अन्य(その他)

2021.05.13[Thu] 09:00

जापानी भाषा(日本語) , अन्य(その他)

【Satsuki-bare】

तपाईंहरुले कहिल्यै Satsuki-bare शब्द सुन्नुभएको छ?

Satsuki-bare भन्नाले तपाईंहरुले मेको स्फूर्तिदायी मौसमको कल्पना गर्न सक्नुहुन्छ।

ताजा हरियाली भई, न जाडो न गर्मी, आर्द्रता पनि नभई, बस्न सहज, घमाइलो दिन।

यद्यपि यो वास्तविक अर्थ नभई, लुनार क्यालेन्डरमा मे महिना वर्षायामको समय भएको, र Satsuki-bare भन्नाले, वर्षायामको घमाइलो दिनलाई जनाउँदछ।

फरक अर्थ लाग्ने चीजहरू क्रमिक रुपमा स्थापना हुनु असामान्य कुरा नभई,  अब जापानी शब्दकोशमा दुवै अर्थहरू राखिएका छन्।

 

【इलेक्ट्रोनिक पुस्तकालय खोल्ने सम्बन्धि】

〇फुकुओका सिटि सार्वजनिक पुस्तकालयले इलेक्ट्रोनिक पुस्तकहरू सापटमा दिन शुरू गरेको छ।

इलेक्ट्रोनिक पुस्तकहरू, पुस्तकालयमा नगईकन पनि, कम्प्युटर वा ट्याब्लेट, स्मार्टफोन, इत्यादिबाट अनलाइनमा पुस्तकहरू सित्तैमा सापटी लिएर पढ्न मिल्ने सेवासुबिधा हो।

उपन्यास, इतिहास, स्वास्थ्य, परिकार आदि सम्बन्धि चित्र किताबहरू, लगभग ७,००० वटा जति पुस्तकहरू सापट लिन सक्नुहुन्छ।

केही पुस्तकहरु शब्द वाचन सुबिधा भएका तथा केही पुस्तकहरु ठूलो अक्षरमा पढ्न सकिने पनि छन्।

यस सुबिधाको प्रयोगकर्ताहरु भन्नाले, शहरभित्र बसोबास गर्ने, साथै शहरभित्र काम गर्ने वा स्कूल जानेहरु पर्दछन् र यसलाई प्रयोग गर्नका लागि "फुकुओका सिटि सार्वजनिक पुस्तकालय सापटी कार्ड" चाहिन्छ।

कार्ड नभएका, म्याद सकिएका, वा शहर बाहिरबाट काम गर्ने वा स्कूल जानेहरुले, कृपया फुकुओका सिटी सार्वजनिक पुस्तकालय वा प्रत्येक वार्डको शाखा पुस्तकालय, AMIKAS पुस्तकालयमा दर्ता गर्नुहोस्।

२ हप्तामा ३ वटा पुस्तकहरू सापट लिन सक्नुहुन्छ। यो म्याद सकेपछि स्वचालित रूपमा फिर्ता हुनेछ।

सामान्य जापानी भाषाको चित्र पुस्तक र अंग्रेजीको पुस्तकहरू पनि भएकोले, जापानी भाषा पढ्दै हुने महानुभाव वा विदेशी भाषाका पुस्तकहरू पढ्न चाहनुहुने महानुभावहरुले अवश्य प्रयोग गरेर हेर्नु होला।

 

【खोपका लागि शंकास्पद कलहरूबाट सावधान हुनुहोस्】

नयाँ कोरोना भाइरस खोपका लागि आवश्यक छ भन्दै, पैसा र व्यक्तिगत जानकारी लिई ठग्ने हेतुले आउने टेलिफोन कल सम्बन्धि परामर्श, उपभोक्ता मामिला विभागमा पठाईने गरिएको छ।

"कोरोना भाइरस खोप लिन सकिन्छ। पछि पैसा फिर्ता हुनेभएकोले, कृपया पैसा ट्रान्सफर गर्नुहोस्।" भनेर आफूलाई स्वास्थ्य केन्द्र भनि आउने फोन वा "नि:शुल्क कोरोना भाइरस खोप लिन सकिने" भनेर व्यक्तिगत जानकारीको लागि सोध्ने संदिग्ध कल आएको पाईन्छ।

नगरपालिकाहरूले खोपका लागि फोन वा ईमेल मार्फत् पैसा वा व्यक्तिगत जानकारीको लागि अनुरोध गर्दैनन्।

खोप निःशुल्क हो। साथै, तपाईले नगरपालिकाबाट हुलाक मार्फत् "खोपको सूचना" प्राप्त गर्नुहुनेछ।

कृपया शंकास्पद फोन कल र ईमेलप्रति सावधान रहनुहोस्।

2021.05.06[Thu] 09:00

जापानी भाषा(日本語) , अन्य(その他)

【मातृ दिवस】

मेको दोस्रो आइतवार "मातृ दिवस" । मातृ दिवस अमेरिकामा शुरू भएको पर्ब मानिन्छ।

गृहयुद्धको क्रममा, Ann Jarvis नाम गरेकी एउटी आइमाईले, विद्रोही र समर्थक केही विचार नगरी, घाइते सेनाहरूको सरसफाईमा सुधार गर्नका लागि "Mother's Day Work Club" को स्थापना गरेका थिए। उनको मृत्यु भएको दुई बर्ष पछि, उनकी छोरीले आफ्नी आमाको लागि स्मारक र्याली निकाली Ann लाई मन पर्ने सेतो कार्नेशन फूल वितरण गरेका थिए।

जापानमा पनि सन् १९१५ देखि मातृ दिवस फैलियो।

रातो कार्नेशन "आमालाई माया" र "आमाको माया", सेतो कार्नेशन "मृत आमालाई सम्झना" जस्ता फूलका शब्दहरू छन्।

हामी नेपालीहरुको आमाको मुख हेर्ने दिन, आउने मंगलबार परेको छ I तपाईंहरुले पनि त्यस दिन आफ्नो आमालाई फोन गर्नुहुन्छ होला I विदेशमा भए पनि, आजकल भिडियो कलको सुबिधा भएकोले आमाको मुख हेरेर कुरा गर्न सजिलो, अनि रमाइलो भएको छ नि है !

 

【Japanese Chatting Event・प्रसाशनिक वकिलद्वारा परामर्शको सूचना】

फुकुओका सिटी इन्टरनेशनल फाउण्डेसनको सूचना रहेको छ।

〇 फुकुओकामा अध्ययन गरिरहेका अन्तर्राष्ट्रिय विद्यार्थीहरू,

के तपाईंहरुलाई हरेक महिनाको एक पटक आयोजना हुने " Japanese Chatting Event "को बारेमा थाहा छ?

Zoom प्रयोग गरेर, विदेशी विद्यार्थीहरू र जापानी स्वयंसेवकहरू बिच प्रत्यक्ष वान् टु वान्, साथै सानो समूहहरूमा मनपर्ने विषयवस्तुहरूमा छलफल गरिन्छ । हरेक दिन, स्कूलमा सिकेको जापानी भाषा प्रयोग गर्न चाहनुहुने वा जापानीहरूसँग कुराकानी गर्न चाहनुहुने महानुभावहरु, अवश्य पनि सहभागी हुनुहोला। सहभागिता शुल्क नि:शुल्क हो।

 

〇 आवासको स्थिति र आवास अवधिको बारेमा, तपाईले केही कुरा नबुझेको छ कि?

फुकुओका सिटी इन्टरनेशनल सेन्टरमा हरेक महिनाको दोस्रो आइतवार, दिउँसो प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ।

परामर्श गोप्य राखिने भएकाले, यसलाई प्रयोग गर्न नहिचकिचाउनुहोस्।

बैठक र परामर्शको समय तथा बुकिंगको बारेमा अधिक जानकारीको लागि, कृपया फुकुओका सिटी इन्टरनेशनल फाउण्डेसनको होमपेज वा फोन नम्बर ०९२-२६२-१७९९ मा सम्पर्क राख्नुहोला।

 

【निहोंगो Class Map को बारेमा】

फुकुओका शहरमा, स्वयंसेवक शिक्षकहरूले सिकाउने जापानी भाषा कक्षाहरू धेरै छन्।

प्रत्येक कक्षाको स्तर, सहभागिता शुल्क, सामग्री आदि जानकारी "निहोंगो Class Map" मा प्रदान गरिएको छ।

प्राथमिक कक्षाहरुमा बिस्तारै अध्ययन गर्ने, खान्जीको अभ्यास गर्ने कक्षाहरु पनि छन् , जापानी संस्कृति सिक्ने र जापानी भाषा पढ्दै रमाईलो संस्कृति आदानप्रदान गर्ने कक्षाहरु पनि छन्।

"फुकुओका सिटि निहोंगो Class Map" मा हेरेर, नजिकको जापानी भाषा कक्षा खोजी हेर्नुहोला।

2021.04.22[Thu] 09:00

समुदाय(コミュニティ) , अन्य(その他) , बालबच्चा तथा शिशु हुर्काई(子ども・子育て)

【Golden Week बिदा】

जापानमा अप्रिल महिनाको अन्तदेखि मेको शुरुवातसम्म धेरै बिदाहरू हुने अवधिलाई Golden Week भनिन्छ।

सामान्यतया Golden Week मा जापानको विभिन्न भागमा विभिन्न चाडपर्व र कार्यक्रमहरू आयोजना गरिन्छ, तर गत बर्षदेखि नयाँ कोरोनाभाइरसको प्रभावका कारण, प्रायः जसो कार्यक्रमहरू रद्द गरिएको वा कम गरिएको छ।

यस बर्ष अनलाइन कार्यक्रम र यात्राको मज्जा लिने मानिसहरू धेरै होलान्।

अप्रिल २९ (Showa दिवस) को बिदादेखि, २०२१ को Golden Week शुरु हुनेछ।

तपाईंहरु कसरी बिदा मनाउनुहुन्छ?

घरमा आराम गर्नु पनि राम्रै हुन्छ, वा नजिकको पर्यटन स्थलमा जानु कस्तो होला?

 

【विदेशीहरुलाई सहयोगको लागि विदेशी समर्थन स्वयंसेवक बैंक को परिचय】

फुकुओका सिटी इन्टरनेशनल फाउण्डेसनमा, अप्रिलदेखि “विदेशीहरुलाई सहयोगको लागि विदेशी समर्थन स्वयंसेवक बैंक” शुरु गर्ने भएको छ। यो, आफ्नो भाषा सीप प्रयोग गरेर, फुकुओका शहरमा बसोबास गर्ने विदेशीहरूलाई सहयोग गर्न चाहने व्यक्तिहरुले, "दोभाषे वा अनुवाद", “सहयोग आदानप्रदान”, “विपदको बेलामा विदेशीहरूलाई सहायता”, आदि जस्ता क्षेत्रहरूमा स्वयंसेवकको रूपमा दर्ता गरि, बिभिन्न परिस्थितिहरुमा सक्रिय सहभागीताको लागि हो।

 

हाल, यस स्वयंसेवकको लागि दर्ता गर्ने व्यक्तिहरूको खोजीमा छौं।

विशेष रूपमा, “विदेशीका लागि प्रशासनिक वकिलद्वारा परामर्श" मा दोभाषे तथा पोस्टर अनुवाद गर्न, जस्ता अन्य, जापानी नबुझ्नेहरूका लागि अनलाइन सहयोग, सार्वजनिक हलहरूमा आयोजना हुने विदेशीहरूसँगको अन्तर्राष्ट्रिय अन्तर्क्रिया, गर्मी महिनाको इभेन्टको योजना र ब्यबस्थाका लागि सहयोग, विपदको बेला दोभाषे भई सहयोग तथा प्रकोप रोकथाम अभ्यासको लागी दोभाषे र अनुवाद आदि गतिविधिहरूको योजना गरिरहेका छौं।

 

  • फुकुओका महानगर क्षेत्रमा बसोबास गर्ने १८ बर्ष वा बढी उमेर भएको
  • जापानी र विदेशी भाषामा दैनिक कुराकानी भन्दा बढी भाषा सीप भएको
  • स्वयंसेवकको रूपमा काम गर्ने समय भएको व्यक्ति भएमा, राष्ट्रियताले फरक पर्दैन।

 

 

भाषा सीप को उपयोग गर्न चाहनु हुने, अन्तर्राष्ट्रिय अन्तर्क्रियामा सहयोगी बन्न चाहनु हुने सबै महानुभावहरु; तपाईंहरुको सक्रिय गतिविधिले जापानी र विदेशीहरू बीचको आपसी समझ र अन्तर्राष्ट्रिय अन्तर्क्रियालाई प्रबर्धन गरि, ढुक्क र सुरक्षित जीवनका लागि टेवा मिल्दछ।

इच्छुक हुने महानुभावहरुले, फुकुओका सिटी इन्टरनेशनल फाउण्डेसनको होमपेज हेनुहोला वा फोन मार्फत् सम्पर्क गर्नुहोला। हामी तपाईंहरुको दर्ताका लागि पर्खिरहेका छौं!

 

अबको सूचना, जापानी भाषा खासै नबुझ्ने, स्कूलको पत्रहरू बुझ्न समस्या भईरहेका विदेशीहरूको लागि रहेको छ!

फुकुओका सिटी इन्टरनेशनल फाउण्डेसनमा, विदेशीहरूका लागि भाषा सहयोग कार्यक्रम, "ट्यूटर प्रोग्राम" शुरु गरेको छ।  "ट्यूटर प्रोग्राम" मा, स्वयंसेवकहरु प्रत्यक्ष वान् टु वान् ट्यूटर बन्न सक्नुहुन्छ, र ट्यूटरलाई अनलाइनमा पत्रहरू आदिको सरल अनुवादका लागि अनुरोध र दैनिक जीवन सम्बन्धि सल्लाह माग्न सक्नुहुन्छ।

ट्यूटरसँग अनलाइन कुराकानी गर्न सक्ने, फुकुओका शहरमा बस्नु हुने विदेशी महानुभावहरु, जो कोहीले पनि यसको प्रयोग गर्न सक्नुहुन्छ।

बिस्तृत जानकारीका लागि, कृपया फुकुओका सिटी इन्टरनेशनल फाउण्डेसनको होमपेजमा हेर्नुहोला वा फोन मार्फत् हामीलाई सम्पर्क गर्नुहोला।

 

फुकुओका सिटी इन्टरनेशनल फाउण्डेसनको फोन नम्बर ०९२-२६२-१७९९ होI खुल्ने समय, सोमबारदेखि शुक्रबार, बिहान पौने ९ देखि बेलुका ६ बजेसम्मI अवश्य पनि हामीलाई सम्पर्क गर्नुहोलाI

2021.04.01[Thu] 09:00

अन्य(その他)

अप्रिल २०२० मा शुरू भएको Life in Fukuoka कार्यक्रम, तपाईंहरुले सुन्दै आउनुभएको छ कि छैन? यस कार्यक्रममा, हरेक हप्ता विभिन्न बिषय र फुकुओका शहरबाट जारी जानकारीहरु प्रदान गर्ने गरेकाछौँ। जस्तै कि, फुकुओका शहरमा ५०० येनमा खाजा, जापानमा पकाउन सकिने नेपाली खाना, जापानमा हुने बिदाहरू र मौसमी कार्यक्रमहरू, त्यस्तै, महिनामा एक पटक, फुकुओकामा बस्दै आउनुभएका नेपाली अग्रजहरु तथा साथीहरूसँग स्टुडियोमा वा फोन मार्फत रमाईलो कुराकानी आदि। यसले तपाईंहरुलाई मद्दत गर्‍यो कि गरेन? थोरै भए पनि मद्दत गर्‍यो नै होला भन्ने आशा राख्दछु।
अन्तर्वार्ता मार्फत् हामीले बिभिन्न पाहुनाहरुका अनुभव, विचार र सुझाव पायौं, जुन पक्कै पनि रोचक र सहयोगी छन्, विशेष गरि निहोंगो गाक्कोमा अध्यनरत विद्यार्थीहरुका लागि। त्यस्तै, फुकुओकामा विदेशीहरुलाई समस्या भईरहेको जुनसुकै बिषयमा पनि परामर्श लिनका लागि सम्पर्क निकाय र सम्बन्धित सम्पर्क फोन नम्बर आदिको बारेमा यस कार्यक्रममा जानकारी गराउँदै आईरहेका छौँ। कार्यक्रमको अन्तमा नेपाली गीत पनि बजाउने गरेका छौँ। त्यसैले, यस कार्यक्रममा महत्वपूर्ण सुचना तथा जानकारी प्रदान गर्ने मात्र नभई, जापान र नेपालको संस्कृतिलाई परिचय गराउने माध्यम पनि बनेको छI
गएको सालदेखि, नयाँ कोरोनाभाइरसको प्रभावले हाम्रो दैनिक जीवनमा परिवर्तन ल्याएको छ।
मास्क लगाउने र तीन कुरा बन्दबाट टाढा रहनु, अब पक्कै पनि कुनै नौलो विषय होइन।
हरेक व्यक्तिले नयाँ जीवनशैलीलाई आत्मसात गरि, अगाडि बढौं।

2021.03.18[Thu] 09:00

आवास(住宅) , अन्य(その他) , प्राकृतिक प्रकोप(災害)

【प्रोफेशनल बेसबल】

तपाईंहरुले कहिल्यै जापानी प्रोफेशनल बेसबल हेर्नु भएको छ?

प्रोफेशनल बेसबल जापानमा धेरै लोकप्रिय खेल हो। १२ टोलीहरू सेन्ट्रल लिग र प्यासिफिक लिगमा विभाजित भई, जितको लागि प्रतिस्पर्धा गर्छन्। पहिले त, लिगमा पहिलो स्थानको लागि लक्ष्य राखिन्छ, र अन्तत दुई लिगमा पहिलो स्थान पाउनेले जापानको सर्वश्रेष्ठ उपाधि पाउँछ।

फुकुओका शहर, प्यासिफिक लिगमा आबद्ध भई Fukuoka SoftBank Hawks को मुख्य आधार हो।

पक्कै पनि स्टेडियम चाहिं, Fukuoka PayPay Dome!

Hawks, पाँच बर्ष लगातार जापानमा सर्वश्रेष्ठ बन्ने दृढता बोकेको बलियो टीम हो।

२०२१ मार्च २६ (शुक्रवार) देखि प्रोफेशनल बेसबल शुरु हुँदैछ। यदि मौका मिलेमा, पक्कै पनि प्रत्यक्ष प्रोफेशनल बेसबल हेर्नुहोला!

 

 

【नागरिक विपद् रोकथाम दिवस】

फुकुओका शहरमा, सन् २००५ मार्च २० मा गएको फुकुओका प्रान्त पश्चिम अपतटीय भूकम्पको अनुभवलाई नबिर्सन मार्च २० लाई "नागरिक विपद् रोकथाम दिवस" को रूपमा तोकिएको छ।

विपद् कहिले आउँछ भनेर थाहा हुँदैन।

विपद् आईपर्दा, प्रत्येक व्यक्तिले उचित कार्य अपनाउनका लागि, दैनिक आधारमा तयारी गर्न महत्त्वपूर्ण छ।

फुकुओका शहरको वेबसाइटबाट Hazard Map वा विपद् सम्बन्धि जानकारी लिने, आश्रय लिने स्थानमा जाँदा लिएर जानुपर्ने सामान पहिलेदेखि तयारी र जाँच गरि राख्ने गर्नुहोस्।

Support for Foreign Residents भनि खोज्नु भएमा, विदेशीहरूका लागि विपद् रोकथाम जानकारी देख्न सक्नुहुन्छ।

नियमित रुपमा महत्वपूर्ण जानकारी संकलन गर्ने गर्नुहोस्।

"नागरिक विपद् रोकथाम दिवस" ​​को अवसरमा, आफू, आफ्नो परिवार र समुदायको सुरक्षाको लागि विपद् रोकथामको बारेमा सोचौं।

 

 

【बिदाको दिनमा खुल्ने बारे】

मार्च र अप्रिलमा बसाईसराई धेरै हुने भई, वार्ड अफिसको काउन्टरमा भीड हुने समय हो।

त्यसकारण, सप्ताहका दिनहरूमा व्यस्त भई प्रकियाका लागि जान नसकेका महानुभावहरुले, बिदाको दिनमा बसाईसराई प्रकिया गर्न सकिने गरि मार्च २८ र अप्रिल ४ आईतबार, वार्ड कार्यालय र शाखा कार्यालयका काउन्टरहरू खोलिनेछन्।

बिहान १० देखि दिउँसो २ बजे सम्म, भित्र बसाई, बाहिर सराई र बसाईसराई सम्बन्धि सूचना स्वीकार गर्नेछौं।

 

 

【कोरोना भाइरस संक्रमण रोकथामका लागि अनुरोध】

कोरोनाभाइरस संक्रमणको सम्बन्धमा, प्रत्येक व्यक्तिले संक्रमण रोकथामका आधारभूत उपायहरू अपनाउन हुन विनम्र अनुरोध गर्दछौंI मास्क लगाउने, हात धुने, राम्ररी मुख कुल्ला गर्ने, साथै सान्मिचु (तीन कुरा बन्द) बाट टाढा रहौं। ३ कुराहरु भन्नाले, हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, कसैसँग पनि सम्पर्कमा आउँदा वा कुराकानी गर्दा दूरी बनाएर बस्ने होI 

2020.12.03[Thu] 09:00

अन्य(その他) , नियम तथा आचरण(ルール・マナー)

【“ओसेइबो” को परिचय】

“ओसेइबो” भन्नाले आभार भएका व्यक्तिहरु प्रति वर्षको अन्त्यमा धन्यवाद ज्ञापन स्वरुप खानेकुरा र पेयपदार्थ आदि जस्ता उपहारहरू दिने परम्परा छ।

यसको शुरुवात इडो कालमा भई, हरेक बर्षको अन्त्यमा, व्यापारीहरूले घरमालिक वा व्यापार साझेदारहरूलाई, “म सँधै तपाईंप्रति आभारी छु। यसपछि पनि निरन्तर सहयोगको अपेक्षा राख्दछु ” भन्ने अर्थबाट धन्यवाद स्वरुप उपहार दिने शुरुवात भएको मानिन्छ।

ओसेइबो सामान्यतया, डिसेम्बरको शुरुदेखि २५ तारिखको केही दिन अगाडि वा पछाडि सम्म दिने चलन छ। क्युशु क्षेत्रमा धेरैले डिसेम्बर १० देखि २० सम्म दिने गरेको देखिन्छ।

तपाईं पनि यस वर्ष, जापानको परम्परा अनुसार, आफुलाई सँधै सहयोग गर्ने व्यक्तिहरुलाई केही उपहार दिनु हुन्छ कि?  

 

【विश्व मानव अधिकार दिवस र मानव अधिकार सप्ताहको बारेमा】

"मानव अधिकार" भनेको हरेक व्यक्ति जन्मेदेखि उसले "मानव जस्तो जीवन जीउन" पाउनेको अधिकार हो।

डिसेम्बर १० "विश्व मानव अधिकार दिवस" ​​हो, जुन जापानमा मात्र होइन, विश्वको विभिन्न भागहरुमा पनि "मानव अधिकार" को बारेमा सोच्ने दिनको रुपमा रही आएको छ।

डिसेम्बर ४ देखि १० सम्म "मानव अधिकार सप्ताह" को अवसरमा, फुकुओका शहरमा पनि, मानव अधिकारको सम्मान गरि, भेदभाव रहित आरामदायी फुकुओका शहरको उद्देश्यले “मानव अधिकार सम्मान सप्ताह” आयोजना गरिंदै आईरहेको छI

हरेक व्यक्ति आफू जस्तै स्वाभिमानी हुन्छI

प्रत्येक व्यक्ति स्वावलम्बी छ भन्ने कुरा अनुभूति दिलाने यो महत्त्वपूर्ण हप्ता हो।

महिला, बालबालिका, वृद्ध, विदेशी, अशक्त, आदिको आधारमा भेदभाव र पूर्वाग्रह हटाएर, एक अर्काको मानव अधिकारको सम्मान गरौं।

तपाईंहरु पनि "दयालु हृदय" र "स्वाभिमानी जीवन"को बारेमा फेरि एकपटक सोचेर हेर्दा कस्तो होला?

 

【फोहरको अवैध डम्पिंग】

जंगल, समुद्रीतट, नदी, सडक, पार्क आदिमा ठूलो आकारका फोहर वा घरको फोहर फाल्नेलाई अवैध डम्पिंग भनिन्छ।

फुकुओका शहरमा, बर्षको अन्त्यमा सरसफाईको कारण फोहरको मात्रा बढ्ने डिसेम्बरमा, “अवैध डम्पिंग रोकथाम सुदृढीकरण महिना" को रूपमा, अवैध फोहर फाल्न रोक्नका लागि गतिविधिहरू थप सुदृढ गरिनेछ।

फुकुओका शहरले पुलिसको सहयोगमा, धेरै अवैध फोहर फाल्ने स्थानहरुमा, निगरानी क्यामेरा वा चेताउनी संकेतहरू राख्ने र गस्तीहरू सञ्चालन गरिंदै आईरहेको छ।

टिभी, फ्रिज, फ्रिजर, वाशिंग मेशिन, कपडा ड्रायर, र एयर कन्डिशनरहरू घरायसी सामान प्रशोधन कानुन बमोजिम फोहर फाल्ने विधि तोकिएको छ। नयाँ जडान गर्ने बेला लगिदिनुहुन्छ कि भनेर खरिद गरेको पसल वा फुकुओका शहरभित्रको Best Denki वा Yamada Denki मा सोध्नुहोला। रिसाइकल शुल्क, संकलन र यातायात शुल्क आवश्यक पर्छ। “अनावश्यक सामानहरू सस्तोमा संकलन गरिदिन्छौं” भनि विज्ञापन गर्नेहरुले, फुकुओका शहरको अनुमति बिना अवैध रूपमा संकलन गर्ने ठेकेदार हुन्। अनुमति प्राप्त नभएका ठेकेदार, अवैध डम्पिंग वा अनुचित प्रशोधन गर्ने, अधिक शुल्क लिने जस्ता समस्याहरू निम्त्याउने हुनाले कृपया यसको प्रयोग नगर्नुहोस्।

 

【कोरोना भाइरस संक्रमण रोकथामका लागि अनुरोध】

आजकल, कोरोना भाइरस संक्रमण बिरूद्ध कदम चाले पछि, मानिसहरुको सम्पर्कमा आउने गतिबिधि अलि बढेर आएको छ, तर अबबाट क्रिसमस, नयाँ वर्ष पूर्वसंध्या, र नयाँ वर्ष जस्ता मौसमी कार्यक्रमहरूमा भेला हुने अवसरहरू बढ्नेछन्। मास्क लगाउने, हात धुने, राम्ररी मुख कुल्ला गर्ने, साथै सान्मिचु (तीन कुरा बन्द) बाट टाढा रहौं। ३ कुराहरु भन्नाले, हावा आवतजावत कम हुने बन्द कोठामा नबस्ने, भीडभांडका ठाउँहरूमा नजाने, कसैसँग पनि सम्पर्कमा आउँदा वा कुराकानी गर्दा दूरी बनाएर बस्ने होI प्रत्येक व्यक्तिले, आधारभूत संक्रमण रोकथामका उपायहरू अपनाउन हुन विनम्र अनुरोध गर्दछौंI

2020.10.01[Thu] 09:00

अन्य(その他)

【“मध्य शरदको चन्द्रमाको” परिचय】

आजकलको मौसम, बिहान-बेलुका धेरै सजिलो भएर आएको छ।

यो वर्षको ‘च्युउस्युउ नो मेईगेचु’ अर्थात् ‘मध्य शरदको चन्द्रमा’, आज अक्टुबर १ बिहिबारमा देखा पर्नेछ। 

 

‘च्युउस्युउ नो मेईगेचु’ भनेको चन्द्रमामा आधारित क्यालेन्डर अनुसार, अगस्त १५ को पूर्णिमा हो।

बर्षभरिमा, सबैभन्दा सुन्दर चन्द्रमाको रुपमा मानिने, जापानमा परापूर्वकालदेखि यसलाई हेर्ने परम्परा छ, र यस दिनलाई ‘ओचुकिमि’ अर्थात् ‘चन्द्रमा हेर्ने दिन’ भनिन्छI गर्मी समाप्त भई, जाडोको शुरु हुने यस समयमा, पूर्णिमाको रातको आनन्द लिनु भनेको एक किसिमको, जापानको शरद ऋतुको परम्परा हो।

 

जापानिज मिठाई ‘डान्गो’ र ‘सुसुकि’ भन्ने घाँसले सजाएर, शरद फसलको लागि धन्यवाद दिने र राम्रो बालीनालीको लागि प्राथर्ना गर्ने चलन छ।

१५ रातको चन्द्रमा भएकोले, यस दिनमा १५ वटा ‘डान्गोहरु’ चढाउने, अनि सामान्यतयाः पिरामिडको आकारमा सजाउने चलन छ। त्यस्तै, ‘सुसुकि’ लाई चामलको रुपमा सँगै सजाईने पनि गरिन्छ।

 

साथै जापानमा, चन्द्रमाको छाँया हेर्दा, खरायोले मोची बनाएको जस्तो देखिन्छ रे, त्यसैले चन्द्रमामा खरायो छ भन्ने किम्बदन्ती पनि छI

 

【फुकुओका शहरले जारी गरेको जानकारीमुलक सूचना】

“राष्ट्रिय जनगणनाको फारम भर्ने बारे”

जापानमा, यस वर्ष राष्ट्रिय जनगणना गर्ने भएको छ।

राष्ट्रिय जनगणना भनेको, प्रत्येक पाँच बर्षमा एक पटक, जापानमा बसोवास गर्ने सबै व्यक्ति र घरपरिवारहरुको जीवनस्तरको सर्वेक्षण हो। विदेशीहरू पनि यस सर्वेक्षणमा पर्दछन्।

सर्वेक्षणमा, जन्म मिति, पेशा, काम गर्ने ठाउँ वा स्कूल, बस्दै गर्नु भएको घर आदि १६ वटा बिषयहरु छन्।

सेप्टेम्बर १४ देखि, सर्वेक्षणकर्ताहरूले सबैको परिवारहरूको घर भ्रमण गरि, सर्वेक्षण कागजातहरू वितरण गरिरहेको छ।

स्मार्टफोन वा कम्प्युटरबाट सजिलै र सहज उत्तर दिन सकिने भएकोले, इन्टरनेट मार्फत भरिदिन हुन अनुरोध गर्दछौंI

इन्टरनेटमा लगइन गर्दा, कागजातमा लेखिएको लगइन आईडी र Access key प्रयोग गर्नुहोस्।

चौबीसै घण्टा,  जापानी, अंग्रेजी, चाइनिज, कोरियाली, भियतनामी, पोर्तुगिज, र स्पेनिशमा उत्तर दिन सक्नुहुन्छ।

यदि इन्टरनेट मार्फत भर्न गाह्रो छ भने, सर्वेक्षणको फारम भरेर पोस्ट गरेर पठाउनुहोस्।

कृपया अक्टोबर ७ सम्ममा भरिदिन हुन अनुरोध गर्दछौँI

 

“सम्पर्क पत्ता लगाउने app -COCOA को प्रयोगको बारेमा”

जापानले कोरोना भाईरस सम्पर्क पत्ता लगाउने COCOA(कोकोआ) नामको app बनाएको छ। यदि तपाईं भाईरस संक्रमित व्यक्तिको १ मिटर भित्रको दूरीमा १५ मिनेट भन्दा बढि सम्पर्कमा आउनु भयो भने, यो app मार्फत तपाईंलाई सूचित गराईनेछ। यो नि: शुल्क app होI app द्वारा सूचना पाएको व्यक्तिले, यदि संक्रमित व्यक्तिसँग सम्पर्कको मितिदेखि दुई हप्ता भित्र परामर्श गर्नु भएमा, पी.सी.आर.( PCR) परीक्षण नि:शुल्क प्राप्त गर्न सक्नुहुनेछ।

जति धेरैले यो app को प्रयोग गर्नुहुन्छ, त्यति नै संक्रमणलाई रोक्ने सम्भावना बढी हुन्छ। त्यसैले, आफू र आफ्नो नजिकका मानिसहरुको सुरक्षाका लागि, कृपया आफ्नो मोबाइलमा यो app राख्नु होला।

2020.08.13[Thu] 09:00

अन्य(その他)

【ओबोन” को परिचय】

जापानमा अगस्त महिनालाई “ओबोन” महिनाको रुपमा मनाईन्छ I

के तपाईले “ओबोन” को बारेमा सुन्नुभएको छ?

“ओबोन” जापानी बौद्ध परम्परा हो र जापानमा यो मानिन्छ कि “आफ्ना बितिसकेका पुर्खाहरुको आत्मा यो समयमा आफ्नो घर फर्कन्छन्I” परिवार र आफन्तहरू आफ्ना पुर्खाहरूप्रति कृतज्ञताको लागि र सम्पूर्ण व्यक्तिहरूको सुरक्षित र शान्तिमय जीवनको लागि भेला भएर प्रार्थना गर्ने गर्दछन्।

यसो विचार गर्दा, मलाई चै जापानको ओबोन र हाम्रो नेपालको गाईजात्रा मूल्यमान्यतामा उस्तै लाग्छI

ओबोनको अवधि सामान्यतया अगस्त १३ देखि १६ तारिखसम्म, चार दिनको हुन्छ। टोकियो र कान्तोकेन्को क्षेत्रहरूमा भने, ओबोन, जुलाई १३ देखि १६ तारिकसम्म मनाईन्छ।

यस बेला, प्रायजसो घर फर्कनेहरुको घुइँचोको बारेमा धेरै समाचारहरु देख्न र सुन्न पाउँर्छौंI

 

【फुकुओका शहरले जारी गरेको जानकारीमुलक सूचनाहरु】

“विशेष तथा निश्चित अनुदान रकमको बारेमा”

जापान सरकारबाट पाउने १ लाख येनको राहत रकमको लागि आवेदन बुझाउने अन्तिम म्याद अगस्त ३१ तारिख हो।

२०२० अप्रिल २७ सम्ममा जापानको आधारभूत बसोबास दर्ता पुस्तिकामा दर्ता भएकाहरुलाई, फुकुओका शहरले  आवेदन फारम पठाएको छI

कृपया अन्तिम म्यादसम्ममा आवेदन बुझाउनुहोलाI नबुझेको केही कुरा भएमा, फोनमार्फत परामर्श लिन सक्नुहुन्छI

फोन नम्बर, ०९२-४०१-०८२६ I

सोमबार देखि शुक्रवार बिहान ९ बजेदेखि बेलुका ६ बजेसम्म, अंग्रेजी, चाइनिज, कोरियाली, भियतनामी र नेपाली भाषामा परामर्श लिन सक्नुहुन्छ।

यस अतिरिक्त, Life in Fukuoka को विशेष एपिसोडमा ५ मिनेटमा बुझ्न सजिलो हुने गरि, ‘विशेष तथा निश्चित अनुदान रकम’ सम्बन्धि जानकारी दिने कार्यक्रम, हाल LOVE FM मा प्रसारण भईरहेको छI

नेपाली भाषामा हरेक हप्ताको विहिबार दिउँसो १:५३ बाट सुन्न सक्नुहुन्छI

 

“वार्ड कार्यालयको बहुभाषीकरण तथा टेलिफोन दोभाषे सेवा”

निवासी कार्ड, बसाईसराई प्रक्रिया, राष्ट्रिय स्वास्थ्य बीमा, कर तथा फोहोर फ्याँक्ने आदिको बारेमा, यदि तपाईंले केहि कुरा बुझ्नु भएन भने, टेलिफोन दोभाषे माध्यमबाट, वार्ड अफिसमा सोध्न सक्नुहुन्छ।

अंग्रेजी, चाइनिज, कोरियाली, भियतनामी र नेपाली भाषा लगायत १८ वटा भाषाहरुमा परामर्श लिन सक्नुहुन्छ। फोन नम्बर, ०९२-७५३-६११३I

यो नम्बरबाट, शुरुमा दोभाषे सेन्टरमा फोन लाग्छ, त्यसपछि वार्ड अफिसमा सम्पर्क हुनेछ।

त्यसपछि,  आफू बस्ने वार्ड अनि तपाईंले बुझ्न चाहेको कुरा भन्नुहोला।

उदाहरण को लागी, तपाईं यसरी भन्न सक्नुहुन्छ, “म हिगाशी वार्डमा बस्दैछु। म आय प्रमाण पत्र चाहन्छु।"

यति भन्नु भएपछि, हिगाशी वार्ड अफिसमा आय प्रमाणपत्रको जिम्मा लिने मुख्य व्यक्तिलाई फोन सम्पर्क हुन्छ,  र  त्यहि बेला, दोभाषे, त्यो मुख्य व्यक्ति र तपाईं, तीन जनाबीच कुराकानी गर्न मिल्छ।

यस अतिरिक्त, तपाईं वार्ड अफिसमा जानुहुँदा पनि, फोनको प्रयोग गरि दोभाषे सुबिधा लिन सक्ने हुनाले कृपया यसलाई ढुक्क भएर प्रयोग गर्नुहोस्।

 

 

2020.08.06[Thu] 09:00

चिकित्सा तथा स्वास्थ्य(医療・保健) , अन्य(その他)

【अगस्त ११ यामा नो हि अर्थात् Mountain Day】

जापान मा धेरै बिदाहरु छन्। ती मध्ये एक, अगस्त ११ को “यामा नो हि” अर्थात् “Mountain Day” हो।

"हिमालको देनहरुको कदर गर्ने र उनीहरूलाई चिन्ने अवसरको दिन” को रूपमा यो दिन २०१६ मा  लागू गरिएको थियो।

सार्वजनिक बिदा नभएको अगस्त महिनामा, नयाँ सार्वजनिक बिदा " यामा नो हि" थपिएको पछि,  जून मात्र  सार्वजनिक बिदा नभएको महिना भएको देखिन्छI

नेपालमा सार्वजनिक बिदा यदि, शनिबार पर्यो भने तेस्को सट्टा अर्को दिनमा सार्दैन नि होईनI तपाईंलाई थाहा छ?

जापानमा भने, सार्वजनिक बिदा यदि आईतबार पर्यो भने, त्यो सोमबार सार्छ नि! कति रमाईलो है!

अनि साँच्चै, यो वर्ष टोकियो ओलम्पिक र प्यारा ओलम्पिक आयोजना हुने भएकोले " यामा नो हि" १० अगस्तमा सारेको थियो। तर, नयाँ कोरोनाभाइरसको प्रभावका कारण ओलम्पिक २०२० स्थगित गरियोI त्यसैले, “यामा नो हि”, यो वर्ष किन अगस्त ११ मा भयो भनेर तपाईंहरु नझुक्किनुहोला है!

 

【फुकुओका शहरले जारी गरेको जानकारीमुलक सूचनाहरु】

“विशेष तथा निश्चित अनुदान रकमको बारेमा”

जापान सरकारबाट पाउने १ लाख येनको राहत रकमको लागि आवेदन बुझाउने अन्तिम म्याद अगस्त ३१ तारिख हो।

२०२० अप्रिल २७ सम्ममा जापानको आधारभूत बसोबास दर्ता पुस्तिकामा दर्ता भएकाहरुलाई, फुकुओका शहरले  आवेदन फारम पठाएको छI

कृपया अन्तिम म्यादसम्ममा आवेदन बुझाउनुहोलाI नबुझेको केही कुरा भएमा, फोनमार्फत परामर्श लिन सक्नुहुन्छI

फोन नम्बर, ०९२-४०१-०८२६ I

सोमबार देखि शुक्रवार, बिहान ९ बजेदेखि बेलुका ६ बजेसम्म, अंग्रेजी, चाइनिज, कोरियाली, भियतनामी र नेपाली भाषामा परामर्श लिन सक्नुहुन्छ।

यस अतिरिक्त, Life in Fukuoka को विशेष एपिसोडमा ५ मिनेटमा बुझ्न सजिलो हुने गरि, ‘विशेष तथा निश्चित अनुदान रकम’ सम्बन्धि जानकारी दिने कार्यक्रम, हाल LOVE FM मा प्रसारण भईरहेको छI

नेपाली भाषामा हरेक हप्ताको विहिबार दिउँसो १:५३ बाट सुन्न सक्नुहुन्छI

 

“रेड इम्पोर्तेट फायर कमिला (Red Imported Fire Ant), पछाडी रातो भएको माकुरा (Red back spider)  र निलो चक्का भएको अक्टोपस(Blue-ringed octopus) बाट सावधान हुनुहोस्!”

गर्मीको बेला, रेड इम्पोर्तेट फायर कमिला (Red Imported Fire Ant), पछाडी रातो भएको माकुरा (Red back spider)  र निलो चक्का भएको अक्टोपस(Blue-ringed octopus) जस्ता विषालु जीवहरुदेखि सावधान रहनुहोस्।

रेड इम्पोर्तेट फायर कमिला,२.५ मिलिमिटरदेखि ६ मिलिमिटर लम्बाई जतिको रातो खैरो रंगको कमिला हो। यसले टोक्दा, पोलेको बेला जस्तै दुखाईको अनुभव हुन्छI तपाईंको प्रतिरक्षा प्रणाली अनुसार, एनाफिलाक्टिक झटका भन्ने एक किसिमको कडा एलर्जी हुन सक्छ।

पछाडी रातो भएको माकुरा (Red back spider), एक किसिमको विषालु माकुरा हो, जुन घाम भएतिरको  बोटबिरुवाको छेउमा, नालीको ढकनको पछाडि वा बेंचमुनि बस्दछन्।

यसको लम्बाई १ सेन्टीमिटर हो, र यदि यसको खुट्टाहरू फैलायो भने, यो ३ सेन्टीमिटरदेखि ४ सेन्टीमिटरको हुन्छ।

शरीर सबै कालो,तर पछाडी पेटतिर चाहिं रातो hour-glass आकारको बुट्टा हुन्छI

यदि यसले टोक्यो भने, दुखाई, ज्वरो र वाकवाकी लाग्ने जस्ता लक्षणहरू देखा पर्न सक्दछन्I

यदि तपाईंले रेड इम्पोर्तेट फायर कमिला वा पछाडी रातो भएको माकुरा फेला पार्नुभयो भने, यसलाई आफ्ना खुला हातले नछोइकन, व्यावसायिक रूपमा उपलब्ध कीटनाशकको प्रयोग गरि, मार्नुहोस्।

यदि तपाईलाई टोकेमा, तुरुन्तै अस्पताल जानुहोस्।

निलो चक्का भएको अक्टोपस, हाकाता बेभित्र र बाहिर फेला परेको छ र यसको शरीरको लम्बाई १० सेन्टीमिटर भन्दा कम छ र यसको बिशेषता भनेको, यो उत्तेजित हुँदा यसको सम्पूर्ण शरीरमा निलो चक्का देखा पर्छI

यो फुगु भन्ने माछा जत्तिकै घातक हुन्छI यदि यसले टोक्यो भने, सबैभन्दा डरलाग्दो अवस्था, मृत्यु हुन सक्छ।

यदि यसले तपाईंलाई टोक्यो भने, विषलाई आफ्नो मुखबाट नतान्नुस् र हातले थिचेर निचोर्दै, तुरुन्तै अस्पताल जानुहोस्।

 

2020.07.16[Thu] 09:00

चिकित्सा तथा स्वास्थ्य(医療・保健) , अन्य(その他) , कार्यक्रम तथा मनोरन्जन(イベント・娯楽)

【गर्मीको योजना】

आजकल गर्मी एकदम बढीरहेको छ ।  तपाईंहरु  यस वर्षको गर्मीमा के गर्ने सोच्दै हुनुहुन्छ होला?  तपाईंमध्ये कतिपयले वजन घटाउने भनेर योजना बनाउनु भएको होला वा गर्दै पनि हुनुहुन्छ होलाI अनि कतिपयले घरमै वेब सिरिज हेरेर रमाईलो समय बिताउने सोच्दै हुनुहुन्छ होला वा केही नयाँ परिकार बनाएर खाने, त्यस्तै नयाँ कुराको थालनी गर्ने आदि जस्ता योजना बनाउँदै हुनुहुन्छ होलाI मलाई त गर्मी महिना भने पछि नेपालको जनैपूर्णिमा र गाईजात्रामा क्वाटी र रोटिको खाएको याद आउँछI गर्मीको बेला गेडागुडीको टुसा राम्ररी आउने भएकोले, यहाँ जापानमा पनि म, क्वाटी र रोटि पकाएर खाने गर्छुI क्वाटी स्वादिलो मात्र नभई गर्मीमा थकित शरीरमा उर्जा ल्याउनुका साथै स्वास्थ्यमा धेरै फाईदा गर्दछI यो वर्ष पनि क्वाटी मज्जाले खाने र जापानी साथीहरुलाई पनि खुवाउने विचार छ I तपाईंहरु पनि खाने होइन त क्वाटी!

 

घुमघामको जानकारी

आज, मैले रमाईलो घुमघामको जानकारी लिएर आएकी छु।

 तपाईंहरुले कहिल्यै "फुकुओका ओपन टप बस" चड्नु भएको छ?

यो बस, फुकुओका शहरको पर्यटकिय स्थलहरू,  तेन्जिन क्षेत्र, हाकाता क्षेत्र र समुद्री किनारको क्षेत्र आदिको वरिपरि घुमाउने भ्रमण बस हो। सुविधाजनक यो बस, साधारण बस भन्दा भिन्न भई, छत बिनाको डबल डेकर बस हो। जमिन माथि करीव ३.२ मिटर बाट देखिने शहरको दृश्य सामान्य भन्दा फरक देखिन्छ, र यो उत्साहजनक हुन्छ! यसमा तीन किसिमको कोर्सहरू छन्, तपाईं आफूलाई  मनपर्ने कोर्समा एक घण्टाको लागि चढेर, फुकुओका शहरको अवलोकन गर्न सक्नुहुन्छ। साथै बसमा उद्घोषकले जानकारी पनि प्रदान गर्दछ।

 टिकट शुल्क, वयस्कहरूको लागि १,५७० येन र बच्चाहरूको लागि ७९० येन हो।

इच्छुक महानुभावहरुले कृपया आधिकारिक वेबसाइट हेर्नुहोस्।

वेबसाइट रहेको छ,  fukuokaopentopbus.jp

 नयाँ कोरोनाभाइरस विरुद्धको सावधानीका रूपमा, चालक दल र बस उद्घोषकहरूले मास्क लगाउने र गाडीलाई विसंक्रमण गर्ने जस्ता वातावरणीय सरसफाइलाई उचित ध्यान दिएर दुक्क र सुरक्षित सेवाहरू प्रदान गरिरहेको छI

यो बस चढ्दा, सबै जनाले मास्क लगाउने र खोक्दा शिष्टाचार का साथ गर्ने गरौं!

 

नयाँ कोरोना भाईरस सम्पर्क पत्ता लगाउने app को बारेमा

जापानले कोरोना भाईरस सम्पर्क पत्ता लगाउने app बनाएको छ। यदि तपाईं भाईरस संक्रमित व्यक्तिको सम्पर्कमा आउनु भयो भने, app मार्फत तपाईंलाई सूचित गराईनेछ। जति धेरैले यो app को प्रयोग गर्नुहुन्छ, त्यति नै संक्रमणलाई रोक्ने सम्भावना बढी हुन्छ। त्यसैले, आफू र आफ्नो नजिकका मानिसहरुको सुरक्षाका लागि, कृपया आफ्नो मोबाइलमा यो app राख्नु होला।

<< previous 1 2

DJ紹介

  • Sarita
  • Sarita
  • 誕生日: 7月10日
    趣味: 音楽を聞く、旅行する

番組ページへ

リクエスト&メッセージ