनि आयोजना हुँदैछ।

यो एउटा यस्तो ऐतिहासिक परम्परा हो, जहाँ खाबुकी (जापानी परम्परागत नाटक) का कलाकारहरू कार्यक्रम हुने सहरमा आइपुगेको खुसीयालीमा सर्वसाधारणलाई दर्शन दिन नाउमा चढेर यात्रा गर्छन्। यो परम्परा इदो काल देखि चल्दै आएको हो।

हरेक वर्षको जुन महिनामा फुकुओकाको हाकाता वार्डमा रहेको 'हाकाताजा' रंगमञ्चमा क्युशुकै सबैभन्दा ठूलो खाबुकी नाटक "रोकुगाचु हाकाताजा ओओखाबुकी"आयोजना हुने गर्दछ। यसै नाटकका दिग्गज कलाकारहरू नाटक सुरु हुनुअघि हाकाता नदीमा नाउ चढेर यात्रा गर्छन् र नाटकको सफलताको कामना गर्दै नगरबासीहरूसामु आफूलाई प्रस्तुत गर्छन्।

उत्सवको दिन, कलाकारहरू र हाकाताका 'गेइगी' हरू चढेका कलात्मक नाउहरू 'सेइरियु पार्क' नजिकैबाट प्रस्थान गरी हाकाता नदीमा बिस्तारै अगाडि बढ्नेछन्। नदीको किनारबाट तपाईंले यो भव्य र रङ्गीचङ्गी परेडलाई निकै नजिकबाट हेर्न र आनन्द लिन सक्नुहुनेछ।

वास्तविक नाटक सुरु हुनुअघि नै काबुकीको एउटा छुट्टै रौनक महसुस गराउने यो 'फुनानोरिकोमी' उत्सव, हाकाताको निकै लोकप्रिय र भिडभाड हुने कार्यक्रम हो। यदि तपाईंले पनि यो उत्सव देख्नुभयो भने, नदी किनारबाट कलाकारहरूलाई ताली बजाएर हौसला दिन पक्कै नभुल्नुहोला!

【फुकुओका सिटी इन्टरनेशनल फाउण्डेसनको सूचना】

विदेशीहरुका लागि आप्रवासन, आवास र राष्ट्रियता सम्बन्धि परामर्श

आवासको स्थिति र आवास अवधिको बारेमा, केही कुरा नबुझ्नु भएको छ कि?

फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क परामर्शहरु प्रदान गर्दै आईरहेको छ। 

हरेक महिनाकोदोस्रो आइतबारको दिउँसो१ बजेदेखि ४ बजेसम्म, प्रसाशनिक वकिलद्वारा तपाईंहरुको प्रश्न र परामर्शको उचित सल्लाह दिनुहुन्छ।परामर्शका लागि इच्छुक महानुभावहरुले दिउँसो ३:३० सम्ममा काउण्टरमा सम्पर्क राख्नु होला।

अंग्रेजी, चाइनिज र जापानी भाषामा परामर्शका लागि अग्रिम बुकिंग गर्न आवश्यक छैन।

अन्य भाषाहरुमा परामर्शका लागि, २ हप्ता अगाडि सम्पर्क गर्नुहोला।

गोपनीयता कडा पालना गर्ने भएकोले ढुक्क भएर परामर्श लिनुहोस्।

विस्तृत जानकारीका लागि, फोन नम्बर (०१२०-६६-१७९९) मा सम्पर्क गर्नुहोला।

सोमबारदेखि शुक्रबार, बिहान ९ बजेदेखि बेलुका ५:३० बजेसम्म कल स्वीकार गरिन्छ।

 LINE कल मार्फत परामर्श लिन सकिन्छ!

फुकुओका सिटी इन्टरनेशनल फाउण्डेसनको LINE आधिकारिक Account बाट प्रत्यक्ष कल गरी जीवनयापनसँग सम्बन्धित परामर्श वा निःशुल्क परामर्शको लागि बुकिंग आदि गर्नका लागि सम्पर्क गर्न सक्नुहुन्छ। फोन अनुवाद सेवाबाट बहुभाषी सहयोग पनि उपलब्ध छ।

 थप रूपमा, फाउण्डेशनको कार्यक्रम र विदेशी बासिन्दाको लागि जानकारीहरू पनि प्राप्त गर्न सकिन्छ।

फुकुओका सिटी इन्टरनेशनल फाउण्डेसनको होमपेजबाट अवश्य पनि "Friend Add" गर्नुहोला। 

च्याट सेवा भने उपलब्ध छैन। लेखेर परामर्श गर्न चाहनुहुन्छ भने, फुकुओका सिटी इन्टरनेशनल फाउण्डेशनको होमपेजमा रहेको सम्पर्क फारम प्रयोग गर्नुहोस्।

【FUKUOKA MUSEUM WEEK】

मे १८ को 'अन्तर्राष्ट्रिय संग्रहालय दिवस' को अवसर पारेर फुकुओका सहरमा यसै शनिबार, मे १६ देखि 'फुकुओका म्युजियम विक' सुरु हुँदैछ। सहरलाई कला र संस्कृतिले भर्नका लागि आयोजना गरिएको यो महोत्सव यस वर्ष १७औँ पटक मनाइँदैछ।

यस पटक फुकुओका सहरका संग्रहालय र कला ग्यालरी गरी जम्मा १८ वटा ठाउँहरू यसमा सहभागी छन्। यस अवधिमा यात्रुहरूले प्रवेश शुल्कमा छुट, विशेष उपहार र विभिन्न रोचक कार्यक्रमहरूको फाइदा लिन सक्नेछन्। केही ठाउँहरूमा त प्रवेश पूर्ण रूपमा नि:शुल्क समेत गरिएको छ! साथै, विशेष प्रवचन, कार्यशाला र ग्यालरी टुर जस्ता रचनात्मक कार्यक्रमहरू पनि आयोजना हुनेछन्।

यदि तपाईं सधैँ संग्रहालय जाने गर्नुहुन्छ भने, यस पटक केही नयाँ अनुभव पाउनुहुनेछ। र यदि तपाईं अहिलेसम्म कहिल्यै जानुभएको छैन भने, यो कला र इतिहाससँग जोडिने एउटा राम्रो मौका हो।

यो महोत्सव यसै शनिबार, मे १६ देखि अर्को हप्ताको आइतबार, मे २४ सम्म गरी जम्मा ९ दिन चल्नेछ। विस्तृत जानकारीका लागि कृपया फुकुओका सहरको आधिकारिक वेबसाइट हेर्नुहोला।

【फुकुओका शहरको सूचना】

हलुकासवारीसाधनकर

जसले अप्रिल १ तारिखसम्म साना मोटरसाइकल (Moped) वा साना सवारी साधनहरू (Light Motor Vehicles) आफ्नो नाममा राख्नुभएको छ, उहाँहरूले 'सवारी साधन कर' तिर्नुपर्ने हुन्छ।

साना मोटरसाइकल (Moped) वा साना सवारी साधनहरू भएकाहरुलाई 'कर भुक्तानी सूचना' (Tax Notification) तपाईंको ठेगानामा हुलाकमार्फत पठाइनेछ। कृपया पत्र प्राप्त भएपछि त्यसलाई अनिवार्य रूपमा चेक गर्नुहोला।

 जुनको २ तारिक सम्ममा कोन्भिनी, बैंक वा हुलाक मार्फत तिर्नुहोला।

साथै, स्मार्टफोन एप वा क्रेडिट कार्डमार्फत पनि अनलाइन भुक्तानी गर्न सकिने सुविधा छ। 

यदि तपाईंले समयमै कर तिर्नुभएन भने, तपाईंको सम्पत्ति रोक्का हुन सक्छ। साथै, भिसा थप्ने समयमा यसले नकारात्मक असर पार्न सक्ने सम्भावना रहन्छ।

यदि तपाईंलाई केही कुरा बुझ्न गाह्रो भएको छ वा कर तिर्न समस्या छ भने, कृपया आफ्नो नजिकैको वार्ड कार्यालयमा सम्पर्क गर्नुहोस्। फोनमार्फत२३ वटा विभिन्न भाषाहरूमापरामर्श लिन सकिने व्यवस्था पनि गरिएको छ। 

फोन नम्बर, ०९२-७५३-६११३ ।

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड कार्यालयमा सम्पर्क हुनेछ।

तपाईंले कुरा गर्ने भाषा, बस्ने वार्ड अनि करबारे तपाईंले बुझ्न चाहेको कुरा भन्नुहोला।

【गोकोकु जिन्ज्या - 'नोमिनोइची'】

फुकुओकाको रोप्पोन्माचुस्थित 'गोकोकु जिन्ज्या' मा फेरि एकपटक 'नोमिनोइची' अर्थात् एउटा ठूलो बजार लाग्दैछ। यस पटक यो मेला आगामी मे १६ र १७ तारिख (शनिबार र आइतबार) आयोजना हुनेछ। बिहान ९ बजेदेखि बेलुका ४ बजेसम्म चल्ने यो कार्यक्रम पानी परे पनि रोकिने छैन।

क्युशुका विभिन्न ठाउँबाट आएका करिब २५० पसलहरू यस मेलामा सहभागी हुनेछन्। यहाँ तपाईंले पुराना र दुर्लभ एन्टिक सामानहरू, भाँडाकुँडा, लत्ताकपडा र हातले बनाएका सामाग्रीहरू पाउन सक्नुहुन्छ। पसलका साहुजीहरूसँग कुराकानी गर्दै आफ्नो मनपर्ने सामान छान्नु यस मेलाको मुख्य विशेषता हो।

सामानका साथै यहाँ स्वादिला खाना र पेय पदार्थका स्टलहरू पनि रहनेछन्। शान्त वातावरणमा टहलिँदै र खाजा खाँदै यो मेलाको आनन्द लिन सकिन्छ। केही नयाँ र अनौठा सामानको खोजीमा हुनुहुन्छ भने यो हप्ताको अन्त्यमा गोकोकु जिन्ज्या पक्कै जानुहोला।

फुकुओका र क्युशुका विभिन्न ठाउँबाट आउने मानिसहरूको भिड र रमाइलो माहोलका साथ, यस कार्यक्रममा सहभागी भई आफ्नो सप्ताहन्त अझ विशेष बनाएर हेर्दा कसो होला♪

【फुकुओका शहरको सूचना】

“साइकलका लागि निलो चिट" नियम

जापानमा साइकललाई पनि 'सवारी साधन' मानिन्छ, त्यसैले ट्राफिक नियम पालना गर्नु अनिवार्य छ।सन् २०२६ अप्रिलदेखि साइकलको ट्राफिक नियम उल्लंघन गर्ने१६ वर्षभन्दा माथिकाव्यक्तिहरूलाई जरिवाना सहितको“निलो चिट” काटिनेछ।

यस अन्तर्गत ११३ प्रकारका गल्तीहरू समेटिएका छन्। विशेषगरी यी कार्यहरू नगर्नुहोस्:

• ट्राफिक संकेत उल्लङ्घनगर्नु

• मोबाइल फोन चलाउँदै सवारी चलाउनु

• राती लाइट नबाली चलाउनु

• सडकको गलत दिशामा चलाउनु

• फुटपाथमा तीव्र गतिमा चलाउनु

• समानान्तर रूपमा चलाउनु

• इयरफोन वा हेडफोन प्रयोग गर्नु

• छाता समातेर साइकल चलाउनु

• सडकको दाहिने पट्टि सवारी चलाउनु

• प्रवेश निषेध क्षेत्रमा पस्नु

• अनिवार्य रूपमा रोकिनुपर्ने ठाउँमा नरोकिनु।