Life in Fukuoka "Nepali"

【Fukuoka हिगासीकु हानाबी ताईखाई】

यस हप्ताको अन्त्यदेखि गोल्डेन वीक शुरु हुँदैछ। बाहिर घुमघाम गर्ने योजना भएका व्यक्तिहरू पनि धेरै हुनुहुन्छ होला। 

गोल्डेन विकको पहिलो दिन, २७ तारिक शनिबार आयोजना हुन गईरहेको, "Fukuoka हिगासीकु हानाबी ताईखाई" को बारेमा जानकारी लिएर आएकी छु।

आयोजना स्थल, फुकुओका सिटी, हिगासी वार्ड, खाशिहामाको समुन्द्री तट "मिशिमा ग्रीन बे वाक" हो। राति ७:३० बजेदेखि, लगभग ७,००० पटाकाहरु पड्काउने योजना रहेको छ। यो ३६० डिग्रीमा कहींबाट पनि हेर्न सकिने आतिशबाजी महोत्सव हो।

महोत्सव भनेपछि खानाका स्टलहरू हुने नै भयो! स्टलहरू तीन स्थानहरूमा हुनेछन्: आतिशबाजीको नजिक अनि हेर्नमा कुनै अवरोध नभएको "आइल्यान्ड सिटी गाइस्यु र्योकुचि" क्षेत्र।अनि अर्को स्थल हो, निःशुल्क हेर्न मिल्ने, शौचालय भएको र स्टलहरू धेरै भएको "खाशिहामा च्युओ कोउएन्"। 

त्यसतै, शुल्क तिरेर सिटमा बसेर हेर्ने ठाउँको नजिकै रहेको "खाशिहामा किता कोउएन्" मा पनि खानाका स्टलहरु उपलब्ध हुनेछन्। तर, यो क्षेत्र राजमार्गमा भएकोले आतिशबाजीको पूर्ण सीमा देख्न सक्नुहुन्न, त्यसैले अन्य दुई स्थानहरुबाट हेर्दा राम्रो हुन्छ।

आयोजना स्थलमा जानको लागि, "JR चिहाया स्टेशन" उपयुक्त हुन्छ। " JR खाशिहामा स्टेशन" बाटको मार्ग, "AEON MALLखाशि हामा" वरीपरीका सडकहरू भीडभाड हुन सक्छन् र फेरी घुमाउरो बाटो लिनुपर्ने पनि हुन सक्छ। यसैले, "JR चिहाया स्टेशन" बाट झरेर, निशुल्क आतिशबाजी हेर्न मिल्ने क्षेत्र, "खाशिहामा च्युओ कोउएन्" र "आइल्यान्ड सिटी गाइस्यु र्योकुचि" को बाटोतिर जानु बेस हुन्छ। पार्किङ स्थल उपलब्ध नभएकोले, कृपया सार्वजनिक यातायातको सुविधा प्रयोग गर्नुहोस्।

फुकुओकामा यस वर्षको पहिलो आतिशबाजी महोत्सव, गोल्डेन वीकको शरुवातमा भरपुर आनन्द लिनुहोस्!

【Golden Weekबालबालिकाहरुको लागि विशेष छुट टिकट】

गोल्डेन वीक अवधिभरि प्रयोग गर्न सकिने, बालबालिकाहरुको लागि विशेष छुट टिकटको बारेमा जानकारी लिएर आएकी छु।

शुरुमा, "JRक्युशु"। अप्रिल २७, शनिवारबाट मेको ६, सोमबारसम्मको अवधिमा, "कोदोमो बोउकेन् किप्पु" बिक्रीमाराखेको छ। यो JR क्युशुको लोकल ट्रेन र र्यापिड ट्रेनमा, १०० येनमा १ दिन अनलिमिटेड यात्रा गर्न मिल्ने टिकट हो। विशेष टिकट खरिद गर्नुभएमा, बुलेट ट्रेन र एक्सप्रेस ट्रेनमा पनि प्रयोग गर्न सक्नुहुनेछ।

यो टिकट खरिद गर्नका लागि, अघिल्लो दिनको राति ११ बजेसम्म खरीद गर्न आवश्यक छ, त्यहि दिन खरिद गर्न भने मिल्दैन। यो टिकट "JR क्यूशू इन्टरनेटो रेस्या योयाकु" र JR क्यूशूका प्रत्येक स्टेशनका आरक्षित सीट टिकट भेन्डिंग मेशिनमा खरिद गर्न सकिन्छ।

अर्को छ, "फुकुओका सिटी सबवे"। यहाँ पनि फुकुओका सिटी सबवे सम्पूर्ण लाइनहरुमा एक दिनको लागि १०० येनमा अनलिमिटेड रूपमा यात्रा गर्न मिल्ने एक दिनको यात्रा पास, "स्योउगाकुसेइ ह्याकु येन पासु" अर्थात् "प्राथमिक विद्यार्थी १०० येन पास"बेचिन्छ। यो पास प्रत्येक स्टेशनको टिकट काउन्टर र ग्राहक सेवा केन्द्रहरूमा त्यहि दिन खरिद गर्न सकिन्छ।

अन्तमा, " निशितेचुबस"। निशितेचुको सबै मार्गका बसहरू र विशेष बसहरूमा, जहाँसम्म यात्रा गरे पनि १ पटकको लागि ५० येन मात्र लाग्छ। नगद वा निमोका कार्ड दुवै प्रयोग गर्न सकिन्छ। झर्ने बेला चालकलाई "म प्राथमिक विद्यार्थी हुँ" भनेर ५० येन तिर्नु पर्छ।

यी तीनवटा टिकटहरू सबै "प्राथमिक विद्यार्थी" का लागि हुन्। 

अवश्य पनि यी टिकटहरूको उपयोग गरेर फुकुओका शहर घुम्न जानुहोस्।

【को प्रदशनी】

Vincent Van Gogh, एक प्रसिद्ध डच प्रभाववादी चित्रकार हुनुहुन्छ। उहाँलाई 

"आधुनिक कलाका पिता" भनेर पनि चिनिन्छ।उहाँका धेरै प्रशंसक छन्। Gogh को

 "Digital Fine Art Exhibition", Moving Vincent Van Gogh हाल फुकुओका सिटी साइन्स म्युजियममा आयोजना भइरहेको छ!

"Digital Fine Art Exhibition"भनेको Fine Art विषयमा, 3DCG animation, VFX (special effects), जस्ता कम्प्युटर ग्राफिक्स टेक्नोलोजीहरू प्रयोग गरिएका कलाकृतिहरुको संग्रह प्रदर्शनी हो। अमेरिका, फ्रान्स र अष्ट्रेलिया जस्ता देशहरूमा, पहिले नै कलात्मक अभिव्यक्ति विधाको रूपमा स्थापित भइसकेको छ र लोकप्रिय बन्दै गईरहेको छ।

यस पटक, संसारभरबाट सङ्कलन गरिएका Gogh का लगभग ८६०वटा कलाकृतिहरूको संग्रह रउहाँको जीवनको ३७वर्षको अवधिमा सिर्जना गरिएका कलाकृतिहरू, नवीनतम डिजिटल प्रविधि प्रयोग गरी दृश्यमा रुपान्तरण गरिएको छ। डिजिटल प्रविधिको माध्यमबाट Gogh को कलाको नयाँ संसार जीवन्त बनाईएको छ र "मुभिङ पेन्टिङहरू" मा रूपान्तरण गरिएकोले आश्चर्य र नयाँ खोजले भरिपूर्ण छ। साथै, उनका केही उत्कृष्ट कृतिहरूमा तारायुक्त आकाशहरू चित्रित छन्। उनले छाडेका ९०० भन्दा बढी पत्रहरूसँगै, त्यस समयको ताराहरूले भरिएको आकाशको मनोरञ्जन सहितको तारामंडल कार्यक्रम पनि प्रसारण गरिनेछ।

कार्यक्रम जून १६ सम्म चल्नेछ ।

अवश्य पनि "Moving  Vincent Van Gogh " को अनुभव लिनुहोस् र नयाँ तरिकामा कलाको आनन्द लिनुहोस्।

【DJ बाट जीवनको नयाँ अध्यायको लागि कामना】

अर्को हप्ता अप्रिल शुरु हुन्छ! जापानमा अप्रिल महिनालाई, नयाँ भर्ना हुने वा नयाँ रोजगार शुरु गर्ने आदि जस्ता नयाँ जीवनयापन शुरु हुने महत्वपूर्ण महिनाको रुपमा लिईन्छ। तपाईंहरु पनि जीवनको नयाँ अध्यायको लागि प्राप्त गर्न सकिने लक्ष्यहरू सेट गर्नुहोस् र तिनीहरूतर्फ कसरी काम गर्ने भन्ने योजना बनाउनुहोस्। 

नयाँ अध्यायमा प्रवेश गर्दा, नियमित रूपमा आहार, व्यायाम गर्ने, नेटवर्किङ र सम्बन्ध बनाउँदै जाने, आफ्नो ज्ञान र कौशललाई बढाउदै जाने आदि कदमहरूले आफ्नो जीवनलाई सकारात्मक दिशामा ल्याउन सकिन्छ।

नयाँ समयमा नयाँ मित्रहरू बनाउँदै जानुहोस् र नेटवर्किङमा सहभागी हुनुहोस्। यसले तपाईंलाई नयाँ अनुभवहरूमा मद्दत गर्न सक्छ र नयाँ अवसरहरू पनि खोज्न साहयक हुन सक्छ।

चुनौतीहरूलाई अवसरमा परिणत गर्न र सिक्न मेहनत गर्नुहोस्। साहस गर्नुहोस् र नयाँ अनुभवहरू अनुभव गर्नुहोस्। नयाँ अध्यायमा प्रवेश गर्दा, यी सिद्धान्तहरूलाई अमलमा ल्याउनुहोस् र आफ्नो जीवनलाई सकारात्मक दिशामा ल्याउने प्रयास गर्नुहोस्।

वर्ष २०२० कोअप्रिलमा शुरु भएको यो कार्यक्रम " Life in Fukuoka", अर्को हप्ताबाट पाचौं वर्षमा प्रवेश गर्न गईरहेको छ! प्रसारण वा पोडकास्टहरू सुनि दिनुहुने सबैजनालाई धेरै धेरै धन्यवाददिन चाहन्छु।

फुकुओकामा बस्नु हुने विदेशीहरूका लागि दैनिक जीवनमा उपयोगी जानकारीहरु तथा रमाइला विषयबस्तुहरू आउँदा दिनहरुमा पनि निरन्तर प्रस्तुत गर्नेछु।

कुनै प्रश्न, सन्देश, वा अनुरोधहरू भएमा पक्कै पनि यस लाईफ इन फुकुओका नेपाली कार्यक्रममा मेसेज पठाउनुहोला!

【अन्तर्राष्ट्रिय नारी दिवस】

मार्च ८ अन्तर्राष्ट्रिय नारी दिवस पर्छ।महिला अधिकारको रक्षा गर्न र उनीहरूका उपलब्धिहरूको सम्मान गर्न संयुक्त राष्ट्र संघद्वारा स्थापित गरिएको यो दिवस विश्वभरी मनाइन्छ।

अन्तर्राष्ट्रिय नारी दिवसको प्रतीकको रुपमा रहेको फूल मिमोजा हो। तपाईहरुले आजकल शहर वरिपरि मिमोजा फूलहरु देख्नुभएको छ कि छैन होला। जाडो मौसमको अन्त्य र वसन्तको सुरुवातको सङ्केतको रुपमा, फेब्रुअरीदेखि मार्चसम्म फुल्ने मिमोजालाई `कृतज्ञता` र `खुशीको फूल` पनि भनिन्छ। यसको चम्किलो पहेंलो भिटामिन रङले गर्दा हेरेर मात्र पनि ऊर्जा महसुस हुन्छ, यो फूल सुन्दर अनि बिशेष रुपले मनमोहक छ!

जसरी जापानमा आमाको दिनमा कार्नेशन फूल दिने चलन छ, त्यसरी नै, यो मिमोजा फूल अन्तर्राष्ट्रिय नारी दिवसमा आफ्नो कृतज्ञता व्यक्त गर्ने रुपमा दिंदा पनि राम्रै होला कि!

【फुकुओका सिटी इन्टरनेशनल फाउण्डेसनको सूचना】

"संयुक्त राष्ट्र संघकाकर्मचारीहरूसँग मिलेर शहरको विकास गरौं! सहभागिताको लागि आह्वान" सम्बन्धि सूचना

फुकुओका सिटी इन्टरनेशनल फाउण्डेसनले UN-Habitat Fukuoka Headquarter का कर्मचारीहरूलाई लेक्चरका लागि आमन्त्रित गर्ने र सहरी विकास सम्बन्धी कार्यशाला आयोजना गर्ने भएको छ।

यो कार्यशाला कार्यक्रम, प्राथमिक विद्यालयको ४कक्षादेखि जुनियर हाई स्कूलको ३कक्षाका विद्यार्थीहरूका लागि, मार्च २३ शनिबार बिहान १०:०० बजे देखि ११:३०बजे सम्म आयोजना हुनेछ। कार्यक्रम स्थल ACROS Fukuoka हो।

"मानव अधिवासन" सम्बन्धि क्रियाकलापहरु आयोजना गरिंदै आएको UN-Habitat Fukuoka Headquarter, क्युशुमा रहेको एक मात्र संयुक्त राष्ट्र एजेन्सी हो।

कार्यशालामा सहभागीहरू आफूलाई Habitat गाउँका बासिन्दाको रुपमा सोची, भारी वर्षाबाट धेरै क्षति भएको गाउँको पुन:निर्माणको लागि सबैजना मिलेर योजना बनाउनेछन्।

कार्यशाला साधारण जापानी भाषामा सञ्चालन हुने भएकोले विदेशी मूलका बालबालिकाहरू पनि सहभागी हुन सक्छन्।

संयुक्त राष्ट्र संघको विश्वव्यापी गतिविधिहरूमा रुचि राख्नुहुने सबैजना, हामी तपाईंहरुको सहभागिताका लागि पर्खिरहेका छौं।

Fukuoka City Consultation Support Center for Foreign Residents को काउन्टर खुल्ने समय बारे

हाकाता वार्डको तेन्यामाचीस्थित फुकुओका सिटी इन्टरनेशनल सेन्टरको पहिलो तल्लामा Fukuoka City Consultation Support Center for Foreign Residents नामको केन्द्र छ। जहाँ, विदेशीहरूलाई फुकुओकामा आरामदायी जीवनयापनका लागि, धेरै भाषाहरूमा जानकारी प्रदान गर्नुका साथै कानूनी परामर्श र अध्यागमन स्थिति परामर्श जस्ता निःशुल्क विशेष परामर्शहरू पनि प्रदान गरिंदै आईरहेको छ।

Fukuoka City Consultation Support Center for Foreign Residents को काउन्टर अप्रिलदेखि, बिहान ९:००बजेदेखि बेलुका ५:३०बजेसम्म खुल्ला रहनेछ। 

परामर्शहरू, काउन्टरमा आमनेसामने, वा टेलिफोन वा सोधपुछ फारम मार्फत स्वीकार गरिन्छ। आमने-सामने र टेलिफोन परामर्शका लागि, टेलिफोन दोभाषे सेवा २२ वटा भाषाहरूमा उपलब्ध छ।

यस केन्द्रको ठेगाना रहेको छ, फुकुओका शहर, हाकाता वार्ड, तेन्यामाची ४-१

फोन नम्बर टोल-फ्री रहेको छ, ०१२०-६६-१७९९

फुकुओका सिटी इन्टरनेशनल फाउण्डेसनको LINE आधिकारिक Account बाट LINE कल पनि प्रयोग गर्न सक्नुहुन्छ।

विस्तृत जानकारीका लागि, फुकुओका सिटी इन्टरनेशनल फाउण्डेसनको होमपेज हेर्नुहोला।

सहभागिता नि:शुल्क हो, तर अग्रिम रिजर्भेसन गर्न आवश्यक छ।

रिजर्भेसन कसरी गर्ने भन्ने बारे विवरणहरूको लागि, कृपया फुकुओका सिटी इन्टरनेशनल फाउण्डेसनको होमपेज वा फेसबुकमा हेनुहोस्।

फुकुओका सिटी इन्टरनेशनल फाउण्डेसनको होमपेज fcif.or.jp हो

कुनै प्रश्नहरू छन् भने, कृपया हामीलाई सम्पर्क गर्नुहोस्। फोन नम्बर "०९२-२६२-१७४४" हो।

【निहोन् स्यु】

तपाईहरुले जापानी रक्सी‘निहोन्स्यु’को बारेमा सुन्नुभएको छ वा कहिल्यै पिउनु भएको छ? वर्षैभरि निहोन्स्युको स्वाद लिन त सकिन्छ, तर जाडो मौसम भनेपछि नयाँ साके बनाउने सिजन हो। यो सिजनमा नयाँ बनाईएका साकेहरु बजारमा उपलब्ध हुने गर्छ। 

‘निहोन्स्यु’बनाउनको लागि प्रयोग हुने चामल, माल्ट चामल, पानीजस्ता सरल सामाग्रीहरु र विधिहरूले स्वाद र गुणस्तर निर्धारण गर्दछ। यस बाहेक, यसको पिउने तरिकाहरु पनि थुप्रै छन्, जस्तै कि, चियो पिउने (रेशु), हल्का मनतातो पिउने(हिया), तातो पिउने (खान्जाके) आदि बिभिन्न तरिकाहरुबाट निहोन्स्युको मजा लिन सक्नुहुन्छ। यसमा अल्कोहलको मात्रा सामान्यतया लगभग १५% हुन्छ।

फेब्रुअरी लाग्यो कि, धेरैजसो रक्सि उत्पादन गर्ने स्थलहरुमा ‘कुरा बिराकी' नामको कार्यक्रम आयोजना हुने गर्छ। ती स्थलहरुमा नयाँ रक्सी चाख्दै भ्रमण गर्न सक्नुहुन्छ।

फुकुओका प्रिफेक्चरमा हाल ६८ वटा साके ब्रुअरीहरु छन्,  ती मध्ये,‘इशिकुरा स्युजोउ' हाकाता क्षेत्रको एक मात्र साके ब्रुअरी हो, जहाँ अझै पनि साके बनाउने काम जारी छ। यो ‘हाकाता ह्याकुनेन्गुरा' भनेर लिकप्रिय छ। सेतो माटोको पर्खाल र आकर्षक ईंटाको चिम्नी भएको यस भवनको निर्माण सन् १८७० मा भएको थियो। यो सुन्दर भवन रेस्टुरेन्ट, कन्सर्ट र विवाह स्थलको रूपमा पनि प्रयोग गरिन्छ। त्यहाँ प्रत्यक्ष बिक्री स्टोर पनि भएकोले नमूनामा राखेका साके चाख्दै आफ्नो मनपर्ने निहोन्स्यु किन्न सक्नुहुन्छ!

यस वर्षको ‘हाकाता ह्याकुनेन्गुरा',फेब्रुअरी २९(बिहीबार) र मार्च १ (शुक्रबार) दुई दिनको लागि आयोजना हुने भएको छ। खुल्ने समय अवधि, दिउँसो २ बजे देखि बेलुकी ८ बजेसम्म हो। त्यहाँ ताजा रक्सीका साथै विभिन्न प्रकारका मादक पेय पदार्थहरू, नोअल्कोहल पेय, तथा अन्य खाद्यसामग्रीहरु बिक्रीमा पाईन्छन्। यस बाहेक निहोन्स्युको तुलना कर्नर पनि हुनेछ।

समय भए तपाईंहरु पनि साके ब्रुअरीको भ्रमणमा जानु भए कसो होला!

【केगो जिन्ज्यामा「Blue Bottle Coffee」 खोलियो!】

तेन्जिनको केन्द्रमा अवस्थित तीर्थस्थल हो, केगो जिन्ज्या। दुई वर्ष अगाडि मात्रै ठूलो जीर्णोधार कार्य सम्पन्न भएको यस मन्दिर परिसरभित्र, क्युशुको पहिलो स्टोर "Blue Bottle Coffeeफुकुओका तेन्जिन क्याफे" मन्दिरको कार्यालय भवनको पहिलो तल्लामा खोलिएको छ!

"Blue Bottle Coffee" अमेरिकाको ओकल्यान्डबाट शुरु भएको थियो।  `मिठो ​​कफीको चुस्कीले जीवनलाई आनन्ददायी बनाउँछ' भन्ने मुलधारसँगै, कपमा रहेको कफीमा मात्र नभई, त्यहाँभित्रको वातावरण, सरसामान, आदिद्वारा पनि कफी पिउँदाको वरपरको अनुभवलाई उत्तिकै महत्व दिने, अनि विशेष स्वादिलो कफी प्रदान गर्ने क्याफे हो।

ठूल्ठूला सीसाका भित्ता भएको यस क्याफेमा बाहिरी दृश्य हेर्दै, कफी पिउँदै आराम गर्न सक्नुहुन्छ, वा मन्दिर घुमेर घर फर्कने बेलामा कफी टेकआउट लिन पनि सक्नुहुन्छ! यो क्याफे बिहान ८ बजे देखि बेलुकीको ८ बजे सम्म खुला रहनेछ।

【आमाओउ】

के तपाईलाई स्ट्रबेरी मन पर्छ? जनवरी १५ लाई "स्ट्रबेरी दिवस" ​​को रूपमा तोकिएको छ।स्ट्रबेरी संसारभर खाइन्छ, तर जापान सबैभन्दा बढी कच्चा स्ट्रबेरी उपभोग गर्ने देश होर विश्वको आधा भन्दा बढी स्ट्रबेरी जापानमा उत्पादन हुने गर्छ, जसमा लगभग ३०० थरिका स्ट्रबेरीहरू पर्छन्।

त्यसमा पनि फुकुओका, स्ट्रबेरी उत्पादनको हिसाबले जापानभरमा दोस्रो स्थानमा पर्ने

स्ट्रबेरी उत्पादनका लागि प्रसिद्ध क्षेत्र हो। फुकुओकामा धेरै प्रकारका स्ट्रबेरीहरू छन्, तर तिनीहरूमध्ये फुकुओकामा मात्र उब्जाउ हुने ब्रान्डेड स्ट्रबेरी ''आमाओउ'' हो। "आखाई, मारुई, ओकि र उमाई" शब्दहरुको शुरुको अक्षरहरूबाट नामकरण गरिएको ''आमाओउ'' धेरैले मन पराउँछन्। अहिले यसको मौसम लागेकोले, बिशेष रुपमा नै स्वादिष्ट हुन्छ। पक्कै पनि खाएर हेर्नु होला।

हुन त स्ट्रबेरी यत्तिकै खाए पनि मिठो हुन्छ , तर जापानमा, यो कन्डेन्स्ड दूध वा रातो बीन पेस्टसँग खाने पनि गरिन्छ। त्यस्तै, यो समयमा मात्र खान पाईने स्ट्रबेरी डेफुकु पनि लोकप्रिय छ।

स्ट्रबेरी मन पराउने र धेरै खान चाहनेहरूका लागि, फुकुओका प्रान्तका विभिन्न ठाउँहरूमा `स्ट्रबेरी टिप्ने' पनि आयोजना गरिन्छ। प्रत्येक बगैचामा यसलाई रमाइलो गर्ने विभिन्न तरिकाहरू छन्, जस्तै कि, स्ट्रबेरीको किसिमहरूको तुलना गर्ने, तपाईंले खान सक्ने जति टिपेर खाने, जाम जस्ता आफ्नै स्ट्रबेरी रेसिपीहरू बनाउने, तथा स्ट्रबेरी मेनु भएको क्याफे वा स्ट्रबेरी सामान बिक्री गर्ने पसलमा जाने आदि बिभिन्न मनोरञ्जन लिन सक्नुहुन्छ।

फुकुओकाको स्ट्रबेरी स्वादको मजा यस मौसममा भरपूर लिनुहोस्।

खानुहुँदा, स्ट्रबेरीको तल्लो भाग सबैभन्दा मीठो हुनेभएकोले, टुप्पोतिरबाट खान शुरु गर्नुहोस् अनि अन्तसम्म गुलियो स्वादको आनन्द लिनुहोस्।

【फुकुओका शहरको सूचना】

तोच्योजी सेचुबुन् ताइसाइ- अन्तर्राष्ट्रिय विद्यार्थीहरूको लागि मामेमाकी कार्यक्रम

सेचुबुन्, वर्षमा एकपटक मनाईन्छ, जसमा खराब चीजहरू जस्तै बिरामी र प्रकोप आदिबाट बच्न, र सुस्वास्थ्यका साथ बाँच्नका लागि प्रार्थना गर्ने गरिन्छ। जापानमा प्राचीन कालदेखि नै ‘मामेमाकी’ को चलन रही आएको छ, जसमा प्रकोप निम्त्याउने राक्षसहरूलाई भगाउन सेतो भटमास फ्याँक्ने गरिन्छ। "भाग्य भित्र! राक्षसहरू बाहिर!" भन्दै सेतो भटमास फ्याँक्दै, दुष्ट आत्माहरूबाट जोगिन प्रार्थना गर्छन्।

सेचुबुन् ताइसाइ, हरेक वर्ष फेब्रुअरी ३ मा हाकाटा वार्डको तोच्योजी मन्दिरमा आयोजना गरिन्छ। हरेक वर्ष धेरै दर्शनार्थीहरुको भीड लाग्छ। सात भाग्यका देवताहरु, ओताफुकु, आखाओनी, र आओ ओनी यस महोत्सवमा देखा पर्ने हुनाले अत्यन्तै रोमाञ्चक हुन्छ।

सेचुबुन् ताइसाइलाई प्रवर्द्धन गर्न, जनवरी १९ शुक्रबार, फुकुओकामा बसोबास गर्ने अन्तर्राष्ट्रिय विद्यार्थीहरूले ती सात भाग्यका देवताहरु तथा राक्षसहरूको रूपमा पोशाक लगाएर, फुकुओका शहरका विभिन्न स्थानहरूमा सेतो भटमास फ्याँक्ने कार्यक्रममा सहभागी हुने गर्दै आईरहेको छ।हरेक वर्ष हाकाताको यस परम्परागत महोत्सवलाई संस्कृतिको आदानप्रदान गर्ने थलोको रूपमा पनि अन्तर्राष्ट्रिय विद्यार्थीहरू सहभागी हुने गरेको पाईन्छ। फुकुओका सिटी हल, व्यापारिक क्षेत्रहरु, होटलहरू जस्ता विभिन्न स्थानहरूमा मामेमाकी कार्यक्रम क्रममा राक्षसको रूपमा लुगा लगाएका अन्तर्राष्ट्रिय विद्यार्थीहरूको प्रदर्शनहरू पनि देख्न सक्नुहुन्छ।

तपाईंहरुले कहिल्यै मामेमाकी गर्नुभएको छ?  यदि गर्नुभएको छैन भए, जापानी संस्कृतिको अनुभव पनि हुने, अनि भाग्य पनि सँगै आउने भएकोले गरेर हेर्नु पनि राम्रो होला कि।

【Festa do Brasil Fukuoka 2023】

क्युशुको सबैभन्दा ठूलो ब्राजिल उत्सव, " Festa do Brasil Fukuoka 2023" आउँदो आइतवार, बेसाइड प्लेस हाकातामा आयोजना हुन गईरहेको छ! फुकुओकाका ब्राजिल-प्रेमी बासिन्दाहरूलाई भेला गराउने, फुकुओकाका नागरिकहरूलाई ब्राजिलका आकर्षणहरु चिनाउने, अनि फुकुओकामा चलेका ब्राजिलियन रेष्टुरेन्टहरु र कलाकारहरूको परिचय गराउने हेतुले यो महोत्सव शुरु भएको हो। 

महोत्सवमा स्टेज शो, अन्तरक्रियात्मक परेड, स्वादिष्ट परिकारहरू हुनेछन्। ब्राजिलियन संगीत, नृत्य, र खाना मार्फत ब्राजिलको अनुभव गर्न सक्नुहुनेछ।

महोत्सव, अक्टोबर २९ आइतबार ११ बजे शुरु भई ६ बजेसम्म चल्नेछ। प्रवेश शुल्क १५०० येन हो। तपाईंहरु पनि, फुकुओकामै रहेर ब्राजिलियन संस्कृतिको अनुभव गर्न सकिने यस महोत्सवको आनन्द लिएर हेर्दा कसो होला?

https://festadobrasil.wixsite.com/festadobrasilfukuoka

【फुकुओका शहरको सूचना】

The Creators 2023 को परिचय

रचनात्मक र मनोरञ्जन अनुभव गर्न सकिने कार्यक्रम "The Creators 2023", अक्टोबर २१ (शनिबार) र अक्टोबर २२ (आइतबार), दुई दिन आयोजना हुन गईरहेको छ। आयोजना स्थलहरु, फुकुओका सिटि हलको पश्चिम तर्फको Fureai Hiroba, Fukuoka City Science Museum र Fukuoka Art Museum आदि हुन्। केही सामग्रीहरू अनलाइन प्रसारण गर्ने योजना पनि भएकोले, कार्यक्रम स्थलमा उपस्थित हुन नसक्नेहरूले पनि यस कार्यक्रमको आनन्द लिन सक्नेछन्।

मुख्य स्थल फुकुओका सिटी हलको पश्चिम तर्फको Fureai Hiroba मा, प्रभावशालि प्रकाश र पर्दामा प्रत्यक्ष देखिने म्युजिक स्टेज, visual works को स्क्रीनिंग, स्थानीय मोडेलहरू प्रस्तुत गर्ने फेसन शो, क्रिएटिभ कम्पनीहरुद्वारा अन्तरक्रियात्मक बुथहरू हुनेछन्।

यसका अतिरिक्त, Fukuoka City Science Museum मा, ध्वनि र दृश्यमार्फत् मनोरञ्जन लिन सकिने डिजिटल कला प्रदर्शनी तथा बालबालिकाका लागि प्रोग्रामिङ र शिल्प कार्यशालाहरू हुनेछन्।

त्यस्तै, Fukuoka Art Museum मा, विभिन्न प्रकारका visual works को स्क्रीनिंग आदि जस्ता बृहत् सामग्रीहरु समेटिएको दुई दिनको कार्यक्रम हो।

"क्रिएटिभ सिटी फुकुओका" मा नयाँ र नौलो संस्कृति र प्रविधिको अनुभव लिनुहोस् र दुई दिनको अत्याधुनिक शैलीको मनोरञ्जनको आनन्द लिनुहोस्।

तपाईंहरु सबैको उपस्थितिको अपेक्षामा छौं।

【नयाँ चामल】

अक्टोबरमा प्रवेश गरे लगत्तै गर्मी अलि कम हुन थालेको छ। यस मौसममा, जापानमा प्रायः अन्न, चामल, फलफूल आदि सम्बन्धि अभिव्यक्तिहरु जस्तै "फसलको मौसम, "भोक लाग्ने मौसम" आदिको रूपमा व्यक्त गर्ने गरिन्छ। के तपाईंहरुले यी अभिव्यक्तिहरू पहिले सुन्नुभएको छ?

त्यसैले आज,  "नयाँ चामल (新米, shinmai)," को जानकारी छ। "नयाँ चामल" ले शरद ऋतुमा काटिएको धानलाई बुझाउँछ र सोही वर्षको डिसेम्बर ३१ सम्ममा प्रशोधन गरी प्याकेज गरिन्छ। नयाँ चामल मोटो बनावट र अति स्वादिलो हुन्छ।

फुकुओकामा स्थानीय रूपमा उब्जाइएको धानका धेरै स्वादिष्ट प्रजातिहरू छन्। फुकुओका सहरमा, विशेष गरी निशी-कु, सावारा-कु र हिगाशी-कुका प्रकृति-सम्पन्न क्षेत्रहरूमा, सुरक्षित, वातावरणमैत्री खेती अभ्यासहरूमा ध्यान केन्द्रित गर्दै धान खेती गरिंदै आईरहेको छ।

मुख्य प्रजातिहरू मध्ये क्युशुको प्रतिनिधित्व गर्ने चामल "हिनोहिकारी" हो, जुन समान आकार भई लचिलोपना भई, जुनसुकै परिकारमा पनि जम्छ। अन्य चामलहरु जस्तै, अलि गुलियो सानो बनावट भएको "युमेचुकुशी"चामल, लचिलो तर नटासिने "मिनोरिचुकुशी" चामल, र  चिसो हुँदा पनि स्वादिष्ट, ओनिगिरी र बेन्टोको लागि उपयुक्त फुकुओकाको मौलिक चामल "गेनकिचुकुशी आदि बिभिन्न किसिमका पाइन्छन्।

शरद ऋतुको स्वाद मानिने सखरखण्ड, चेस्टनट, च्याउ, आदि मिसाएर बनाइएको परिकार, "ताकीकोमी गोहान्" पनि स्वादिष्ट हुन्छ।

तपाईंहरु पनि, फुकुओकाको स्वादिष्ट चामलको भातको साथ शरद ऋतुको मजा लिनुहोस्!

【फुकुओका शहरको सूचना】

नयाँ कोरोना भाइरस विरुद्धको शरदको खोपको सूचना

फुकुओका शहरमा नयाँ कोरोना भाइरस विरुद्धको खोपका लागि ईच्छुक सम्पूर्ण व्यक्तिहरुले ढुक्क भएर खोप लगाउन सुनिश्चितका लागि काम भईरहेको छ।

वर्ष २०२३ मा पनि नयाँ कोरोना भाइरस विरुद्धको खोप निशुल्क लगाउन सक्नुहुन्छ। ईच्छुक सम्पूर्ण व्यक्तिहरुले, आजकल फैलिरहेको ओमिक्रोन भेरियन्ट (XBB.1.5) विरुद्ध प्रभावकारी खोप लिन सक्नुहुन्छ। छ महिना वा सोभन्दा माथिका सबैले ओमिक्रोन भेरियन्ट (XBB.1.5) विरुद्ध प्रभावकारी एक-डोज खोप प्राप्त गर्न सक्नुहुन्छ।

खोप कुपन पाउनुभएपछि, बुकिंग साइट वा खोप सेन्टरमा बुकिंग गर्न सकिन्छ।

पहिले प्राप्त गर्नुभएका तर प्रयोग नगरिएका खोप टिकटहरू प्रयोग गर्न सक्नुहुन्छ।

खोप कुपन हराएका वा प्राप्त नभएका महानुभावहरुले, पुन: जारीको लागि आवेदन दिन कृपया कल सेन्टरमा फोन गर्नुहोस्।

विदेशबाट फुकुओका शहरमा आउनुभएका महानुभावहरुले यदि खोप लगाउन चाहनुहुन्छ भने,

खोप कुपन जारीको लागी निबेदन दिन आवश्यक छ।

फुकुओका शहरमा खोप सम्बन्धि परामर्श, बुकिंग र खोप कुपन जारीको बारेमा बुझ्न, सम्पर्क गर्न सकिने कल सेन्टरको फोन नम्बर रहेको छ, ०९२-२६०-८४०५ ।

हरेक दिन बिहान ८ :३० देखि बेलुका ५ :३० बजेसम्म कल स्वीकार गरिन्छ।

नेपाली, अंग्रेजी, चाइनिज आदि ७ वटा विदेशी भाषाहरूमा यो सेवा उपलब्ध छ।

नागरिकहरूको लागि Asian-Pacific City Summit PR Event (आउनुहोस् ! SDGs र एशिया प्यासिफिक बारे रमाइलोसँग सिक्नुहोस्!

अक्टोबर ७ शनिबारको दिन, "Environmental Festival Fukuoka 2022" आयोजना हुन गईरहेको छ। २० औं पटकको यस वर्षको महोत्सव, सोलारिया प्लाजाको पहिलो तल्ला, फुकुओका मिचुकोशी लायन स्क्वायर, र केइगो पार्क गरि तीन स्थानहरूमा आयोजना हुनेछन्। यी मध्ये, फुकुओका मिचुकोशी लायन स्क्वायरमा, “आउनुहोस् ! SDGs र एशिया प्यासिफिक बारे रमाइलोसँग सिक्नुहोस्!” भन्ने बिषयमा, एसिया-प्रशान्त क्षेत्रका बालबालिकाहरूद्वारा बनाईएका चित्रहरूको प्रदर्शनी, अंग्रेजी समावेश क्विजहरू, डिजिटल टेक्नोलोजी प्रयोग गरेका टच-स्क्रिन खेलहरू मार्फत SDGs बारे सिक्न अनि रमाईलो गर्न सकिने कार्यक्रमहरु हुनेछन्। यस कार्यक्रममा भाग लिनको लागि कुनै अग्रिम दर्ता आवश्यक छैन।

थप विवरणहरूको लागि, कृपया " Environmental Festival Fukuoka " वा "Asian-Pacific City Summit" भनि खोजेर वेबसाइटहरूमा हेर्नुहोला।

【NAKASU JAZZ】

यस सप्ताहन्तमा, फुकुओका शहर हाकाता वार्डको नाकासुमा, नि:शुल्क ज्याज फेस्टिवल "NAKASU JAZZ" आयोजना हुन गईरहेको छ। यो फेस्टिवल फुकुओकाको शरद ऋतु परम्पराहरू मध्ये एक हो। दुई दिनको यस फेस्टिवलमा, नाकासुको सडकहरूमा स्टेजहरू ठडिएका अनि रोमान्चक कलाकारहरूको प्रत्यक्ष प्रदर्शनहरुले सडकहरू भरिएका देख्न सक्नुहुन्छ। नाकासु भनेपछि नाइट लाईफ, अनि स्यालरीमेन र पर्यटकहरु धेरै आउने ठाउँको रुपमा चिन्ने धेरै हुनुहुन्छ होला तर, सबै उमेरका व्यक्तिहरुले यहाँ आएर रमाइलो गर्न सक्ने सुरक्षित वातावरण बनाउने स्थानीय बासिन्दाको चाहनाबाट यो फेस्टिवलको शुरुवात भएको हो। ज्याज प्रेमीहरू लगायत ज्याज थाहा नभएकाहरुले पनि यसको मनोरञ्जन लिन सक्छन्। सबै स्टेजहरु नि:शुल्क हेर्न पाउने नै यस उत्सवको आकर्षणहरुमध्ये एक हो। समय मिलाएर तपाईहरु पनि प्रेम र जोशले भरिपूर्ण "NAKASU JAZZ" को आनन्ददायी संगीतमा झुम्नु भए कसो होला!

【फुकुओका शहरको सूचना】

“कानूनी परामर्शर मानसिक परामर्श अर्थात् व्यक्तिगत परामर्शको परिचय”

यस पटक फुकुओका सिटी इन्टरनेशनल फाउण्डेसनको सूचना रहेको छ।

फुकुओका सिटी इन्टरनेशनल सेन्टरमा रहेको फुकुओका सिटी इन्टरनेशनल फाउण्डेसनमा, फुकुओकामा बस्नु हुने विदेशीहरूका लागि निःशुल्क “कानूनी परामर्श” र “मानसिक परामर्श अर्थात् व्यक्तिगत परामर्श” प्रदान गर्दैआईरहेको छ।

 “कानूनी परामर्श”, हरेक महिनाको पहिलो शनिबार, बिहान १०:३० देखि दिउँसो १:३० बजेसम्म र, तेस्रो बुधबारको दिउँसो १:०० बजेदेखि ४:०० बजेसम्म, परामर्श अवधि ४५ मिनेट, बुकिंगको आधारमा Fukuoka Bar Association को प्रसाशनिक वकिलद्वारा निःशुल्क परामर्श प्राप्त गर्न सक्नुहुन्छ। भाषा अनुवादकको आवश्यकता भएमा, निःशुल्क अंग्रेजी 

अनुवादकको व्यवस्था गरिदिने भएकोले बुकिंग गर्नुहुँदा भन्नुहोला।

मानसिक परामर्श अर्थात् व्यक्तिगत परामर्श, हरेक हप्ताको सोमबार, मंगलबार, र विहिबार, जापानी क्लिनिकल मनोवैज्ञानिकहरुद्वारा, अंग्रेजी र जापानी भाषामा परामर्श प्रदान गरिंदै आइरहेको छ। चाहनुहुने महानुभावहरुले बुकिंग गर्नुहोला।

जुनसुकै परामर्श पनि, गोपनीयता कडा पालन गर्ने भएकोले ढुक्क भएर परामर्श लिनुहोस्।

बुकिंग, सोमबारदेखि शुक्रबार, बिहान ९ बजेदेखि बेलुका ६ बजेसम्म स्वीकार गरिन्छ। विस्तृत जानकारीका लागि, फुकुओका सिटी इन्टरनेशनल फाउण्डेसनको फोन नम्बर ०९२-२६२-१७९९ मा सम्पर्क गर्नुहोला।

【होज्योया】

फुकुओकाका तीन प्रमुख चाडहरू मध्ये एक हो, "होज्योया"। तपाईंहरु यस चाडमा जानु भएको छ कि छैन?

फुकुओका शहरको हिगाशी वार्डमा अवस्थित हाकोजाकी तीर्थस्थलमा, सेप्टेम्बर १२ देखि १८ तारिखसम्म ७ दिन ७ रातसम्म मनाइने, एक हजार वर्षदेखि चलिआएको यो शरद ऋतुको चाडपर्व हो।

यस चाडमा बाँच्नको लागि प्राप्त गरेको जीवनको लागि प्रार्थना र कृतज्ञता व्यक्त गरिन्छ। साथै, "सफल व्यवसाय" र "पारिवारिक सुरक्षा" को लागि प्रार्थना गर्ने दर्शनार्थीहरु धेरै हुन्छन्। लगभग १ किलोमिटरको बाटोमा, खानाका स्टलहरू, भूत बंगला, सुटिङ ग्यालरी, यो-यो फिशिङ बुथ सहित लगभग ५००  स्टलहरू हुनेछन्, जसले गर्दा एक जीवन्त चाडपर्वको वातावरणको महसुस गर्न सक्नुहुन्छ। बिशेष गरि, हरियो पात भएको नयाँ अदुवा र "याकिमोची" भनिने परम्परागत मिठाई बेच्न राखेका हुन्छन्। यस बाहेक, जापानी ड्रम आदिको सांगीतिक कार्यक्रम र "च्यान्पोन्" भनिने विशेष कांचको सामग्रीहरुको प्रदर्शनी पनि रहनेछ। समय मिलाएर तपाईहरु पनि जापानी संस्कृति र जापानी चाडपर्वको मनोरञ्जन लिएर हेर्नुभए कसो होला!

【फुकुओका शहरको सूचना】

Fukuoka Prize को बारेमा

फुकुओका शहरले एशियाली शैक्षिक अनुसन्धान, कला र संस्कृतिमा उल्लेखनिय योगदान पुर्‍याउने व्यक्तिहरुलाई Fukuoka Prize ले सम्मान गर्दै आईरहेको छ। यस वर्षको ३३औँ Fukuoka Prize का विजेताहरुमा,

The Grand Prize को विजेतामा, इतिहासविद Thongchai WINICHAKUL,

The Academic Prize मा, राजनीतिविद् र दक्षिण पूर्बी एशियाली अनुसन्धानविद् Khatharya UM

The Arts and Culture Prize मा, चलचित्र निर्देशक ZHANG Lu छनोट भएका छन्।

पुरस्कार समारोह सेप्टेम्बर १२ (मंगलबार) र त्यसपछि सेप्टेम्बर १३ (बुधवार) देखि सेप्टेम्बर १५ (शुक्रबार) सम्म नागरिक मञ्च आयोजना हुनेछ। १३ गते (बुधवार), कला र संस्कृति पुरस्कार बिजेता, चलचित्र निर्देशक ZHANG Lu को लेक्चर; १४ (बिहीबार) मा, राजनीतिविद् र दक्षिण पूर्बी एशियाली अनुसन्धानविद् Khatharya UM को लेक्चर, त्यस्तै १५ तारिक (शुक्रबार) The Grand Prize विजेता Thongchai WINICHAKUL को लेक्चर हुनेछन्।

सबैमा निःशुल्क सहभागी हुनसक्नुहुन्छ साथै, पछि अनलाइनमा रेकर्ड गरिएको संग्रह हेर्न सक्नुहुन्छ। प्रत्येक नागरिक मञ्चको रेकर्ड हेर्न सकिने अवधि अक्टोबर २ (सोमबार) देखि अक्टोबर ३१ (मंगलबार) सम्म हो। फोरममा सहभागिताका लागि सेप्टेम्बर १६ (शनिबार) सम्म दर्ता गर्नुहोस्।

कार्यक्रमको बिस्तृत जानकारीका लागि, कृपया "福岡アジア文化賞" वा " Fukuoka Prize " भनि खोजी, Fukuoka Prize को आधिकारिक होमपेजको इभेन्ट पेजमा हेर्नुहोला।

【Sunset Live】

यस सप्ताहन्तमा, फुकुओकामा ग्रीष्मको अन्त्यको उत्कृष्ट कार्यक्रम, "सनसेट लाइभ" हुन गईरहेको छ। समुन्द्रि तटमा आयोजना हुने, यो एक भब्य आउटडोर संगीत महोत्सव हो। अगाडि समुन्द्रको साथ, बलौटे समुन्द्रि किनारमा, जंगलको बिचमा, र क्याम्पिङ मैदानहरूमा बनाईएका स्टेजमा विभिन्न विधाका उत्कृष्ट कलाकारहरूको लाइनअप प्रस्तुतहरु हुनेछन्। फुकुओकाका रेस्टुरेन्टहरुको खानेकुरा र पेय पदार्थको स्टलहरू धेरै हुने भएकोले संगीतका साथसाथै खानपानको पनि आनन्द लिन सक्नुहुन्छ। यसबाहेक, महोत्सवले प्रकृतिको रक्षाको लागि वातावरण मैत्री गतिविधिहरूलाई प्रोत्साहन गरेको छ।

आयोजना स्थलमा थुप्रै कलाकृतिहरु प्रदर्शन हुनुका साथै प्रतक्ष्य पेन्ट आर्ट पनि हुनेछ। बाल हेरचाह सेवाहरू उपलब्ध हुनेभएकोले बच्चाहरू सहित कार्यक्रममा जान सम्भव छ। सांगीतिक मनोरन्जनको साथसाथै, त्यहाँ समुद्री खेलकुद र अन्य गतिविधिहरूले गर्दा पक्कै पनि ग्रीष्मको भरपूर मनोरञ्जन लिन सक्नुहुन्छ। हाकाता र तेन्जिनबाट सुविधाजनक शटल बसहरू छन्। थप जानकारीको लागि, " Sunset Live 2023" भनि खोज्नुहोस्।

आगामी दिनहरूमा, LOVEFM मा पनि विशेष कार्यक्रमहरु हुने भएकोले निरन्तर सुन्दै गर्नु होला♪

【फुकुओका शहरको सूचना】

विपद् रोकथाम दिवस र भण्डारण प्रोत्साहन सप्ताहको बारेमा

प्रत्येक वर्ष सेप्टेम्बर १ "विपद् रोकथाम दिवस" ​​हो।

फुकुओका शहरमा, सेप्टेम्बर १ को "विपद् रोकथाम दिवस" देखि सेप्टेम्बर ७ सम्मको एक हप्तालाई "फुकुओका शहर भण्डारण प्रोत्साहन सप्ताह" भनेर तोकिएको छ। भण्डारण वा जापानी भाषामा "बिचीकु" भन्नाले आपतकालीन समयका लागि, खानेकुरा आदि संचित गरेर राख्नु हो। घर वा कार्यस्थलहरुमा "भण्डारण" को शुरु लगायत नागरिकहरुमा विपद् रोकथामको बारेमा जनचेतना जगाउने प्रयासहरू भइरहेका छन्। 

किन भण्डारको आवश्यकता भएको होला?

• यदि भूकम्प वा आंधी आयो र सुरक्षित भयो भने पनि, हामी पानी र खानाबिना बाँच्न सक्दैनौं।
• पसल बन्द भएमा, खाना वा पेय पदार्थ किन्न सक्दैनौं।
• यदि पानी आपूर्ति बन्द भयो भने, पिउने पानी पाउन सक्दैनौं।
• यदि बिजुली वा ग्यासको लाईन काटिएको छ भने, खाना पकाउन सक्दैनौं।
• त्यसैले, बाँच्न सफल भएको ‘जीवनको सुचारुक्ता’ को लागी, दैनिक रुपमा भण्डार गर्न आवश्यक छ।

के र कसरी भण्डार गर्दा राम्रो होला त?

• पिउन मिल्ने पानी र ३ दिनको लागि पुग्ने गरि खानेकुरा तयारी गरि राखौं। प्रति दिन १ जनालाई करीव ३ लिटर पानी आवश्यक पर्छ।
• आपतकालिन खाना जस्तै भात (अल्फा चामल आदिको), क्यान् खाना, बिस्कुट, चकलेट बार, र सुख्खा रोटी आदि जस्ता नपकाईकन खान सक्ने खानेकुराहरु तयारी गरि राखौं।
• रेडियो वा फ्ल्यासलाइटमा ब्याट्री छ छैन जाँच गरि राखौं।
• सँधै खाई रहनु भएको औषधि र टास्ने पट्टि जस्ता प्राथमिक उपचार सामग्रीहरू पनि तयार गरि राखौं।
• यदि परिवारमा बच्चा छ भने, डायपर जस्ता आवश्यक सामग्रीहरू तयार गरि राखौं। 
• पिउने पानी बाहेक,शौचालय फ्लश गर्नका लागि घरेलु पानी पनि आवश्यक पर्छ। दैनिक रुपमा, पोलीट्यांकमा धाराको पानी भरेर राख्ने, ओफुरोमा पानी भरेर राख्ने आदि जस्ता तयारीहरु गरि राखौं। 

यसका साथै, सामान्य रूपमा खाने भन्दा अलि धेरै किनेर राखी, खाएर सक्यो भने पनि, सकेको भाग मात्र किनेर थपी, घरमा खानेकुराको एक निश्चित संचय गर्ने विधिलाई "रोलिंग स्टक" भनिन्छ।

खानेकुराको म्याद सकिने मितिबारे चिन्ता बिना, आपतकालिनको लागि तयारी गर्न सक्ने भएकोले यो बिधि अपनाउन प्रेरित गरिन्छ।

हरेक वर्ष, यस समयतिर  टाइफुन धेरै आउने भएकोले, विपद्को लागि पुनः तयारी गरि राखौं।